Gimomiyo Yesu Nokawo Pinyruodh Nyasaye Kaka Gima Duong’ Ahinya

Mana kaka nowach e sula motelo, wach ma Yesu ne okawo kaka gima duong’ e ngimane ne en ‘yalo kendo lando wach maber mar Pinyruoth.’ (Luka 8:1) Notimo kinda ahinya kowuotho kilomita mang’eny e piny Israel mondo opuonj ji e wi Pinyruodh Nyasaye. Tich ma Yesu notiyo ondik e buge ang’wen mag Injili, ma wuoyo e wi Pinyruoth mokalo nyadi 100. Ng’enygi yudore e weche ma ne Yesu owacho, to mago gin mana matin kuom weche duto ma ne owacho e wi Pinyruodh Nyasaye!—Johana 21:25.

Ang’o momiyo Yesu ne okawo wach Pinyruoth kaka gima duong’ ahinya ka ne en e pinyka? Yesu nong’eyo ni Nyasaye noseyiere mondo obed Jaloch mar Pinyruodhno. (Isaiah 9:6; Luka 22:28-30) Kata kamano, Yesu ne ok oketo pache kuom yudo duong’. (Mathayo 11:29; Mariko 10:17, 18) Ne ok ojiwo wach Pinyruoth mana mondo en owuon ema oyud ber. Yesu ne ohero Pinyruodh Nyasaye kendo pod ohero Pinyruodhnoa nikech gima Pinyruodhno biro timo ne jogo mohero, ma gin Wuon mare manie polo kod jolupne mogene.

GIMA PINYRUOTH BIRO TIMO NE WUON YESU

Yesu ohero Wuon mare manie polo ahinya. (Ngeche 8:30; Johana 14:31) Ohero kido mabeyo mag Wuon mare, kaka herane, ng’wonone, kod timne makare. (Rapar mar Chik 32:4; Isaiah 49:15; 1 Johana 4:8) Kuom mano, Yesu osin gi miriambo ma ji wacho e wi Wuon mare, kaka miriambo mar ni Nyasaye ok dew chandruok ma yudo dhano, kendo ni Nyasaye dwaro ni mondo wachandre. Mano emomiyo Yesu ne nigi siso mar lando ‘wach maber mar Pinyruoth,’ nimar nong’eyo ni e kinde mowinjore, Pinyruodhno ne dhi miyo nying Wuon mare obed maler. (Mathayo 4:23; 6:9, 10) Pinyruodhno biro timo mano nade?

Kokalo kuom Pinyruodhno, Jehova biro kelo lokruoge madongo ma biro kelo ber ne dhano. “Noywe pi wang’ duto” e wenge joma kare. Jehova biro tieko gik ma miyo pi wang’ betie, nikech osingo ni “tho ok nobedie kendo, kata ywak, kata nduru, kata rem ok nobedie.” (Fweny 21:3, 4) Kokalo kuom Pinyruodhno, Nyasaye biro tieko chandruoge duto mag dhano.b

Ok kawwa gi wuoro ni Yesu ne nigi siso mar puonjo ji wach Pinyruoth. Ne ong’eyo ni Pinyruodhno ne dhi nyiso teko ma Wuon mare nigo kod kaka okecho ji gadier. (Jakobo 5:11) Bende, ne ong’eyo ni Pinyruoth ne dhi konyo jomamoko ma ohero, tiende ni joma kare.

GIK MA PINYRUOTH BIRO TIMO NE JOMA KARE

Chon kapok ne obiro e piny, Yesu ne odak gi Wuon mare e polo. Wuoro notiyo gi Wuode e chueyo gik moko duto, gibed gik malich manie polo kaka sulwe modhuro ma ok kwanre kaachiel kod piny majaber koda le modak e iye. (Jo Kolosai 1:15, 16) Kata kamano, Yesu ‘ne mor’ gi dhano.—Ngeche 8:31.

Hera ma Yesu noherogo dhano ne nenore e tije mar puonjo ji. A chakruok ne owacho maler ni ne obiro e piny mondo ‘oyal wach maber’ ne jogo ma nigi chan. (Luka 4:18) Kata kamano, Yesu ne ok owuoyo awuoya e wi konyo ji, to ne okawo okang’ mar konyogi. Kinde ka kinde, notimo gik ma nyiso ni nohero dhano. Kuom ranyisi, ka ne oganda ochokore mondo owinj puonjne, Yesu “nokechogi, kendo nochango jogo matuo.” (Mathayo 14:14) Ka ne ng’at moro ma nigi tuo moro malich nonyiso ni en gi yie ni Yesu ne nyalo change, hera ma Yesu ne nigo nomiyo ochango ng’atno. Nonyiso ng’atno e yo mang’won niya: “Ayie! Pwodhri.” (Luka 5:12, 13) Kane Yesu oneno ka Maria ywago owadgi ma Lazaro, “mirima nomake,” “noneno lit,” kendo ‘pi wang’e nochuer.’ (Johana 11:32-36) Bang’e, notimo hono maduong’ ka ne ochiero Lazaro ma ne osebedo kotho kuom ndalo ang’wen!—Johana 11:38-44.

En adier ni Yesu nong’eyo ni kony ma ne omiyo ji ne en mana mar kinde machuok. Nong’eyo ni jogo duto ma ne ochango ne dhi bedo matuwo kendo, kendo jogo duto ma ne ochiero bang’e ne dhi tho kendo. Kata kamano, Yesu nong’eyo ni Pinyruodh Nyasaye ne dhi tieko chandruoge kaka mago chuth. Mano emomiyo Yesu ne ok otimo honni kende, to nolando bende ‘wach maber mar Pinyruoth’ gi kinda. (Mathayo 9:35) Honni ma ne otimo nonyiso mana e okang’ matin gik ma Pinyruodh Nyasaye biro timo e piny mangima. Non ane gik ma Muma singo ni biro timore e kindego.

• 

  Tuoche ok bi bedoe kendo.

  “Eka wang’ mwofini noyepi, kendo it jo ma itgi odinore noyaure. Eka ng’ato ma rang’ol nochikre ka ngau, mi duond jamomo nower.” E wi mano, “japiny ok nowachi, Atuwo.” —Isaiah 33:24; 35:5, 6.

• 

  Tho ok nobedie kendo.

  ‘Jo matir ginicham piny, mi ginidagie nyaka chieng’.’—Zaburi 37:29.

  “Osegolo tho nyaka chieng’, kendo Ruoth Nyasaye noyue pi wang’ kuom wenge duto.”—Isaiah 25:8.

• Joma otho ibiro chier.

  “Ji duto manie liete nowinj dwonde, kendo giniwuog oko.”—Johana 5:28, 29.

  “Nobedie chier.”—Tich Joote 24:15.

• 

  Ji nobed gi kuonde dak kod tich.

  “Giniger udi, ginidagie; ginipidh puothe mag muzabibu, ginicham olembgi. Giniger udi, to ng’at machielo ok nodagie; ginichuo, to ng’at machielo ok nochamgo; . . . kendo jogo mayiedho nomor gi tich luetegi ndalo mang’eny.”—Isaiah 65:21, 22.

• 

  Lweny biro rumo.

  “Omiyo lwenje orumo nyaka giko piny.”—Zaburi 46:9.

  “Oganda ok noting’ ligangla noganda machielo, kendo ok ginipuonjre wach lueny nyaka chieng’.”—Isaiah 2:4.

• 

  Nok mar chiemo ok nobedie.

  “Piny osechiek: Nyasaye, mana Nyasachwa wawegi, nogwedhwa.”—Zaburi 67:6.

  “Bel nobedi mang’eny e piny e wi gode madongo.”—Zaburi 72:16.

• Dhier biro rumo.

  “Nimar wich ok nowil gi jochan ndalo duto.”—Zaburi 9:18.

  “Nogol jachan e chandrwok koywak; kendo ng’a modhier ma onge gi jakony. Nokech jo modhier kod jochan, mi nores chuny jochan.”—Zaburi 72:12, 13.

Sama iparo kuom singruogegi ma nyiso gik ma Pinyruodh Nyasaye biro timo, be inyalo neno gimomiyo Yesu nokawo wach Pinyruoth kaka gima duong’ ahinya? Ka ne en e piny, ne en gi siso mar wuoyo e wi Pinyruodh Nyasaye ne ng’ato ang’ata ma ne dwaro winje, nikech nong’eyo ni Pinyruoth ne dhi tieko chuth chandruoge duto ma chando dhano ndalogi.

Be singo ma Muma chiwo ma nyiso gik ma Pinyruoth biro timo mori? Ka en kamano, ere kaka inyalo puonjori weche momedore e wi Pinyruodhno? To en ang’o minyalo timo mondo iyud gueth ma Pinyruodhno biro kelo? Sula ma luwo mae biro dwoko penjogo.