Elisha Noneno Geche mag Mach—Be In Bende Inenogi?

Ruodh Suria ne manyo Elisha janabi mar Nyasaye mondo omake kendo otweye. Nowinjo ni Elisha ne ni Dothan dala ma ne nie wi got kendo mochiel gi ohinga. Ka nochopo gotieno, ruoth ne ooro oganda lweny maduong’, farese kod geche mag lweny mondo odhi Dothan. Ka nochopo seche mag okinyi, noyudo jolwenygo osetieko lworo dalano.—2 Ruo. 6:13, 14.

Kane jatij Elisha ochiew mowuok oko, noneno jolweny ma wasigu ma nobiro mako Elisha, mi obedo maluor. Jatij Elisha noywak niya: “Ruodha! Wanatim ang’o?” Elisha nodwoke niya. “Kik iluor: niwira jo man kodwa ng’eny moloyo jogo man kodgi.” Kae to janabino nokwayo Nyasaye kama: “Jehova, asayi, yaw wang’e mondo one.” Muma dhi nyime wacho niya: “Jehova noyawo wang’ wuoino; mi noneno; kendo ne, got nopong’ gi farese kod geche mag mach molworo Elisha.” (2 Ruo. 6:15-17) Wanyalo yudo puonj mane kuom wachni koda gik mamoko ma ne otimore e ngima Elisha?

Kata obedo ni Elisha ne olwor gi jolweny mag Suria, ne en gi chuny mokuwe. Noketo geno kuom Jehova kendo ne oneno kaka Jehova noritogi. E kindegi, ok wagen neno honni machalo kamago, kata kamano nenore maler ni Jehova rito joge kaka oganda. Wan bende wanyalo wacho ni olworwa gi farese kod geche mag mach. Ka wan gi yie ni Jehova rito joge kendo ka kinde duto waketo genowa kuome, wabiro “dak kar kuwe” kendo yudo gweth mag Jehova. (Zab. 4:8) We wane ane kaka wanyalo yudo puonj kuom gik mamoko ma ne otimore e ngima Elisha.

ELISHA CHAKO TIYO NE ELIJA

Chieng’ moro kane Elisha puro, janabi Elija nobiro ire mobolo kuome nangane mar abola mar tich. Elisha nong’eyo tiend wachno. Elisha noloso nyasi mar goyo oriti ne wuon-gi gi min-gi, kae to owuok mondo odhi oti ne Elija. (1 Ruo. 19:16, 19-21) To nikech Elisha noikore mar timo gi chunye duto gimoro amora ma Jehova ne dwaro, Jehova ne otiyo kode e yore mopogore opogore kendo bang’e ne oyiere obedo janabi kar Elija.

Nyalo bedo ni Elisha notiyo ne Elija kuom higini auchiel. E kindeno, Elisha ne en ‘jatij Elija’ ma ne tiyo mana tij olo ne Elija pi sama ologo. (2 Ruo. 3:11) Mano tiende ne en ang’o? E kindego, ji ne chiemo gi lwetgi nikech ne gionge gi ojike, pelni kata gik mamoko michiemogo. Bang’ chiemo, jatich ema ne olo ne ruodhe pi logo. Moko kuom tije ma Elisha ne timo noriwo tije moko matindo tindo. Kata kamano nokawo tijeno kaka gimaduong’ ahinya.

E kindegi bende, Jokristo mang’eny oikore tiyo ne Nyasaye gi thuologi duto e migepe mopogore opogore. Nikech ang’o? Nikech gin gi yie kuom Jehova kendo gidwaro tiyone gi tekogi duto. Moko kuomgi weyo miechgi ka gidhi tiyo ne Nyasaye e Bethel, gero ute mag chokruok koda tiyo ne Nyasaye e yore mamoko. Tije ma gitimogo ji thoro kawo ni gin tije matindo maok owinjore kodgi. Kata kamano, ok onego wabed gi paro ma kamano nikech Jehova ogeno ahinya tije duto ma joge timone.—Hib. 6:10.

ELISHA NOMAKO MIGAPE MOTEGNO

Kane Nyasaye pok ‘otero Elija malo e polo gi kalausi,’ ne ooro janabino odhi Bethel kowuok Gilgal. Elija nokwero Elisha ni kik odhi kode, kata kamano, Elisha to nodwoke niya: “Ok anawei.” Sama ne gidhi nyime gi wuoth, Elija nokwaye kendo nyadiriyo mondo odong’, to pod notamore. (2 Ruo. 2:1-6) Mana kaka Ruth nomakore gi Naomi, e kaka Elisha bende nomakore gi Elija. (Ruth 1:8, 16, 17) Nikech ang’o? Nikech Elisha ne mor gi migawo ma Nyasaye nomiye, mar tiyone Elija.

Elisha noketonwa ranyisi maber. Sama wayudo migepe e riwruok mar oganda Nyasaye, onego wamakgi gi lwetewa ariyo nikech wang’eyo ni watiyone Jehova. Onge tich maduong’ modhial maloyo tiyone Jehova.—Zab. 65:4; 84:10.

“KWAYA GI MA DATIMNI”

Sama chwo ariyogo ne nie wuoth, Elija nowacho ne Elisha niya: “Kwaya gi ma datimni ka pok ogola aa kuomi.” To mana kaka Ruoth Suleman notimo higini moko motelo, Elisha nokwayo gimoro ma ne dhi konye tiyo ne Jehova e yo maber chuth. Nokwayo ni omiye ‘pok ariyo mar much Elija mondo obed kuome.’ (1 Ruo. 3:5, 9; 2 Ruo. 2:9) E piny Israel, pok ariyo ne en mich ma ne imiyo wuoyi makayo kaka gikeni. (Rapar 21:15-17) Kuom mano, Elisha nokwayo mondo obi obed janabi mar Nyasaye bang’ Elija. E wi mano bende, Elisha ne dwaro mondo obed gi chir kaka Elija, ma ne en “jakinda ne Jehova.”—1 Ruo. 19:13, 14.

Elija nowacho ang’o kuom kwayo ma Elisha jatije nokwayono? Janabino nodwoke niya: “Ikwayo gi matek: to kata kamano, kinena kigola aa kuomi, ninwang’ kamano: to ka ok inena, ok nobed kamano.” (2 Ruo. 2:10) Dwoko mar Elija nenore ni ne nyiso gik moko ariyo. Mokwongo, Nyasaye kende ema ne nyalo miyo Elisha gima nokwayono. Mar ariyo, mondo Elisha oyud pokno, ne nyaka omakre chuth gi Elija kata ang’o matimore.

GIMA ELISHA NONENO

Nyasaye noneno nade kane Elisha okwayo pok ariyo mar teko mar Elija? Muma wacho niya: “To nobedo, ka gimedo dhiyo ka giwuoyo, ne, ne nitie gari mar mach, kod farese mag mach, ma nopogo kind ji ariyogo; kendo Elija noidho gi kalausi e polo. Kendo Elisha nonenogo.”a Mano e dwoko ma Jehova nomiyo Elisha kaluwore gi kwayone. Elisha noneno ka igolo Elija oa kuome, kendo noyudo pok ariyo mar much Elija, kae to nokawo kar Elija kaka janabi.—2 Ruo. 2:11-14.

Elisha nokwanyo nanga mar abola ma nolwar koa kuom Elija, kae to orwakogo. Nangano koro ne nyiso ji ni Elisha en janabi mar Nyasaye. Gimachielo ma ne medo nyiso ni koro en janabi, en kane otimo hono mar baro pige mag Aora Jordan.

Nyakabed ni gima Elisha noneno kane Elija idho gi kalausi e polo, nomulo chunye ahinya. Neno farese mag mach gi gach mach en gima lich maok ne pile! Mago ne nyiso ni Jehova nosemiyo Elisha gima ne okwayo. Sama Nyasaye dwoko kwayowa, wan ok wane fweny mar farese kata gach mach. Kata kamano, pod wanyalo fwenyo ni Nyasaye tiyo gi tekone maduong’ mondo ochop dwache. To sama waneno kaka Jehova gwedho bad riwruok mar oganda mare manie piny, chalo ka gima waneno gari maduong’ mar Jehova ka nie ng’wech.—Eze. 10:9-13.

Gik mathoth ma ne otimore e ngima Elisha nomiyo obedo gadier ni Jehova nigi teko miwuoro. Ka kuom adier, roho maler mar Nyasaye nokonyo janabino mondo otim honini 16 to mago noloyo nyadiriyo honini duto ma Elija notimo.b Elisha nochako oneno kendo farese kod geche mag mach ka en Dothan, kane olwore gi jolweny mag Suria mana kaka owach e chak sulani.

ELISHA NOKETO GENO KUOM JEHOVA

Kata obedo ni ne olwore gi wasigu ka en Dothan, Elisha nobedo mana gi chuny mokuwe. Nikech ang’o? Nikech nosenyago yie motegno kuom Jehova. Wan bende dwarore wabed gi yie machalo kamano. Kuom mano, we wakwa Nyasaye mondo omiwa roho maler mondo okonywa wabed gi yie motegno kendo konyowa wanyag kido mamoko mag roho maler.—Luka 11:13; Gal. 5:22, 23.

Gima ne otimore Dothan bende nomiyo Elisha omedo keto geno kuom Jehova koda kuom jolweny maok ne ma Nyasaye tiyogo e rito joge. Janabi nofwenyo ni kare Nyasaye noyudo oseoro malaike mage mondo olwor dalano kaachiel gi wasigu. Nyasaye noreso Elisha gi jatichne kuom dino wenge jowasikgi ma gibedo muofni. (2 Ruo. 6:17-23) E kindeno, ma weche ne tekie kamano, Elisha noketo genone duto kuom Jehova mana kaka nosebedo kotimo e kinde mamoko.

Mana kaka Elisha, weuru waket genowa kuom Jehova Nyasaye. (Nge. 3:5, 6) Ka watimo kamano, ‘Nyasaye nokechwa kendo nogwedhwa.’ (Zab. 67:1) En adier ni wan ok olworwa gi geche mach kata gi geche farese mag lweny. Kata kamano, e kinde mag “masira maduong’,” Jehova biro rito oganda mare. (Math. 24:21; Fwe. 7:9, 14) Kapok kindeno ochopo, weuru waket e pachwa kinde duto ni ‘Nyasaye e kar bwokwa.’—Zab. 62:8.