Winjo Siem Nyalo Reso Ngimani!

E DWE mar Desemba 26 2004, piny noyiengni matek e chula miluongo ni Simeulue e piny Indonesia. Wachre ni yiengnino ne duong’ ahinya, kendo tekone noromo magnitude 9.1. Ji duto ma ne nie dho wath nobwok. Noyudo nam odhi kwath! Gikanyono, ji duto nochako ringo kochiko gode ka giyuak niya, “Smong! Smong!” ma tiende ni sunami. Bang’ dakika 30 kende, apaka mager noketho mier kod udi mathoth.

Sunami ma notimoreno nochako gi goyo chula mar Simeulue. Ji abiriyo kende e ma notho kuom ji 78,000 ma nodak e chulano. Ang’o ma nokonyo thoth ji tony e masirano?a Nitie ngero moro ma jo chulano wachoga ni: ‘Ka piny oyiengni matek motugo pi me nam, ring idhi e got nikech pi nam dhi biro gi teko mang’eny.’ Kaluwore gi masiche ma jo chulano osegayudo nikech nam, tinde ging’eyo fwenyo sama nam olokore, kendo sama sunami okayo. Joma notony noluwo siem ma noyudo osemigi.

Muma wuoyo e wi masira moro mochomo dhano. Owacho niya: “Masira maduong’ nobedie ma pok ne otimore a chakruok piny nyaka sani, ooyo, to ok nochak otimre kendo.” (Mathayo 24:21) Nyasaye nochueyo pinyni mondo osik nyaka chieng’. Omiyo, masirano ok bi tieko pinywani chuth, kendo timbe maricho mag dhano ok e ma notug masirano. (Eklesiastes 1:4) Kar mano, Nyasaye biro tiyo gi masira ma birono e “kelo kethruok ne joma ketho piny.” Obiro tieko richo kod chandruoge duto. (Fweny 11:18; Ngeche 2:22) To mano kaka masirano biro kelo ber!

E wi mano, mopogore gi sunami kod yiengni mag piny kod gode, masira mochomowano ok bi tieko joma timbegi beyo. Muma wacho niya: “Nyasaye en hera.” Kendo Nyasaye ma nyinge Jehova singonwa ni, “Jo matir ginicham piny, mi ginidagie nyaka chieng’.” (1 Johana 4:8; Zaburi 37:29) Kata kamano, ere kaka inyalo tony e masira maduong’no, ma iyud gueth mosingnwago? En mana kuom winjo siem!

BE ING’EYO TIEND LOKRUOGE MA TIMORE E PINY?

Ok wang’eyo odiechieng’ sie mibiro tiekie richo kod chandruoge duto. Yesu nowacho niya: “Kuom wach chieng’no kod sano, onge ng’at mong’eyo, kata malaike manie polo kata Wuod Nyasaye, to mana Wuora.” Omiyo, Yesu nojiwowa kama: “Sikuru ka uneno.” (Mathayo 24:36; 25:13) Nikech ang’o? Muma nyisowa kaka piny biro chal ka Nyasaye pok okelo giko mar pinyni. Mana kaka joma nodak e chula mar Simeulue noneno lokruok ma apoya ma notimore e nam, mofwenyonegi ni sunami biro, e kaka gik ma timore e piny gie sani nyiso maler ni giko okayo machiegni. Sanduk manie sulani nyiso moko kuom gik ma Muma wacho ni ne dhi timore.

Kuom adier, moko kuom gik manie sandugno osetimore e kinde mokalo. Kata kamano, Yesu nowacho ni ka waneno “gigi duto ka timore,” to wang’e ni koro giko chiegni. (Mathayo 24:33) Penjri ane kama, ‘A chakruok piny be nitie kinde ma gik mowuo kuomgigo (1) osetimore e piny ngima, (2) e kinde machal, kendo (3) osemedo bedo marach moloyo?’ Nenore ayanga ni wadak e ndalo mag giko.

GIMA NYISO NI NYASAYE OHEROWA

Ker moro machon ma piny Amerka nowacho kama: ‘Kochiw siem chon to inyalo res ngima dhano.’ Bang’ ka masira mar sunamino nosetimore, ne olos masin moro mondo kinde ma biro masinno ochiw siem sama masira biro. Kamano bende, Nyasaye osemiyowa gima miyowa siem kapok giko obiro. Nokor kama e Muma: “Kendo wach maber mar Pinyruothni ibiro yal e piny mangima mondo ochiw neno ne ogendni duto, eka giko nobi.”—Mathayo 24:14.

Higa mokalo kende, Joneno mag Jehova notiyo gi seche mokalo bilion 1.9 ka gilando wach maber e pinje mokalo 240, kendo e dhok mokalo 700. Ma en achiel kuom gik madongo ma nyiso ni giko osekayo machiegni. Nikech Joneno mag Jehova ohero dhano wetegi, gitimo kinda ahinya e chiwo ne ji siem ni odiechieng Nyasaye mar ng’ado bura koro osekayo. (Mathayo 22:39) Nikech wach ma gilandono nyalo keloni gueth, mano nyiso kaka Jehova oheri ahinya. Ket e paro ni, ‘Nyasaye ok dwar ni oketh ng’ato ang’ata, to odwaro ni ji duto ochop kama gilokoe chunygi gia e richo.’ (2 Petro 3:9) Be ibiro winjo siem ma Nyasaye chiwo nikech ohero dhano?

RING IDHI E GODE!

Par ni joma nodak e dho wath e chula mar Simeulue notimo mapiyo ringo ka gi dhi e gode mondo gires ngimagi ka ne gifwenyo ni pi nam osetugore; ne gikawo okang’ ma ok girito. Joma nokawo okang’ mapiyo e ma notony. Mondo wabi watony e masira maduong’ ma biro, dwarore ni waring wadhi ‘e gode’ kapok odeko. Wanyalo timo kamano nade? Roho maler notayo janabi Isaya mondo owach kaka ji ne idhi gwel e kinde mag giko kata “e ndalo mabiro,” ma gin kinde mwadakiegi. Nowacho kama: “Biuru un, wadhiuru god Jehova . . . Mi nopuonjwa yore, kendo wanawuoth e yorene.”—Isaiah 2:2, 3.

Sama ng’ato nie wi got onyalo neno kama bor, kendo onyalo yudo kar geng’ruok. E yo ma chal kamano, ng’eyo yore mag Nyasaye ma yudore e Muma osekonyo ji mang’eny e piny ngima mondo gitim lokruoge ma dwarore e ngimagi. (2 Timotheo 3:16, 17) Sama gitimo lokruogego, gichako ‘wuotho e yore Nyasaye,’ kendo Nyasaye ritogi nikech oherogi.

Be ibiro yie sama ogweli, kendo weyo mondo Nyasaye oriti e kinde matekgi? Wakwayi ni inon matut gik ma Ndiko wacho ni ne dhi timore e “ndalo mag giko,” monyis e sanduk ma yudore e sulani. Joneno mag Jehova manie alworau biro mor ahinya konyi mondo ing’e tiend ndikogo kod kaka inyalo tiyo kodgi e kit ngimani. Kata inyalo yudo dwoko mag penjo ma in-go e websait marwa mar, www.jw.org/luo. Di kama wacho ni PUONJ MAG MUMA > DWOKO PENJO MA JI NIGO E WI MUMA.