Miriambo mar 5: Ni Mariam En Min Nyasaye

Miriamboni ne ochakore nade? “Chiwo luor ne min Nyasaye nochako nya e kinde ma . . . oganda mang’eny mag joma ne ok ni e din mar Jokristo nobiro e kanisa. . . . Kuom higini gana gi gana, kit lamo margi [tiendeni jogo ma nolokore mobedo Jokristo] nosegurore kokalo kuom din maok ong’e kore maber mar nyasaye madhako ma ne iluongo ni ‘miyo maduong’,’ kendo ni ‘maler mar nyasaye.’”—The New Encyclopædia Britannica (1988), Volume 16, ite mag 326 kod 327.

Muma to wacho ang’o? ‘Inimak ich, mi ininywol nyathi mawuowi, kendo inichak nyinge ni Yesu. En nobed maduong’, to enoluonge ni Wuod Ng’a Mamalo Chutho. E momiyo nyathi mibiro nywolo bende noluong ni maler, Wuod Nyasaye.’—Luka 1:31-35.

Weche motigo e Ndikono nyiso maler ni Mariam ne en min “Wuod Nyasaye,” to ok min Nyasaye owuon. Be ne onyalo ting’o e iye, Jal ma kata mana ‘polo ma tok polo ok nyal romo’? (1 Ruodhi 8:27) Mariam ne ok owacho kamano ngang’. Puonj mar ni nitie Nyasaye ma Nyadidek, ema osekelo chochni e pach ji momiyo ok ging’eyo Mariam e yo malong’o. Kuom luonge ni Theotokos (tiendeni “ma nonyuolo-Nyasaye” e dho Grik), kata ni “Min Nyasaye,” jood Bura mar Efeso nomiyo ji ochako lamo Mariam e higa 431 E Ndalowa. Dala mar Efeso kama jo buch kanisani ne nitiere, noyudo osebedo kaka dag lamo nyiseche manono, ka gitimo nyasi mar nyasaye madhako miluongo ni Artemi, ma ne ikwano kaka nyasaye makelo nyak.

Kamano e kaka thoth yore mag lamo kido mar Artemi “ma nolwar oa e polo,” kaka tim ma oganda wuotho ka ruowo, ne orwaki e lamo mar Mariam. (Tich Joote 19:35) Tim machielo ma ne orwaki e puonj mar Jokristo ne en tiyo gi kido mag Mariam koda jomamoko e lamo.

Pim gi ndikogi mag Muma: Mathayo 13:53-56; Mariko 3:31-35; Luka 11:27, 28

ADIERA EN:

Mariam ne en min Wuod Nyasaye, to ok min Nyasaye wuon. Puonj mar Nyasaye ma Nyadidek nomiyo ji ochako lamo Mariam kaka Min Nyasaye