Bed gi Chuny mar Chiwruok Kaka Jonabi

BE IN gi chuny mar chiwruok kaka ma jonabi machon ne nigo? Muma mar New World Translation, gocho mar 2013 e wiye ma wacho ni “Glossary of Bible Terms,” lero tiend bedo janabi kama: “En ng’at ma Nyasaye tiyogo e nyiso jomoko dwache. Jonabi ne wuoyo e lo Nyasaye, ka ginyiso gik ma ne biro timore e kinde mabiro, ne ginyiso ji puonj, chike, kod buche mag Jehova.” Kata obedo ni ok ikor weche, in bende iwuoyoga e lo Nyasaye kilando weche ma yudore e Wach Nyasaye.—Mat. 24:14.

Mano kaka wan gi thuolo majaber mar wuoyo gi jomoko e wi Jehova Nyasaye kendo puonjogi dwaro mare ne dhano! Tijni watiye kanyachiel gi ‘malaika ma fuyo e kor polo.’ (Fwe. 14:6) Kata kamano seche moko wanyaloga romo gi pek moko manyalo miyo wiwa wil gi tiyo tich ma jaberni. Moko kuom pekgo gin kaka mage? Ginyalo bedo olo, chuny monyosore, kata paro ni wan joma nono ma ok owinjore tiyo tijni. Jonabi machon bende noromo gi pekgo, kata kamano ne ok giweyo timo migawo ma ne omigi, kendo Jehova nokonyogi mondo gichop migepego. We wane ane moko kuom jonabigo kendo neno kaka wanyalo luwo ranyisi margi.

NE GITIMO KINDA AHINYA

Seche moko wanyalo ol nikech tije ma watimo pile ka pile ma chop kama waneno ni ok wanyal dhi lendo. En adier ni seche moko dwarore ni wayue mana kaka Yesu gi jootene noyueyo. (Mar. 6:31) Kata kamano, wapar ane chal mar Ezekiel kane en Babilon kod tich ma nomiye mar lando ote ne Jo-Israel ma nogol Jerusalem ma oter e tuech. Kinde moro Nyasaye nonyiso Ezekiel mondo okaw matofali achiel kae to ogor kendo opa dala mar Jerusalem e wi matofalino. Kae to Nyasaye nonyiso Ezekiel mondo onind gi ng’etne koracham kuom ndalo 390, kendo onind gi ng’etne korachwich kuom ndalo 40 mondo obed ranyisi mar kaka ne idhi dinne dalano. Jehova nonyiso Ezekiel niya: “Ne, aruako tonde kuomi [atweyi], mi ok nilokri koni gi koni, nyaka isetieko ndalo modinni.” (Eze. 4:1-8) Nyaka bed ni timo kamano nomako dho Jo-Israel ma ne nie tuech. Ezekiel ne nyaka tim gima Nyasaye nochikeno kuom higa achiel gi dire, to mano ne en tich matek ahinya. Janabino ne dhi chopo migawono nade?

Ezekiel nong’eyo gimomiyo ne oore kaka janabi. Sama Nyasaye ne oro Ezekiel, nonyise kama: ‘Kendo jogo, kata giwinjo kata gidagi winjo, gining’e ni janabi osebedo e kindgi.’ (Eze. 2:5) Kinde duto wi Ezekiel ok nowil gi migape. Omiyo notimo gima ne nyiso kaka ne idhi din ne Jerusalem. Nonyiso ni en janabi madier. En kaachiel gi jowadgi ma ne gin-go e tuech, ne giyudo ripot moro ma wacho niya: “Wasigu osemonjo dalawa!” Ee, Jo-Israel nofwenyo ni kare ne nitie janabi e kindgi.—Eze. 33:21, 33.

Kindegi, wan bende wachiwo ne ji siem ni ochiegni keth piny marach mar Satanni. Kata obedo ni seche moko wanyalo ol, pod watiyo gi tekrewa e lando wach Nyasaye, dok timo limbe, kod tayo puonjruok mar Muma gi ji. Mana kaka weche ma nokor e wi giko mar pinyni medo nenore ayanga, wamor ahinya bedo joma “Nyasaye tiyogo e nyiso jomoko dwache.”

NE GINANO KATA OBEDO NI CHUNYGI NE NYOSOREGA

Watimoga kinda ahinya e tij lendo ka roho mar Jehova bende konyowa; kata kamano, chunywa janyosore sama ji ok rwak wach. Paro ranyisi ma janabi Jeremia noketo nyalo konyowa. Jo-Israel wetene ne nyiere, seye, kendo kwede mana nikech ne olandonegi ote mowuok kuom Nyasaye. Nochopo kinde moro ma Jeremia nowacho niya: “Anawe wache, anawe lando weche e nyinge.” Jeremia ne en dhano mana kaka wan. Kata kamano, ne odhi nyime lando ote mag Nyasaye. Nikech ang’o? Nomedo wacho kama: “Nitie e chunya gi machalo ka mach maliel matieko denda, kendo aol gi geng’o dhoga, nyaka ok anyal ling’.”—Yer. 20:7-9.

Kamano bende, sama chunywa onyosore nikech ji ok rwak wach ma walandonegi, wanyalo geng’o mondo paro maricho kik lowa kuom paro matut e wi ote ma walando. Oteno nyalo chalonwa ‘ka mach maliel matieko dendwa.’ Ka waketo chenro mar somo Muma pile pile, wanyalo miyo majno osik kaliel e chunywa.

NE GILOYO PARO MARICHO

Moko kuom Jokristo ok nong’eyo ni gitim ang’o kane omigi migawo moro ma ok ging’eyo kore maber. Nyaka bed ni kamano e kaka janabi Hosea nowinjo kane omiye migawo moro. Jehova nochike niya: “Dhiyo, ikaw dhako mandhoga gi nyithind ndhogruok.” (Hos. 1:2) Inyalo winjo nade kapo ni idwaro kendo dhako, kae to Nyasaye nyiso ni dhako mibiro kendono biro bedo ochot! Hosea ne oyie migawono. Nokawo Gomer obed chiege, mi onyuolone nyathi ma wuowi. Bang’e Gomer ne onyuolo nyako gi wuowi moro kendo. Nenore ni nyithindo ariyo ma nonyuolo achien-gi ne ok onyuolo gi Hosea. Jehova nonyiso Hosea ni dhako ma ne odhi kendono ne dhi “luwo bang’ joherane.” Ne ni Muma wacho ni “joherane,” tiende ni ne ging’eny. Kendo bang’e ne odhi temo duogo ir Hosea. Koro, dine bed ni in janabi Hosea, be dine iye mondo chiegino oduog? Jehova nonyiso Hosea ni orwak chiegeno kendo! To ok mano kende, janabino nong’iewe gi fedha mang’eny mondo oduog.—Hos. 2:7; 3:1-5.

Nyaka bed ni Hosea nowuoro ni chopo migawono ne dhi kelo ber mane. Kata kamano, koluwo kaka ne inyise ma ok obaro, Hosea konyowa ng’eyo lit ma Nyasaye manyalo duto nowinjo kane Jo-Israel ong’anyone. Gima ber en ni jomoko ma chunygi ne nikare, noduogo ir Nyasaye.

E kindegi, Nyasaye ok nyis ng’ato ang’ata mondo okend ‘dhako ma andhoga.’ Kata kamano, be nitie gima wanyalo puonjore kuom bedo ni Hosea noyie chopo migawono? Mokwongo, wayudo puonj ni onego waikre lando wach maber mar Pinyruoth “e lela kendo e ot ka ot,” kata obedo ni timo kamano nyalo bedonwa matek. (Tich 20:20) Nyalo bedo ni nitie yore moko mag lendo manyalo bedoni matek tiyogo. Ji mang’eny ma puonjore Muma gi Joneno mag Jehova osegawacho ni gimor ahinya gi puonjruok Muma to lendo ot ka ot to giyudo ka teknegi. Kata kamano bang’e thothgi nochako lendo ot ka ot, ma en gima ne giparo ni ok ginyal timo. Be nitie puonj moro miyudo kanyo?

Wanyalo puonjore gima chielo kuom kaka Hosea noyie timo migawo ma ne tek ahinya. Nonyalo tamore ni kik Nyasaye oti kode e migawono ma ne chalo kod drama masie motudore gi chiege. En dhano mane ma ne nyalo ng’eyo migawoni kadine Hosea ok ondiko wachni? Wan bende wanyalo romo gi chal moko mamiyowa thuolo mar wuoyo gi ji e wi Jehova to onge ng’at machielo mong’eyo ni wan gi thuolono. Mano e gima ne otimore ne Anna, ma ne pod en nyathi skul e piny Amerka. Japuonjgi nonyisogi ni gindik e wi wach moro amora ma giyiego gi chunygi duto, kendo mondo gitem yondho Jo-klas wetegi mondo oyie gi pachgi. Anna ne nyalo tamore tiyo gi thuolono mondo ochiwgo neno e klasgi. Kata kamano, en noneno ni mano ne en thuolo maber mowuok kuom Nyasaye. Nikech nong’eyo kaka Joklas wetene ne dhi kawo wachno, nokwayo Jehova e lamo, mi obedo gi gombo mar tiyo gi thuolono maber. Noyiero wich ma wacho niya, “Be Gik Moko Nosieko Kendgi?”

Bang’ kane Anna osetieko wuoyo e nyim klas, nyako moro ma nong’ere ahinya ni oyie gi puonj mar ni gik moko nosieko kendgi, nochako dirone penjo moko mang’eny. Anna nolero yie mare e yo maber chuth. Japuonjgi ne mor ma omiye mich ma nimiyo ng’at ma nondiko wach moywayo pach ji ahinya. Chakre kindeno, Anna osebedo ka wuoyo e wi chuech gi nyako ma ne dirone penjo mang’enycha. Kuom bedo moikore timo migawo ma nowuok kuom Jehova, Anna wacho kama: “Sani alando wach maber gi chir kendo ok aluoro gimoro amora.”

Kata obedo ni ok wan jonabi, ka wabedo gi chuny mar chiwruok mana kaka ma janabi Ezekiel, Jeremia, kod Hosea ne nigo, wan bende wanyalo chopo migawo ma Jehova omiyowa e kindegi! Sama utimo lamo mar joot, kata itimo puonjruok ma mari iwuon, donge ber kisomo sigand jonabi machon kendo ipar matut kuom kaka inyalo luwo ranyisi margi?