Penjo Moa Kuom Josombwa

Ka po ni dichwo gi dhako ma ok okendore onindo e ot achiel kendgi ma onge gima ochuno, be mano en richo ma nyalo miyo jodongo olos komiti mar yalogi?

Ka onge gima lich ahinya ma ne chuno ni ginind e ot achiel, ibiro los komiti mondo oyal wachno nikech giketore e chal ma miyo nenore ni terruok ne otimore.​—1 Kor. 6:18.

Jodongo nonoga chal ma kamano e yo matut ka pok ging’ado ni onego olos komiti mar yalo wachno kata ooyo. Kuom ranyisi, ginonoga penjo kaka: Be dibed ni jogo osebedo ka timo kisera migeno ni onego ochop e kend? Be osegasiemgi e wach bedo machiegni mokalo tong’? Ang’o ma notimore mochopo kama koro nyaka ginind e ot achiel? Be dibed ni ne gichano motelo mondo giyudre kanyachiel e odno? Be ne nitie ot ma ng’ato ka ng’ato ne nyalo nindoe yore, koso nitie gima notimore ma nochunogi nindo e ot achielno? Kuom ranyisi, dibed ni masira moro ma apoya kata gima chielo ma ok nyal geng’ chuth-chuth ne otimore? (Ekl. 9:11, NW ) E i odno, ng’ato ka ng’ato nonindo kanye? Nikech chal opogorega, samoro jodongo nyalo nono weche mamoko momedore.

Ka jodongo osenono wachno maber mi ging’eyo weche moromo, gibiro yiero ka be onego gilos komiti mar yalo wachno kata ooyo.