Ang’o Momiyo Nyasaye Oweyo Joma Nigi Teko Odi Joma Gihingo?

Muma wuoyo e wi weche moko malit ma nyiso kaka joma ne nigi teko ne odiyo joma gihingo. Ranyisi maber en gima ne otimore ne Naboth.a Ahab ma ne en ruodh Israel e senchari mar apar Ka Ndalowa Podi noyie ne chiege Jezebel oneg Naboth kaachiel gi yawuote mondo Ahab okaw puothgi mar mzabibu. (1 Ruodhi 21:1-16; 2 Ruodhi 9:26) Ang’o momiyo Nyasaye noweyo mondo gima rach kamano otimre?

We wanon ane gimoro achiel maduong’ momiyo Nyasaye weyo gik ma kamago otimre: Nyasaye ok nyal riambo. (Tito 1:2) Wachno otudore nade gi timbe maricho ma jomoko hinyogo jowetegi? A e chakruok, Nyasaye nowacho ne dhano ni ka ging’anjo ne chikene, ne gidhi tho. To mana kaka Nyasaye nowacho, dhano osebedo ka tho nyaka ne ng’anjo timre e puodho mar Eden. Kendo tho ma ne okwongo timore nowuok kane Kain otiyo gi tekone e yo marach monego Abel owadgi.—Chakruok 2:16, 17; 4:8.

Muma wacho kama e wi kaka ngima dhano osebedo chakre ng’anjono: ‘Ng’ato bedo gi teko kuom machielo mondo ohime.’ (Eklesiastes 8:9) Be mano e gima osebedo ka timore? Jehova ne osiemo Jo-Israel ni ruodhi ma ne dhi locho e wigi ne dhi diyogi kendo mano ne dhi miyo giywagre ne Nyasaye. (1 Samuel 8:11-18) Kata mana Ruoth Solomon ma ne en ruoth mariek ne odiyo ogandano gi osuru mapek. (1 Ruodhi 11:43; 12:3, 4) To ruodhi maricho kaka Ahab ne diyo ji moloyo. Par ane wachni: Kapo ni Nyasaye dine ogeng’o gik machal kamago duto kik timre, donge dobedo ja miriambo?

Par bende ni Satan nowacho ni dhano tiyo ne Nyasaye mana nikech gik ma Nyasaye miyogi. (Ayub 1:9, 10; 2:4) Kapo ni Nyasaye ne nyalo rito jotichne duto mondo kik hinygi kata kik digi e yo moro amora, donge mano donyiso e yo moro ni kare Satan ne wacho adier? To kapo ni Nyasaye dine rito ji duto mondo kik digi e yo moro amora, donge mano domiyo Nyasaye obedo ja miriambo maduong’ moloyo? Kapo ni Nyasaye dorito dhano e yo ma kamano, mano domiyo dhano opar ni kare ne ginyalo locho e wigi giwegi maonge Nyasaye. Muma to wacho gima opogore chuth gi mano—dhano ok nyal tayore kende owuon. (Yeremia 10:23) Timbe duto maok kare mitimo ne ji biro rumo mana chieng’ ma Pinyruodh Nyasaye nobie.

Be mano koro nyiso ni Nyasaye ok kaw okang’ moro amora e wi dicho duto ma dhi nyime? Ooyo. Non ane gik moko ariyo ma Nyasaye timo: Mokwongo, Nyasaye nyiso ayanga gima timbe mag dicho gin. Kuom ranyisi, Muma elonwa gimoro amora e wi kaka Jezebel nogango ne Naboth wach momiyo onege. Muma bende nyiso ni gik maricho ma chalo kamano timore nikech nitie jatelo moro marach maok dwar ni ji ofwenye. (Johana 14:30; 2 Jo Korintho 11:14) Muma nyiso ayanga ni jatelono en Satan Jachien. Nyasaye konyowa kik wadonj e timbe maricho kuom elonwa gik ma timbe maricho kod timbe mag dicho gin. E yo ma kamano, okonyowa mondo wayud ngima mochwere.

Mar ariyo, Nyasaye miyowa geno madier ni timbe dicho duto biro rumo. Kaka Nyasaye ne oelo timbe maricho mag Ahab gi Jezebel mong’adonegi bura kendo okumogi, miyo wabedo gadier ni obiro kumo joma richo duto e kinde moseketo mana kaka osewacho. (Zaburi 52:1-5) Nyasaye singo ni obiro golo hinyruok ma jotichne mohere oseyudo.b Omiyo, obiro chiero Naboth ma ne en jatichne kaachiel gi yawuote kendo gibiro dak e piny molos obedo paradis kama timbe maok kare ok nobedie.—Zaburi 37:34.