Miriambo mar 6: Ni Nyasaye Oyie ni Oti gi Gik Mopa Kata Kido e Lamo
Miriamboni ne ochakore nade? “Jokristo mokwongo ne ok ti gi kido e lamo . . . Ne orwak tim tiyo gi kido e lamo e kanisa e higini mag 300 kod 400, kiparo ni joma onge gi ng’eyo ne dhi puonjore adiera mag din Jokristo e yo molony kokalo kuom kidogo, moloyo koa kuom twege kata buge.”— Cyclopedia of Biblical, Theological, and Ecclesiastical Literature, mar McClintock kod Strong, Volume 4, ite mag 503 kod 504.
Muma to wacho ang’o? ‘Kik ilos kido mopa moro, kata gimoro maket gi gimoro manie polo malo, kata manie piny mwalo, kata manie pi e tiend piny. Kik ikulrinigi kata tiyonigi.’ (Wuok 20:4, 5) Jaote Johana nondiko ne Jokristo mokwongo niya: “Nyithindo, ritreuru kuom nyiseche manono.”—1 Johana 5:21.
Be kido gin mana yor miyo duong’ gigo ma gichung’ne, kaka kanise puonjo? Buk miluongo ni, The Encyclopedia of Religion wacho ni, “Kar chakruok, nyalo bedo ni kido ne itiyogo mana e puonjo, koda e bero kuonde lamo; nikech mago e paro ma ne miyo ji riwo timno lwedo. Kata kamano, mapiyo ne ochak tiyo kodgi e lamo. Mae ne en adier kuom kido ma ne itiyogo ahinya e kanise mag Othodoks ma Ugwe.” Kata kamano, janabi Isaya nopenjo e yo makare kama: ‘Nupor Nyasaye gi ng’a? Ere gi ma diwach ni chal gi Nyasaye?’—Isaiah 40:18.
Pim gi ndikogi mag Muma: Isaiah 44:13-19; Tich Joote 10:25, 26; 17:29; 2 Jo Korintho 5:7
ADIERA EN:
Tiyo gi gik mopa kata kido e lamo en tim ma Nyasaye ok oyiego
KWED MIRIAMBO, MAKRI GI ADIERA
En paro mane mwanyalo ng’ado bang’ nono e yo machuok miriambo moko mapod ipuonjo gi kanise mang’eny? “Sigenini [e dho Grik, myʹthos] molos gi rieko” ok nyal por gi adiera manie Muma, mayot winjo kendo machiwo hoch.—2 Petro 1:16.
Kuom mano, bed thuolo mar pimo weche ma osepuonji gi mago manie Wach Nyasaye—ma e soko mar adiera—ma osepuonji. (Johana 17:17) Kitimo kamano, wach ma ne osingi e ndiko maluwoni biro timore e ngimani in bende: “Unung’e adiera, kendo adiera nomiu bedo thuolo.”—Johana 8:32.
[En mar manie ite mar 9]
Pictorial Archive (Near Eastern History) Est.