WACH MADUONG’ MA GASET WUOYOE | MUMA WACHO ANG’O E WI POLO?
Penjo Ma Ji Nigo e Wi Joma Odak e Polo
Be isega penjori ni jomage modak e polo? Ka en kamano, to ng’e ni ok in kendi. Kuom higni mang’eny, ji osebedo ka wuoyo e wi wachno. Jomoko paro ni kweregi machon ma ne omi luor e ma odak e polo. Jomoko be paro ni polo en mana kamoro mokuwe kendo mopong’ gi mor lilo, ma malaike kod joma beyo ma ne otho chon e ma odakie. Jomoko to paro ni en kar dak mar nyiseche.
Ng’eny ji wacho ni ok wanyal ng’eyo gimoro amora matimore e polo nikech onge kata ng’ato achiel mosea kuno ma nyalo nyisowa kaka ochalo. Kata kamano, mano ok en paro makare. Yesu Kristo nodak e polo, ka en chuech mar roho, kapok obiro e piny. Nowacho ne jotend din ma nodak e kindene niya: “Aselor ka awuok e polo mondo atim, ok dwacha awuon, to dwach ng’at ma noora.” Omiyo Yesu nong’eyo kaka polo chalo mi owacho ne jootene kama: “E od Wuora nitie kuonde dak mang’eny.”—Johana 6:38; 14:2.
Nyasaye e Wuon Yesu, kendo nyinge Jehova, to odak e polo. (Zaburi 83:18) Kuom mano, onge ng’ama nyalo nyisowa malong’o kaka polo chalo mak mana Jehova Nyasaye gi Yesu Kristo. Gileronwa kaka polo chalo kokalo kuom fweny moko malich ma ne gimiyo jotich Nyasaye manie piny.
Sula maluwo mae, lero weche moko e Muma ma nyiso gik ma ne jomoko oneno e fweny mopogore opogore. Sama inono fwenygo, par ni polo kaachiel gi gik manie iye ok gin gik mwanyalo neno gi wang’wa kata mulo gi lwetwa. Omiyo, kar tiyo gi weche ma tiendgi tek e lero kaka polo chalo, Nyasaye notiyo gi fweny moket e yo mayot ma wanyalo winjo tiendgi. Fwenygo biro konyi ng’eyo joma odak “kuonde dak mang’eny” ma Yesu nowacho ni nie polo.