WACH MADUONG’ MA GASET WUOYOE | PINYRUODH NYASAYE NYALO KONYI E YORE MAGE?

Pinyruodh Nyasaye Biro Konyi e Yore Mage?

Wageno ni sula moteloka osekonyi neno ni Joneno mag Jehova kawo Pinyruodh Nyasaye kaka gima duong’ ahinya. Kendo nyalo bedo ni ng’eyo gueth ma Pinyruodh Nyasaye biro kelo e kinde ma biro osemori ahinya. Kata kamano, pod nyalo bedo ni iwuoro kabe singogo biro chopo adier.

En gima nyiso rieko kibedo motang’, kar yie ayiea gi weche duto miwinjo. (Ngeche 14:15) Bedoni motang’ kamano inyalo pim gi mar Jo-Beria machon.a Ka ne okwong nyisgi wach maber mar Pinyruoth, Jo-Beria norwako wach ma ne giwinjo, to ne ok giyie ayiea gi wechego kamano. Kar mano, ne ginono Ndiko adimba “mondo gine ka wechego dibed kamano.” (Tich Joote 17:11) E yo machielo, Jo-Beria ne opimo wach maber ma ne giwinjo gi gima Ndiko wacho. Bang’e, ne gibedo gadier ni wach maberno ne a kuom Wach Nyasaye.

Joneno mag Jehova jiwi mondo in be itim kamano. Kokalo kuom chenro ma wan-go mar puonjruok Muma gi ji ma onge chudo, ibiro yudo thuolo mar pimo weche ma Joneno mag Jehova puonjo e wi Pinyruodh Nyasaye kod gima Muma wacho.

Mopogore gi puonjruok e wi Pinyruodh Nyasaye, chenro mari mar puonjruok Muma biro konyi yudo moko kuom dwoko mag penjo madongo.

Ne wa a kanye?
Ang’o momiyo Nyasaye nochueyo dhano?
Ang’o momiyo Nyasaye oweyo chandruok mondo obedie?
Jomotho dhi kanye?
Be ibiro keth pinyni?
Ang’o ma dwarore mondo joot odag gi mor kod kuwe?

E wi mago duto, puonjruok Muma biro konyi ‘sudo ir Nyasaye.’ (Jakobo 4:8) Kaka imedo sudo ir Nyasaye, e kaka ibiro medo neno kaka Pinyruodh Nyasaye nyalo konyi sani, kendo nyaka chieng’. Kinde moro ka ne Yesu lemo, ne owacho ne Wuon mare kama: ‘Mani e ngima mochwere, ni ging’eyi, in Nyasaye makende maradier, kod jal ma nioro, Yesu Kristo.’—Johana 17:3.

Joneno mag Jehova nyalo tiyo gi bugni mondo gipuonjre kodi Muma.

Mondo ikwa puonjruok Muma ma onge chudo, wuo gi Janeno mar Jehova moro amora kata pong’ fom manie Websaitwa mar www.jw.org/luo. (Di kama wacho ni KWA PUONJRUOK MUMA mayudore gi piny e kama kwongo yawore sama ng’ato odonjo e Websaitwa)

a Beria ne en taon maduong’ ei Makedonia machon.

Gimomiyo Nyako Moro Matin Ohero Pinyruodh Nyasaye

Ne onyis nyako moro ma jahigni apar miluongo ni Folake mondo ondik e wi wich ma wacho ni “Gima Ahero e Pinyni Moloyo Gimoro Amora.” Folake noyiero mar ndiko e wi gimomiyo ohero wuoyo gi ji e wi Pinyruodh Nyasaye.

Folake nolero kama: “Pinyruodh Nyasaye en sirkal mantie adier. Kata kamano, ok wanyal nene gi wang’wa, kata ka warwako angolo!”

Folake nodhi nyime ndiko kuom gueth ma Pinyruodhno biro kelo, to moloyo ma orito gi siso. Kowuoyo kuom chandruoge moko ma Pinyruodhno biro tieko, nondiko niya, “Awinjoga malit sama aneno joma onge udi ka odak ka chokora” kod “nyithindo matho nikech kech kuonde mopogore opogore e piny.” Nomedo wacho ni, “To abedoga mamor sama asomo Isaiah 65:21.” Ndikono singo kama kuom joma biro dak e bwo loch mar Pinyruodh Nyasaye: “Giniger udi, ginidagie; ginipidh puothe mag muzabibu, ginicham olembgi.”

Folake nowacho bende ni orito gi siso kinde ma Nyasaye biro tieko tuoche duto kokalo kuom Pinyruodhe. E wechene ma ne ondiko, ne onwoyo weche manie Fweny 21:4, ma wacho ni Nyasaye “noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie.” Notieko kowacho ni wuoyo gi ji e wi Jehova kod Pinyruodhe e gima ohero e pinyni moloyo gimoro amora. Kuom adier, nyako matinni ohero Pinyruodh Nyasaye ahinya!