Ne Gichiwore Giwegi Maonge Achune e Piny Mexico

EN GIMA ber miwuoro neno kaka rowere mang’eny medo keto ngimagi obed mayot mondo omi gimed tiyo ne Jehova e okang’ malach. (Math. 6:22) Gin lokruok mage ma gijotimo? Gin pek mage ma gijoromogo? Mondo wayud dwokogo, we wane ane chal mar rowere moko masani tiyo ne Jehova e piny Mexico.

“NE NYAKA WAMED TIMO LOKRUOK”

Dustin gi Jassa mawuok Amerka, nokendore Januari higa 2007. Mapiyo bang’ donjo e kend, ne ginyiewo gimoro ma ne gisebedo ka gigombo ahinya e ngimagi. Ne ginyiewo yie maber ahinya minyalo dak e iye. Ne gichunge machiegni gi Astoria, Oregon mayudore Amerka, kendo en dala majaber molwor gi bunge gi gode mabeyo ahinya but nam mar Pacific. Dustin wacho kama: “Kane ing’iyo kamoro amora, pinyno ne jaber miwuoro!” Dustin gi jaode ne paro ni ne gidak e ngima mayot, kendo ni ne giketo genogi kuom Jehova. Ne giwacho e chunygi ni, ‘Wadak mana e yie matin ma en fut 26 (mita 7.9), kendo watiyo mana nus odiechieng’, wanie kanyakla mawacho dhok mawendo, kae to bende kinde ka kinde wajolendo kaka jopainia makonyo.’ Kata kamano bang’ ndalo, ne gifwenyo ni kare ok ne gidak e ngima mayot kaka ne giparo. Dustin wacho kama: “Kar riwo lwedo tije mag kanyakla, thothne ne wadich mana gi loso yie ma ne wanyiewono. Ne wang’eyo ni kapo ni adier ne wadwaro keto Jehova obed mokwongo e ngimawa, ne nyaka wamed timo lokruok.”

Jassa medo niya: “Kane pok okenda, ne an Mexico, e kanyakla mawacho dho-Ingresa. Ne ahero Mexico ahinya, kendo nagombo ahinya dok kuno.” Kane gijotimo Lamo mar Joot, mondo gijiw gombo margi mar tiyo ne Nyasaye e piny machielo, ne gichako somo weche mag owete gi nyimine ma nodar odhi e pinje mamoko, kuonde ma nyak ne yudoree. (Joh. 4:35) Dustin wacho kama: “Wan bende ne wadwaro yudo mor machalo kamano.” Kane osiepegi owachonegi ni kanyakla moro manyien ne dwaro kony, ne ging’ado mar dhi konyogi. Ne giweyo tijegi ma nondikgie kendo ne giuso yie ma gidar gidhi Mexico.

“MA E GIMA BERIE MOLOYO DUTO MA NE OSETIMORENWA”

Dustin gi Jassa ne odhi chako dak e dala mar Tecomán mapod chiegni gi nam mar Pacific chiegni mail 2,700 (kilomita 4,345) wuok Astoria. Dustin koro wacho ni: “Koro, kar dak e wi got kama yamo mawuok e nam kudhoe mamit, sani wadak e piny maliet miwuoro kendo yiende malmao ema ineno kamoro amora midhiye.” Mokwongo Dustin gi Jassa ne manyo tich to ok ne giyudo. To nikech pesa koro ne onge, juma ka juma ne gichamo mana ochele gi oganda diriyo e odiechieng’. Jassa wacho ni, “Ka koro chiembwa ne chiegni dhigowa, jopuonjrewa mag Muma nochako kelonwa maembe, rabolo, poi, to koda malmao mang’eny!” Bang’ ndalo matin, Dustin gi Jassa noyudo tij puonjo ji dhok e skul moro man e piny Taiwan ka gitudore e intanet. Pesa makoro giyudo e tijno, oromo konyogi.

Dustin gi Jassa koro wacho ang’o kaluwore gi ngima ma ne giyiero luwono? Giwacho ni: “Ma e gima berie moloyo duto mosetimorenwa. Winjruok manie kindwa gi Jehova, kaachiel gi winjruok e kindwa kaka dichwo gi dhako, osemedore moloyo kaka ne waparo chon. Pile watimo gik mang’eny kanyachiel—lendo, goyo mbaka kaka onego wakony jopuonjrewa, kendo watimo ikruok kanyachiel ne chokruoge. To sani koro wan thuolo moloyo kaka ne wan chon.” Gimedo wacho niya: “Eka wafwenyo adiera moro mane waparo ni wang’eyo to kare ne wakia—en e Zaburi 34:8, mawacho ni ‘rang kendo ne kaka Jehova ber.’”

JOTICH GANA GI GANA MOCHIWORE—ANG’O MAJIWOGI?

Owete gi nyimine mokalo 2,900—mosedonjo e kend koda mapok odonjo, mathothgi nie kind higini 20 kod 30 gi wiye—osechiwore mondo gilend e piny Mexico kuonde mapod jolendo dwarore. Ang’o momiyo Jonenogi nokawo okang’ mar timo tijni? Kane openj moko kuomgi, ne gichiwo gik moko adek ma nomiyo gitimo kamano. Ne gin ang’o?

Nikech ne gihero Jehova koda dhano wetegi. Leticia nobatisi ka en jahigini 18. Owacho niya: “Kane achiwora ne Jehova, nang’eyo ni achiwora tiyone gi chunya duto. Kuom mano, mondo anyis ni ahero Jehova gi chunya duto, ne adwaro tiyo gi thuolona gi tekona mang’eny e timo tije.” (Mari. 12:30) Hermilo makoro en chwor Leticia, noyudo en jahigini 20 kama, kane odar odhi tiyo ne Jehova kama joland wach maber mar Pinyruoth ne dwarore ahinya. En to owacho niya: “Nafwenyo ni konyo jomoko ong’e Nyasaye e yo maberie chuth manyalo nyisogo ni ahero dhano wadwa.” (Mari. 12:31) Omiyo noweyo dak e taon maduong’ ma nigi ngima mamong’ore kae to odhi dak e taon moro matin.

Nikech gidwaro mor madier kendo masiko. Mapiyo bang’ batiso mare, Leticia nolendo gi nyaminwa moro ma en piania kuom dwe mangima e taon moro man mabor. Owacho kama: “Neno kaka ji ne rwako wach Pinyruoth nomako dhoga kendo nomiya mor miwuoro. Ka nochopo giko dwe, nawacho kenda e chunya niya, ‘Ma e tich madwaro timo e ngimana!’” Mano bende e gima ne otimore ne Essly, nyaminwa mapok odonjo e kend, masani hike 20 gi wiye. Owacho ni mor ma noneno ema nojiwo gombone mar tiyo tich machalo kamano. Kane pod en e sekondari skul, noromo gi joneno moko ma ne lendo gi kinda ahinya e alwora ma jolendo ne dwaroree. Owacho niya, “Neno kaka owete gi nyiminego ne mor nomiyo agombo dak e ngima ma ne gidakieno.” Nyimine mang’eny osetimo mana kaka Essly. Kuom adier, e piny Mexico nitie nyimine 680 mapok odonjo e kend, malendo kuonde ma jolendo dwarore ahinya. Mano kaka giketo ranyisi maber ne rowere koda jomadongo!

Nikech gidwaro dak e ngima makelo mor gadier. Bang’ tieko sekondari skul, Essly ne ogwel mondo odhi osom e Yunivasiti to ichulone. Osiepene nojiwe mondo okaw thuolono osomgo mondo chieng’ moro odag e “ngima maber”—oyud digri, tich maber, onyiew mtoka, kendo owuoth e tung’ pinje. En to ok noluwo pach osiepenego. Owacho niya: “Moko kuom osiepena ma Jokristo nomanyo gik machalo kamago, to kang’iyogi malong’o, nafwenyo ni ok ne giketo Pinyruodh Nyasaye obed mokwongo. Nachako aneno bende ni thothgi ngimagi ok ne dhi maber nikech ne gimedo siko wigi e yore mag pinyni kendo donjo e chandruoge moko goyiem. An ne adwaro tiyone Jehova chuth kapod an rawera.”

Essly nopuonjore tije moko ma ne nyalo konye yudo tich masiro ngimane kotiyo ne Nyasaye kaka painia, kae to odhi e alwora kama jolendo ne dwaroree ahinya kendo mapiyo. Nong’ado bende mar puonjore dhok miwacho gi joma iluongo ni Otomi gi Tlapaneco. Sani koro kong’iyo higini adek mosetiyo tij lendo e alwora ma jolendo ne dwaroree ahinya, owacho niya: “Lendo e gwenge ma jolendo dwaroree ahinya osekelona mor madier e ngimana. To moloyo duto, lendo kuondego osemiyo amedo jiwo winjruok manie kinda gi Jehova.” Phillip gi Racquel, ma nowuok Amerka to sani hikgi osekalo 30, bende oyie gi wachno. Giwacho ni, “Lokruok masani timore e piny mangima, osemiyo ji mang’eny luoro. Kata kamano, tiyo kama ji mang’eny pod oyie winjo ote ma Muma oting’o miyowa jing’o dhi nyime konyogi. Wayudo mor mang’eny gadier!”

NYAGRUOK GI PEK MA SECHE MOKO JABEDOE

En adier ni lendo kama jolendo dwaroree ahinya nigi pek moko. Achiel kuom pekgo en kaka ng’ato nyalo yudo pesa makonye. Mondo iyud pesa, dwarore iikri timo lokruok kaluwore gi kama idake. Verónica, ma en painia wacho kama: “Kinde moro kalendo e gweng’ moro, naikora tiyo tij uso chiemo ma nengogi yot. Komachielo, nang’ado mar tiyo tij uso lewni kendo lielo ji. Gie sani, atiyo tij lwoko udi kendo apuonjo jonyuol manyien kaka ginyalo wuoyo gi nyithindgi.”

Gimachielo makelo pek, en dak e kind joma kit ngimagi opogore gi mari. Mano e gima ne otimore ne Phillip gi jaode Racquel kane gilendo e alwora ma ji ne wachoe dho-Nahuatl. Phillip wacho niya: “Ne nitie pogruok maduong’ ahinya e kit ngima jogo, gi ngimawa.” Ang’o ma nokonyogi nyagore gi pogruokno? Owacho ni: “Ne wajoketo pachwa kuom gik mabeyo ma ne waneno e kit oganda Jo-Nahuatl—jogo nigi tudruok maber ahinya kaka joot, gigeno ahinya joma wacho adier, kendo gin gi chuny mar chiwo.” Racquel bende medo ni: “Ne wapuonjore gik mathoth ahinya kane walendo kanyachiel gi owete gi nyimine e alworano.”

KAKA INYALO IKORI DHI LENDO E ALWORA MA JOLENDO DWAROREE

Kapo ni diher dhi lendo e gweng’ kata alwora ma jolendo dwaroree ahinya, inyalo timo ikruok mage? Owete gi nyimine ma nigi lony e wachni thothne wacho kama: Kapok idhi kama chalo kamano, chak keto ngimani obed mayot kendo ipuonjri bedo ng’ama oromo. (Fili. 4:11, 12) Ang’o machielo monego iik? Leticia wacho niya: “Namanyo tich maok nyal chuno ni adag kamoro achiel aming’a. Ne adwaro tije ma ne nyalo miyo adhi alendi e gwenge mamoko bende kanyalore.” Hermilo to wacho niya: “Napuonjora tedo, lwoko, kendo goyo lewni pas.” Verónica bende wacho ni: “Kane pod adak gi jonyuolna gi nyithindwa mamoko, ne ajakonyo timo ler kod loso chiemo manengogi yot to pod konyo del ahinya. Kae to bende, ne apuonjora kungo pesa.”

Levi gi Amelia mawuok Amerka to osebedo e kend kuom higini aboro, nyiso ni kwayo gik moko sie e lamo ne okonyogi ikruok dhi lendo Mexico. Levi wacho niya: “Ne wagoyo kwano ma wayudo kar romb pesa ma ne nyalo konyowa lendo e pinyno kuom higa achiel, kae to wakwayo Jehova e lamo mondo okonywa wayud pesano e wang’e.” Bang’ dweche matin, ne gikano pesa moromogi, mana kwan-cha ma ne gikwayo e lamogi kae to ne gidhi mapiyo Mexico. Levi wacho kama: “Jehova nodwoko kwayowa, omiyo koro wan bende nonego watim ko korwa.” Amelia medo wacho ni: “Ne waparo ni wabiro lendo kuom higa achiel kende, kata kamano sani wasebedo Mexico kuom higni abiriyo, kendo ok wan gi paro mar wuok! Dak e piny Mexico konyowa neno kaka lwet Jehova ok chiek. Pile ka pile waneno kaka Jehova ber.”

Adam gi Jennifer, mawuok e piny Amerka to sani lendo e alwora miwachoe dho-Ingresa e piny Mexico, bende wacho ni kwayo Jehova e lamo nokonyogi kama duong’. Giwacho niya: “Kik irit ni nyaka gik moko obedni maber chuth. Nyis Nyasaye gombo mari mar dhi lendo e piny machielo, kae to ikaw okang’ kaluwore gi lamonino.” Gimedo wacho niya: “Ket ngimani obed mayot, kae to indik ne ofis matayo tij lendo e piny midwaro dhiyeno, to bang’e kisegoyo kwano ming’eyo gik madwarore duto, kaw okang’!”a Kitimo magi duto, ibiro neno gweth mang’eny miwuoro.