Ang’o Momiyo Wanyalo Geno Pinyruodh Nyasaye?

Milionde mag ji e piny mangima oyie ni Pinyruodh Nyasaye e ma miyo gibedo gi geno kuom kinde mabiro. Giluwo ranyisi mar Yesu, ne opuonjo jolupne mondo olem kama: “Pinyruodhi mondo obi, gi midwaro mondo otimre e piny.”—Mathayo 6:10.

Gimiwuoro en ni, kata obedo ni ji mang’eny ogeno Pinyruodh Nyasaye kamano, nenore ni dinde mang’eny ok puonj ji ahinya e wi Pinyruodhno. Kaluwore gi wachno, jasomo moro miluongo ni H. G. Wells nowacho ni en gima iwuoro ni Yesu ne ‘ojiwo ahinya wach Pinyruodh Polo.’ Wells medo wacho ni to e ma pod wachno ‘ok puonj ahinya e thoth kanise mag Jokristo.’

Mopogore gi kanisego, Joneno mag Jehova jiwo ahinya wach Pinyruodh Nyasaye. Par ane wachni: Gaset ma koro isomoni igoyo e dhok 220. Igoyo chiegni gasede milion 46 dwe ka dwe, kendo mano miyo obedo gaset mipogo ahinya moloyo gaset moro amora e piny mangima. To en wach mane maduong’ ma gasedni wuoyoe? Nying gasedni en Ohinga mar Jarito Malando Pinyruodh Jehova.a

Ang’o momiyo Joneno mag Jehova timo kinda ahinya mar lando Pinyruodh Nyasaye? Mokwongo, wayie ni Pinyruodh Nyasaye e wach maduong’ie moloyo ma Muma wuoyoe. E wi mano, wan gadier ni Pinyruodh Nyasaye e ma biro tieko chandruoge duto ma dhano yudo e piny sani.

Joneno mag Jehova temo ahinya luwo ranyisi mar Yesu kuom wuoyo gi ji e wi Pinyruodh Nyasaye. Ka Yesu ne nie piny, Pinyruodh Nyasaye ne en gima duong’ ahinya e ngimane, kendo mano e wach maduong’ ma ne opuonjo ji. (Luka 4:43) Ang’o momiyo Yesu nokawo Pinyruodh Nyasaye kaka gima duong’ ahinya? Pinyruodh Nyasaye nyalo konyi e yo mane? Non ane dwoko ma Muma chiwo e sula ariyo maluwo.