Yor Satan mar Locho Ok Bi Kelo Ber Ngang’
‘Piny ok nobedi maber ni ng’a marach.’—EKL. 8:13.
1. Ang’o momiyo bura mibiro ng’adne joricho en wach mahoyo chuny?
NITIE kinde ma joma richo ibiro ng’ad negi bura. Gibiro chulo kuom gik ma gisetimo. (Nge. 5:22; Ekl. 8:12, 13) Mano en wach mahoyo chuny, to moloyo ne jogo mohero tim makare kendo ma osechandore e lwet joma richo. Ng’at marach moloyo mabende ibiro ng’adne bura kuom jorichogo, en wuon richo duto, Satan Jachien.—Joh. 8:44.
2. Ang’o momiyo kinde ne dwarore mondo eka otiek wach ma ne owuok e Eden?
2 E Eden, nikech kit Satan mar ng’ayi, nomiyo dhano okwedo yo ma Jehova lochogo. Nikech mano, jonyuolwa mokwongo ne oriwore gi Satan e keto kiawa kabe Jehova en jaloch maber, omiyo ne gibedo joricho e wang’ Jehova. (Rumi 5:12-14) En adier ni Jehova nong’eyo kaka weche ne dhi bedonegi achien nikech timgi mar ng’anjo. Kata kamano, gima ne dhi timoreno ne nyaka ket e lela ne chwech duto momi rieko, dhano koda malaike. Omiyo, kinde moromo ne dwarore eka mondo onyisgo gadier ni yo ma jong’anjogo noluwo ne ok kare chuth.
3. Onego wabed gi paro mane kuom sirkande mag dhano?
3 Nikech dhano notamore loch mar Jehova, ne nyaka gichak sirkandegi giwegi. Kondiko ne Jokristo wetene man Rumi, jaote Paulo nowuoyo kuom sirkande mag dhano kaka ‘jo ma nigi teko mar loch.’ E ndalo Paulo, ahinya wuon, sirkand Rumi ema ne nigi teko mar loch, e bwo Jaloch Nero chakre higa 54-68 E Ndalowa. Paulo nowacho ni jogo man gi teko mar locho, gin jo “ma Nyasaye oketo.” (Som Jo Rumi 13:1, 2.) Be mano nyiso ni Paulo ne temo wacho ni yo ma dhano lochogo ni malo moloyo yo ma Nyasaye lochogo? Ooyo ngang’. Kar mano, e yo mayot nowacho ni kuom kinde ma Jehova medo weyo loch mag dhano mondo obedie, Jokristo onego omigi luor kaka chenro ma “Nyasaye oketo,” kendo onego giwinj joloch ma kamago.
Yo Matero Ji e Masira
4. Ler ane gimomiyo loch dhano ok bi kelo ber ngang’.
4 Kata kamano, loch dhano ma ichiko gi Satan podi ok bi kelo ber ngang’. Nikech ang’o? Mokwongo, en nikech loch dhano ok otenore kuom rieko mar Nyasaye. Mana Jehova kende ema nigi rieko makare chuth. Omiyo, en kende ema onyalo konyowa ng’eyo loch minyalo luong ni loch maber. (Yer. 8:9; Rumi 16:27) Mopogore gi dhano mahinyo ng’eyo gik moko kokalo kuom temo tema mondi, Jehova to kinde duto ong’eyo yo maber moloyo mar timo gimoro. Chenro moro amora mar sirkal maok luw yorene, ok nyal kelo ber ngang’. Wachno, kaachiel gi chuny marach ma Satan nigo—nyiso ni yo ma olochogo kokalo kuom loch mag dhano ne dhi lwar adier nyaka a chakruok.
5, 6. Nenore ni ang’o ma nomiyo Satan oyiero mar kwedo Jehova?
5 Kinde mang’eny, ng’at mariek ok tim gima ong’eyo ni ok bi dhi maber ngang’. To ka oramo mar dhi nyime gi gima kamano, achien kethone nyaka fwenyrene. Gik mosetimore osenyiso nyading’eny ni kwedo Jachwech manyalo duto en kanono. (Som Ngeche 21:30.) Kata kamano, nikech paro mar ng’ayi koda sunga ma en-go, Satan noloko ng’eye ne Jehova. Omiyo, Jachien nodonjo e wang’yo ma ne dhi kelo mana masira kende.
6 Chuny mar ng’awruok koda sunga ma Satan ne nigo, bang’e ne onenre bende kuom jaloch mar Babulon ma ne ondik wechene mag sunga kama: “Anaidh nyaka polo, anaket komruodha malo moloyo sulwe mag Nyasaye; mi nabed e got chokruok e kuonde yo masawa man ku mabor, mogik: Anaidh malo moloyo boche polo ma malo; anachal gi Wuon Polo.” (Isa. 14:13-15) Dwaro mofuwo mar ruodhno ne olwar, kendo loch maduong’ mar Babulon norumo e yor wichkuot. Kamano bende, Satan kod piny moteloeni biro lwar chuth.
Ang’o Momiyo Jehova Oseweyo Dhano Olochi e Wigi Giwegi?
7, 8. Bedo ni Jehova oseweyo richo mondo obedie kuom kinde, osekelo ber kaka mage?
7 Jomoko nyalo penjore gimomiyo Jehova ne ok ogeng’o dhano mondo kik giriwre gi Satan e luwo yor loch ma ne ok dhi kelo ber ngang’. Kaka Nyasaye Manyalo Duto, onge kiawa ni nonyalo timo kamano. (Wuok 6:3) Kata kamano, ne oweyo timo mano. Rieko ma en-go nomiyo ok ogeng’o ng’anjo mar dhano, nimar nong’eyo ni achien ber ne dhi wuokie. Gikone, Jehova ema ne dhi nenore kaka Jaloch makare kendo ma jahera, kendo dhano moluoro Nyasaye ne dhi yudo ber nikech okang’ ma nokawono.
8 Mano kaka masira dine ok oyudo oganda dhano ka dine bed ni gikwedo Satan kendo gitamore luwo yor loch maok otelnegi gi Nyasaye! Kata kamano, okang’ ma Jehova nokawo mar weyo dhano obedi gi loch e wigi giwegi kuom kinde, osekonyo. Timo kamano osemiyo jogo ma chunygi nikare ofwenyo ni winjo kendo geno kuom Nyasaye en nyiso rieko. Kuom higini gana mang’eny, dhano osetemo sirkande mopogore opogore, to onge kata achiel mosebedo maber chuth. Ng’eyo mano osemedo jogo malamo Nyasaye jing’o mar ng’eyo ni kuom adier, yor Jehova mar locho e yo maber moloyo. En adier ni weyo loch marach mar Satan mondo obedie osekelo chandruok ne dhano, moriwo koda jogo malamo Nyasaye kochung’ motegno. Kata kamano, weyo richo mondo obedie kuom kinde machuok bende osekelo ber ne jogo moluoro Nyasaye.
Tim Ng’anjo Mosekelo ne Jehova Duong’
9, 10. Ler ane kaka loch Satan osekelo ne Jehova duong’.
9 Weyo dhano mondo olochi e wigi giwegi kichikogi gi Satan ok nyis ni koro yo ma Jehova lochogo ok nikare. Mopogore gi mano, gik mosetimore chakre chon nyiso maler ni dhano onge gi nyalo mar locho e wigi giwegi mana kaka Jeremia nondiko kotelne gi roho mar Nyasaye. (Som Yeremia 10:23.) E wi mano, tim ng’anjo mar Satan osemiyo Jehova thuolo mar nyiso e rang’iny mamalo kido mabeyo ma en-go kaka Nyasaye. E yo mane?
10 Nikech wanyalo neno kaka loch Satan en loch manono, kido malong’o chuth mag Jehova koro nyisorenwa e yo maler moloyo. E yorni, oseyudo duong’ e wang’ jogo mohere. Ee, kata obedo ni wacho ni yor Satan mar locho osekelo duong’ ne Nyasaye nyalo chocho pach ng’ato, adiera en ni mano e kaka osebet. Osenyiso yo maber moloyo ma Jehova osetiyogo e tieko akwede ma ne okwed godo lochne. E nyiso ni wachno en adier, we wanon ane e yo machuok moko kuom kido mag Jehova mondo wane kaka loch Satan osemiyo Jehova onyiso kidogi e yore momedore.
11. Ere kaka hera mar Jehova osenenore?
11 Hera. Ndiko wachonwa ni “Nyasaye en hera.” (1 Joh. 4:8) Chweyo dhano ne en okang’ mokwongo ma Nyasaye nonyisogo herane. E wi mano, yo malich kendo miwuoro ma ochwewago nyiso hera mar Nyasaye. Hera bende nomiyo Jehova omiyo dhano kar dak majaber moting’o gik moko duto madwarore mondo gibed gi mor. (Chak. 1:29-31; 2:8, 9; Zab. 139:14-16) Kata kamano, kane dhano otimo richo, Jehova nonyiso herane e yore moko manyien. E yore mage? Jaote Johana nondiko kanyiso ni Yesu nowacho kama: “Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.” (Joh. 3:16) Be Nyasaye dine onyiso dhano herane e okang’ maber maloyo oro Wuode ma miderma e piny mondo owar joricho? (Joh. 15:13) Okang’ maduong’ ma Nyasaye nonyisogo hera nobedo bende kaka ranyisi ne dhano, ka miyogi thuolo mar nyiso hera mar chiwruok e ngimagi mapile, mana kaka Yesu bende notimo.—Joh. 17:25, 26.
12. Teko mar Jehova osenenore e yo mane?
12 Teko. “Nyasaye Manyalo Duto” kende ema nigi teko mar chweyo ngima. (Fwe. 11:17; Zab. 36:9) E sa nyuol dhano, inyalo wach ni ngimane chakore kaka kalatas ma onge gi ndiko moro amora. Kar thone, yiero mosetimo, timbene, koda weche duto mag ngimane ma ne nyiso kite, pong’o kalatasno. Wechego duto koro Jehova nyalo kano. E kinde moketi, Jehova nyalo dwoko ne jalo ngimane kendo, kaachiel gi kaka nochal e kit ngimane duto. (Joh. 5:28, 29) Omiyo, kata obedo ni tho ne ok en dwaro mar Nyasaye, tho osemiyo Jehova thuolo mar nyiso ni en gi teko mar chiero jomotho. Kuom adier, Jehova en “Nyasaye Manyalo Duto.”
13. Ere kaka misango mar Yesu nonyiso ni Jehova en jang’ad bura makare chuth?
13 Ng’ado Bura Kare. Jehova ok riambi; kendo oonge gi ketho. (Rapar 32:4; Tito 1:2) Kinde duto omakore chuth gi chike mamalo mag adiera kod ng’ado bura kare, kata mana ka timo kamano nenore ni ok kelne ohala en owuon. (Rumi 8:32) Mano kaka ne lit ahinya ne Jehova neno ka Wuode mohero inego e yadh-sand ka gima Yesu ne en jal mochayo Nyasaye! Kata kamano, nikech hera moherogo dhano morem, Jehova noikore mar weyo gima litno otimre mondo omi omakre chuth gi chikne makare mar ng’ado bura. (Som Jo Rumi 5:18-21.) Piny mopong’ gi gik maok kare, nomiyo Jehova thuolo mar nyisore owuon kaka jang’ad bura e yo makare mogik.
14, 15. Moko kuom yore ma rieko koda nano mar Jehova osenenorego gin mage?
14 Rieko. Bang’ Adam kod Hawa donjo e richo, mapiyo nono Jehova nofwenyo yo ma ne odhi tiyogo e tieko gik maricho duto ma tim ng’anjogi nokelo. (Chak. 3:15) Okang’ mapiyo kamano, kaachiel gi fwenyo ne jotichne weche motudore gi dwaroneno mosmos, nomiyo rieko Jehova onenore moloyo. (Rumi 11:33) Onge gima nyalo geng’o Nyasaye chopo wechene kaka odwaro. E piny mopong’ gi anjawo, lweny, paro mokalo tong’, chayo chik, gero, dewo wang’ ji, koda wuondruok, Jehova osebedo gi thuolo moromo mar nyiso chwechne gima rieko madier en. Japuonjre Jakobo nowacho niya: “Rieko moa e polo malo, mokwongo oler, kendo okelo kuwe, obet mamuol, oikore winjo wach, opong’ gi ng’wono kod nyak maber, ok odew wang’ ji, ok ogang wach.”—Jak. 3:17.
15 Nano kod Horruok Mos. Kido mag Jehova kaka nano kod horruok mos dine ok onyisore ayanga moloyo, ka dine bed ni ok onyis kidogo ne dhano morem, ma joricho, kendo ma joketho. Bedo ni Jehova noikore timo kamano kuom higini gana mogwaro nyiso ni en gi kido mabeyogi e okang’ mamalo chuth, kendo mano miyo onego wanyis erokamano ahinya. Jaote Petro nowacho kare ni, onego ‘wakwan kinda mar Ruoth kaka warruok.’—2 Pet. 3:9, 15.
16. Ang’o momiyo bedo ni Jehova oikore weyonwa richowa en gima kelonwa mor maduong’?
16 Chuny Moikore Weyo ne Ji Richogi. Waduto wan joricho, kendo wachwanyore nyading’eny. (Jak. 3:2; 1 Joh. 1:8, 9) Mano kaka onego wabed mamor ahinya ni Jehova oikore ‘weyonwa richo duto’! (Isa. 55:7) Par ane wachni bende: Nikech ne onyuolwa e richo, wan gi thuolo mar winjo kendo ng’eyo mor mabedoe sama Nyasaye oweyonwa richowa. (Zab. 51:5, 9, 17) Ka Jehova otimonwa kamano wan wawegi, mano tego herawa kuome kendo jiwowa luwo ranyisine kuom kaka watimo ne jomoko.—Som Jo Kolosai 3:13.
Gimomiyo Piny Tuwo
17, 18. Yo ma Satan lochogo ok osekelo ber e yore mage?
17 Chenro duto mar piny Satan—ma en ema oseketo kaluwore gi yo ma olochogo—kinde duto oselwar, kendo mano osetimore nyadinwoya kuom higini mang’eny. E higa 1991, gaset miluongo ni The European nowacho kama: “Be pinyni tuwo? Ee, otuwo, kata kamano . . . ok en nikech Nyasaye—to en tuwo ma dhano modak e iye ema nokelo.” Mano kaka wechego gin adier! Nikech ne giwinjo Satan, jonyuolwa mokwongo noyiero loch dhano kar loch Jehova. Omiyo, mano ne en chakruok mar loch ma ne ok dhi kelo ber ngang’. Lit koda chandruok ma dhano yudo e piny mangima gin gik manyiso ni loch dhano nigi tuwo marach.
18 Yor Satan mar locho miyo ji bedo gi guondo. Kata kamano, guondo ok nyal loyo hera ngang’, nikech hera e kido maduong’ ma Jehova lochogo. Yor Satan mar locho oserem e kelo ngima maber kod mor. Yo ma Jehova lochogo ema osenenore ni ber! Be nitie ranyisi ma ndalogi manyiso kamano? Ee, mana kaka wabiro neno e sula maluwo.
Ang’o Mwasepuonjore Kuom Wach Loch Bang’ Somo . . .
• Ngeche 21:30?
[Picha manie ite mar 25]
Loch Satan ok osekelo ber ngang’ ne oganda dhano
[En mars]
U.S. Army photo
WHO photo by P. Almasy
[Picha manie ite mar 26]
Jehova nigi teko mar chiero jomotho
[Picha manie ite mar 27]
Hera mar Jehova koda kaka ong’ado bura kare ne onenore kuom misango mar Wuode