“En gi Mich Momiyo Jogo ma Dware”

Be Jehova neno kinda ma jotichne timo mondo gimore? Jomoko nyalo tamore ka giwacho ni Nyasaye ok odewo gima dhano timo. Kata kamano, paro ma kamano en miriambo maduong’ e wi Nyasaye. Wach Nyasaye ma en Muma, nyisowa adiera e wi wachno. Muma nyisowa ni Jehova mor gi kinda ma jotichne keto e tiyone. Ne ane weche ma jaote Paulo tiyogo e bug Jo Hibrania 11:6.

Ang’o ma dwarore mondo ng’ato omor Jehova? Paulo nondiko niya: ‘Ng’at ma onge yie ok nyal bet malong’o ne Nyasaye.’ Ne ni Paulo ok wach ni tek bedo malong’o ne Nyasaye ka waonge yie, to owacho ni ok wanyal bedo malong’o ne Nyasaye ka waonge yie. Tiende niya, bedo gi yie en gima dwarore ahinya mondo ng’ato omor Nyasaye.

En kit yie mane ma moro Jehova? Yie ma moro Nyasaye nyaka bed gi gik moko ariyo. Mokwongo, ‘nyaka wabed gi yie ni Nyasaye nitie.’ Dwamor Nyasaye nade ka wan gi kiawa ni entie? Yie madier oriwo gik momedore nikech kata mana jochiende bende oyie ni Jehova nitie. (Jakobo 2:19) Yie ma wan-go ni Nyasaye nitie onego omi wakaw okang’, ma tiende ni wanyis yiewa kuom dak e yo ma moro Nyasaye.—Jakobo 2:20, 26.

Mar ariyo, nyaka ‘wayie’ ni Nyasaye nigi “mich momiyo jogo ma dware.” Ng’at ma nigi yie madier kuom Nyasaye ni gadier chuth ni kinda motimo mondo odag e ngima ma moro Nyasaye ok bi dhi nono. (1 Jo Korintho 15:58) Onge kaka wanyalo moro Jehova ka wan gi kiawa ni en gi nyalo kata gombo mar gwedhowa. (Jakobo 1:17; 1 Petro 5:7) Ng’at maparo ni Nyasaye ok dew ji, ni Nyasaye ok ne kinda ma jotichne timo mondo omore, kata maparo ni Nyasaye ok en jachiwo ok ong’eyo Nyasaye miwuoyo kuome e Muma.

Jehova gwedho jomage? Paulo wacho ni “jogo ma dware.” Buk moro ma konyo joma loko Muma, wacho ni wach ma ne olok koa e dho-Grik ni ‘dwaro’ Nyasaye tiende ok en “manye amanya,” to en keto kinda mondo “ilam” Nyasaye. Buk moro machielo be lero ni wach ma ne otigo kanyo e dho-Grik tiende en tiyo matek kendo timo sinani. Ee, Jehova gwedho joma yie ma gin-go kuome chwalogi mondo gilame gi kinda kendo ka gihere gi chunygi duto.—Mathayo 22:37.

Ere kaka Jehova gwedho jotichne? Osingonwa ngima mochwere e Paradis e piny, ma en gweth maber miwuoro manyiso kaka oherowa ahinya kendo kaka en Nyasaye ma jachiwo. (Fweny 21:3, 4) Kata mana gie kindegi, joma manyo Jehova gi kinda nwang’o gweth mogundho. Nikech Jehova konyo jotichne gi rohone maler kod rieko mayudore e Wachne, gidak e ngima maber kendo mopong’ gi mor.—Zaburi 144:15; Mathayo 5:3.

Kuom adier, Jehova en Nyasaye ma neno kinda ma jotichne timo kendo ohero ahinya jotichne mochiworene. Donge ng’eyo mano miyo igombo sudo machiegni kode? Ka en kamano, donge nyalo bedo maber ka ipuonjori kendo inyiso kit yie ma Jehova biro gwedho?