Rito Kue kod Ler mar Kanyakla

HIGA ka higa, ji alufe mang’eny donjoga e od Jehova mar lamo maler mana kaka Muma nokoro. (Mika 4:1, 2) Mano kaka wamor rwakogi e “kanyakla mar Nyasaye”! (Tich 20:28) Gimor gi thuolo ma gin-go mar tiyo ne Jehova kanyachiel kodwa kendo gimor bedo e riwruok ma kue kod mor ogundhoe, ma wanyalo dendo ni paradiso mar ranyisi. Roho maler mar Nyasaye kod puonj mabeyo moa e Wachne konyowa rito kue kendo miyo kanyakla osik gi timbe maler.​—Zab. 119:105; Zek. 4:6.

² Tiyo gi puonj mag Muma miyo warwako “kit dhano manyien.” (Kol. 3:10) Waweyo ywaruok gi dondruok matindo tindo. Nikech waneno gik moko kaka Jehova nenogi, ywaruok mag jo piny ok pogwa kendo watemo matek mondo riwruokwa mar owete e piny mangima osik e winjruok achiel.​—Tich 10:34, 35.

³ Kata kamano, kinde ka kinde, chandruoge moko nyalo monjo kue kod winjruok manie kanyakla. Ang’o ma nyalo kelogi? Kinde mang’eny, mano timore sa ma jomoko ok luw puonj mag Muma. Wan bende pod wakedo gi nyawo ma ne onyuolgo dhano duto. Onge ng’ato kuomwa ma onge gi richo. (1 Joh. 1:10) Ng’ato nyalo kawo okang’ moro ma ok kare morwak tim moro ma ok ler e kanyakla. Wechewa kata timbewa nyalo chwanyo ng’ato. Wan bende wanyalo chwanyore nikech gima ng’ato owacho kata otimo. (Rumi 3:23) E kinde kaka mago, wanyalo timo ang’o mondo watiek ywaruok ma kamago?

⁴ Jehova ong’eyo ni ywaruok nyalo betie. Wachne chiwonwa puonj ma nyalo konyowa e wechego. Jodongo moket kaka jokwath nyalo miyowa paro ma dwarore. Ka waluwo paro mag Ndiko ma gichiwonwa, wanyalo miyo winjruok manie kindwa gi jo mamoko ochak obed maber, kendo rito winjruok maber ma wan-go gi Jehova. Ka po ni oriewa kata omiwa siem moro nikech ketho moro ma watimo, ber ka wang’eyo ni hera ma Wuonwa me polo oherowago e ma miyo otimonwa kamano.​—Nge. 3:11, 12; Hib. 12:6.

TIEKO YWARUOK MATINDO TINDO

⁵ Nitie kinde ma jo kanyakla nyalo bedo gi ywaruok matindo tindo e kindgi. Ndiko dwaro ni wakaw okang’ mar tieko ywaruokgo mapiyo kendo e yor hera. (Efe. 4:26; Fil. 2:2-4; Kol. 3:12-14) Kinde mang’eny, ibiro fwenyo ni ka nitie ywaruok e kindi gi Jakristo wadu, unyalo tieke e yo mayot kuluwo wach ma jaote Petro nondiko niya: “Beduru gi hera matut e kindu, nikech hera umo richo mogundho.” (1 Pet. 4:8) Muma wacho niya: “Waduto wachwanyore nyading’eny.” (Jak. 3:2) Ka waluwo puonj ma Yesu nochiwo ni gik moko duto ma dwaher ni jomoko otimnwa wan bende watimnegi kamano, mano biro miyo wang’won ne jomoko kendo wawenegi kethogi matindo tindo.​—Mat. 6:14, 15; 7:12.

⁶ Ka ifwenyo ni nitie gima itimo kata miwacho mochwanyo nyawadu, kaw okang’ mapiyo mar dhi loso kue e kindi kode. Ng’e ni loso kue e kindi kode e ma biro miyo winjruok me kindi gi Jehova bende osik ka ber. Yesu nopuonjo jopuonjrene niya: “Omiyo, sa mitero mich mari kar misango, mit iparo ka in kanyo ni owadu nigi wach moro kodi, we michnino e nyim kar misango kanyo, kae to ia. Kwong idhi ilos kuwe gi owadu eka bang’e iduog ichiw michni.” (Mat. 5:23, 24) Nyalo bedo ni chwanyruok obetie nikech nitie gimoro ma ng’ato ok ong’eyo kore maber. Ka en kamano, ber mondo ji ariyogo obed thuolo mar wuoyo. Ka jo kanyakla duto ni thuolo mar wuoyo, mano biro konyogi geng’o weche kod chandruok ma jabetie e kind dhano monyuol e richo.

TIYO GI NDIKO E RIEYO PACH JOMOKO

⁷ Nitie kinde ma jodong-kanyakla nyalo neno ni ber mondo gikaw okang’ mar rieyo pach jomoko. Timo kamano ok yot kinde duto. Jaote Paulo nondiko ne Jokristo man Galatia niya: ‘Owetena, kata ka po ni ng’ato ochomo yo moro ma ok kare to pok ofwenyo, un ma usechopo weche ma dwarore kaluwore gi roho maler, temuru rieyo ng’at ma kamano, kutimo kamano gi chuny mamuol.’​—Gal. 6:1.

⁸ Ka jodongo tiyo tijgi e yo maber kaka jokwath, gibiro geng’o gik ma nyalo chocho kue kata ketho yie mar jo kanyakla. Jodongo temo ahinya mondo gichop tijgi e okang’ ma luwore gi kaka Jehova nosingo kokalo kuom janabi Isaya niya: “Ng’ato ka ng’ato nobed kar pondo ne yamo mager, ka ma ji buoroe ne kodh yamo, kaka aoche matindo e piny ma onge pi, kaka tipo mar lwanda maduong’ e piny motwo.”​—Isa. 32:2.

SIEMO JO MA OK WUOTH MOWINJORE

⁹ Jaote Paulo nochiwo siem e wi jomoko ma ne nyalo ketho kanyakla. Paulo nondiko kama: “Wachikou . . . ni uweru gi owadwa moro amora ma wuotho e yo ma ok owinjore, kendo ma ok luw puonj ma ne uyudo koa kuomwa.” Nolero tiend wachneno niya: “Ka nitie ng’at ma ok luw weche ma wasechikou e baruani, tang’uru ahinya gi ng’at ma kamano kendo uwe riworu kode mondo oyud wich-kuot. Kata kamano, kik ukwane kaka jasigu to udhi nyime rieye kaka owadwa.”​—2 The. 3:6, 14, 15.

¹⁰ Nitie kinde ma ng’ato nyalo timo gimoro ma ok en richo maduong’ ma di mi gole e kanyakla. Kata kamano, ng’atno nyalo nyiso achaya ne puonj mag Nyasaye monego ota Jokristo. Gigo nyalo bedo kaka samuoyo, kwedo gik moko, kata bedo molil mokalo tong’. Onyalo bedo ng’at ma ‘donjore e weche jomoko.’ (2 The. 3:11) Kata onyalo bedo ng’at ma mjanja kata mkora ma tiyo gi jomoko e yo marach mondo oyudgo gige ringruok, kata onyalo bedo ng’at ma donjore gi yore mag mor ma kuom adier ok owinjore gi Jakristo. Ng’at ma wuotho e yo ma ok owinjore kamano miyo kanyakla nying marach, kendo mano nyalo miyo Jokristo mamoko oluw timne marachno.

¹¹ Jodongo onego okwong otem konyo ng’at ma wuotho e yo ma ok owinjoreno gi puonj mag Muma. Kata kamano, ka ng’atno wiye tek kendo otamore luwo puonj mag Muma mosebed kimiye, jodongo nyalo yiero mondo gigol twak ne kanyakla ma chiwo siem e wi tim marachno. Jodongo biro tiyo gi rieko e ng’ado ka be gima otimoreno lich ahinya ma dwarore ni nyaka gol twak ne kanyakla. Jagol-twak biro chiwo puonj ma kwero tim ma ok owinjoreno. Kata kamano, ok obi hulo nying ng’at ma wuotho e yo ma ok owinjoreno. Adier en ni jogo mong’eyo gima osebedo ka timore miwuoyoe e twagno biro tang’ gi ng’at ma kamano kata obedo ni gibiro dhi nyime chokore kode ka ‘girieye kaka owadwa.’

¹² Igeno ni okang’ ma Jokristo mochung’ motegno biro kawo ne ng’at ma ok wuoth e yo mowinjoreno, biro miyo obed gi wich-kuot nikech timbene, mi olokre. Ka osenenore maler ni jalo oseloko yorene ma ok owinjorego, koro ok bi chuno ni kanyakla odhi nyime tang’ kode.

KAKA ONEGO WATIM KA NG’ATO OTIMONWA KETHO MADUONG’

¹³ Bedo gi chuny mar ng’wono ne ji kendo weyonegi kethogi ok nyis ni koro wayie gi kethogigo. Ok diwach ni ketho duto ma watimo en nikech onyuolwa e richo. To komachielo, bedo jo ma ok dew ketho madongo ma jomoko timo ok bi konyo owetewa e kanyakla. (Lawi 19:17; Zab. 141:5) Chik mar singruok ne nyiso ni nitiere richo moko madongo moloyo mamoko kendo kamano e kaka en e kanyakla mar Jokristo.​—1 Joh. 5:16, 17.

¹⁴ Yesu nonyiso maler okenge monego waluw ka wadwaro tieko ywaruok moro maduong’ e kindwa gi Jokristo wetewa. Okenge ma ne owachogo gin magi: “Ka owadu otimo richo, [1] dhi inyise kethone kar kendu. Ka owinji, to iseyudo owadu. To ka otamore winji, [2] dhi ire gi ng’at achiel kata ji ariyo mondo wach joneno ariyo kata adek onyis adiera mar wach. Ka ok owinjogi, [3] to wuo gi kanyakla. To ka ok owinjo kata mana kanyakla, we obedni mana kaka ng’at moa e ogendni mamoko kendo kaka jasol osuru.”​—Mat. 18:15-17.

¹⁵ Ka luwore gi ranyisi ma Yesu nochiwo e Mathayo 18:23-35, nenore ni achiel kuom richo miwuoyoe e Mathayo 18:15-17 otudore gi weche pesa kata mwandu, kaka weyo ma ok wachulo gowi kata mayo ng’ato mwandune e yor wuond. Kata richono nyalo bedo ketho nying ng’ato e okang’ marach ahinya.

¹⁶ Ka po ni in gadier ni nitie ng’ato e kanyakla motimoni richo kaka mago, kik irikni dhi ir jodongo ni mondo giwuo gi ng’atno e loyi. Mana kaka Yesu nochiko, dwarore ni ikwong idhi iwuo gi ng’atno in iwuon. Tem tieko wachno e kindi kode ma ok iriwoe ng’at machielo. Ne ni Yesu ne ok owacho ni ‘dhi dichiel kende iel kethone.’ Omiyo, ka ng’atno ok oyie ni en gi ketho kendo ok okwayi ng’wono, nyalo dwarore ni idog ire chieng’ machielo kendo. Ka po ni unyalo tieko ywaruokno kaka onyisno, onge kiawa ni ng’at ma notimoni richono biro mor ni ne ok inyiso jomoko kata ketho nyinge e kanyakla. Kitimo kamano, to “iseyudo owadu” mana kaka Yesu nowacho.

¹⁷ Ka ng’at ma nokethonino oyie ni adier nokethoni, mi okwayi ng’wono kendo okawo okang’ mar rieyo yore, onge tiende kawo okang’ machielo. Kata obedo ni richono ne duong’, ketho ma kamago inyalo tiek e kind ji ariyo ma wachno omulo kende.

¹⁸ Ka po ni duoko winjruok “e kindi kode kar kendu” otamore, inyalo timo kaka Yesu nowacho ni “dhi ire gi ng’at achiel kata ji ariyo” mondo ichak iwuo gi owaduno kendo. Jo midhi godogo bende onego obed gi chuny mar duoko winjruok e kindi kode. Ka nyalore, onego gibed jo ma nene gin joneno mar ketho ma ne otimoreno. To ka jonenogo onge, inyalo kawo ng’at achiel kata ji ariyo mondo gidhi gibedni joneno sa muloso wachno. Nyalo bedo ni jogo nigi lony kuom wachno kendo ginyalo ng’eyo ka adier ne okethni. Ka po ni jodong-kanyakla e moyier mondo gidhi gibed kaka joneno, onego ging’e ni ok gitim kamano e lo kanyakla nimar bura mar jodongo pok oketogi achiel kachiel ni mondo gitim kamano.

¹⁹ Ka po ni tieko wachno otamou bang’ temo lose nya dinwoya kidhi ire kendi kata bang’ tero ng’ato achiel kata ji ariyo, to pod ineno ni en wach ma ok diwerigo, koro inyalo tero wachno ne jodong-kanyakla. Ng’e ni gima duong’ ma jodongo dwaro en rito kue kendo neno ni jo kanyakla osiko gi timbe maler. Bang’ dhi ir jodongo, koro ber mondo iwe wachno e lwetgi kendo igen mana kuom Jehova. Tim duto minyalo mondo kik timbe mag jomoko keth mor ma in-go e tiyo ne Jehova.​—Zab. 119:165.

²⁰ Jodongo momi ting’ mar kwayo kueth mag Nyasaye biro nono wachno adimba. Konenore maler ni ng’atno notimoni richo maduong’ to otamore loko chunye a e richone kendo kawo okenge ma dwarore e loso wachno, nyalo dwarore ni komiti mar jodongo ogol ng’at ma kamano e kanyakla. Timo kamano miyo girito kueth kuom timbe ma nyalo ketho ler mar kanyakla.​—Mat. 18:17.

KAKA ONEGO OTIM KA NG’ATO OTIMO RICHO MADUONG’

²¹ Richo moko madongo kaka terruok, chode, terruok e kind chwo gi chwo, yenyo, ng’anjo ne adiera, lamo sanamu, kod richo mamoko madongo kaka mago, ok gin richo mitieko atieka mana ni ng’ato oseng’wono ne nyawadgi. (1 Kor. 6:9, 10; Gal. 5:19-21) Nikech richo ma kamago nyalo ketho yie kod timbe jo mamoko e kanyakla, nyaka tergi ne jodongo mondo gikaw okang’ mowinjore. (1 Kor. 5:6; Jak. 5:14, 15) Jomoko nyalo dhi ir jodongo mondo gihul richo ma gin giwegi e ma gitimo kata ma jo mamoko e motimo. (Lawi 5:1; Jak. 5:16) Kata bed ni wach ketho maduong’ ma Janeno mosebatis otimo, ochopo ne jodongo e yo mane, jodongo ariyo e ma biro nono wachno komondi. Ka giyudo ni ripot ma ne jodongo oyudono en adier kendo ni nitie gik ma nyiso ayanga ni richo notimore adier, bura mar jodongo biro yiero jodongo ma ok tin ne adek mondo gibed e komiti mar ng’ado bura mondo giyal wachno.

²² Jodongo nigi chuny mar rito kueth ka giikore geng’o gimoro amora ma nyalo ketho yie mar jo kanyakla. Bende, gitemo matek mondo giti gi Wach Nyasaye e yo molony sa ma girieyo kata siemo ng’at moba yo mondo gikonye obed gi winjruok maber gi Nyasaye kendo. (Juda 21-23) Mano chalo mana gi weche ma jaote Paulo nochikogo Timotheo niya: “Achiki matek e nyim Nyasaye kod Kristo Yesu ma biro ng’ado bura ne jo mangima gi jo motho . . . kwer ji, siem ji matek, jiw ji. Tim kamano gi horuok duto kod lony e puonjo.” (2 Tim. 4:1, 2) Kata obedo ni mano nyalo kawo thuologi malach, pod en achiel kuom tije ma jodongo timo gi kinda ahinya. Jo kanyakla mor kendo ogeno ahinya kindagi kendo ginenogi kaka “jo monego omi luor nyadiriyo.”​—1 Tim. 5:17.

²³ Kinde duto ma jodongo oyudo ni ng’ato otimo ketho moro, gima duong’ ma gitemo timo en konye duoko winjruokne gi Nyasaye kendo. Ka gikonye mi oloko chunye gadier, siem ma gimiye kar kende kata e nyim joneno ma ne ochiwo neno sa miyalo kesno, biro rieye kendo olo koyo kuom jo mamokogo. (2 Sa. 12:13; 1 Tim. 5:20) E kes moro amora moyal gi komiti mar ng’ado bura, nyaka ket ng’at moyalno e bwo kum ma maye migepe moko. Timo kamano biro konyo jakethono olos “nderni moriere tir” ne tiendene. (Hib. 12:13) Bang’ kinde, inyalo gonye mosmos mondo obed thuolo kendo mar timo migepe moko kaka dongruokne medo nenore ayanga.

KAKA ONEGO OLAND NG’AT MOMI SIEM

²⁴ Ka komiti mar ng’ado bura ong’ado ni jakethono oloko chunye gadier, to pod gineno ni wachno dhi ng’ere e i kanyakla, kata e gweng’ ma kanyo, kata ni kanyakla onego otang’ gi jaketho moloko chunyeno, inyalo land ne kanyakla wachno sa Chokruok mar Ngimawa kod Tijwa Kaka Jokristo. Lendono en mana machuok niya: “[Ng’ane ng’ane] omi siem.”

KA ONG’AD NI IGOLO NG’ATO E KANYAKLA

²⁵ Nitie seche moko ma jakethono osegurore e richone ahinya ma kata konye manade to nenore ni ok obi rwako kony. Nyalo bedo ni “gik ma nyiso ni giseloko chunygi” ok nenre ayanga e seche ma komiti mar ng’ado bura yale. (Tich 26:20) Ka en kamano, onego otim nang’o? E kes kaka mago, biro dwarore ni ogol jakethono oa e kanyakla mondo kik oriwre gi oganda maler mar Jehova. Tim marach ma di po ka olandore e kanyakla koro ogol oko, kendo mano rito kanyakla mondo obed gi timbe maler kod nying maber. (Rap. 21:20, 21; 22:23, 24) Ka ne onyis jaote Paulo ni nitie jal moro e kanyakla ma Korintho ma ne timo tim moro ma kelo wich-kuot, ne ochiko jodong-kanyaklano niya: “Uchiw ng’at ma kamano e lwet Satan,” mondo ores chuny ma kanyakla nigo. (1 Kor. 5:5, 11-13) Paulo bende nowuoyo kuom jo ma ne osegol e kanyakla e ndalo joote nikech ne ging’anjo ne adiera.​—1 Tim. 1:20.

²⁶ Ka oseng’ad ni onego ogol e kanyakla jaketho motamore loko chunye, komiti mar ng’ado bura onego onyise bura moseng’adneno ka giyangone maler Ndiko ma siro bura ma ging’adono. Bang’ nyiso jalno bura mong’adneno, komitino biro nyise ni ka po ni oneno ni burano ok ong’ad maber, to onyalo ng’ado apil kokwayogo mondo oyale kendo. Kata kamano, onego ondik barua konyiso maler gimomiyo okwayo kamano. Ibiro miye ndalo abiriyo chakre sa ma onyisee bura mong’adneno. Ka po ni jodongo oyudo kwayono, gibiro tudore gi jarit-alwora ma biro yiero jodongo mowinjore bedo e komiti mar apil mondo gichak giyal kesno kendo. Gibiro temo ahinya mondo giyal kes mar apilno e thuolo mar juma achiel bang’ yudo barua mar apilno. Nikech koro jal moyalno ong’ado apil, ok bi land wach gole e kanyakla komondi. Kata kamano, ok bi yie ne jal moyalno chiwo paro kata wuoyo gi Nyasaye e lamo e lo kanyakla, bende ok obi dhi nyime bedo e migepe makende.

²⁷ Ng’ado apil en aena ng’wono motim ne jakethono mondo owinjgo ywakne kendo. Kuom mano, ka jakethono ok obiro e nyim komiti mar apil, kendo kosetem manye moromo, ibiro land wach goleno e kanyakla.

²⁸ To ka jaketho ok ong’ado apil, komiti mar ng’ado bura onego olerne ni dwarore ni olok chunye kendo ginyise okenge monego okaw kodwaro ni oduoke e kanyakla bang’ kinde. Timo kamano en gima biro konyo jalo kendo en tim ng’wono ma biro miyo olok yorene mi bang’ kinde obed mowinjore duogo e riwruok mar oganda Jehova.​—2 Kor. 2:6, 7.

KAKA ONEGO OLAND NG’AT MOGOL E KANYAKLA

²⁹ Lendo mar jaketho motamore loko chunye mi ogole e kanyakla onego otim e yo machuok kama: “[Ng’ane ng’ane] koro ok en achiel kuom Joneno mag Jehova.” Mano biro konyo jo kanyakla ng’eyo ni ok owinjore giriwre gi ng’atno.​—1 Kor. 5:11.

NG’AT MOYIERO WEYO KANYAKLA KENDE OWUON

³⁰ Nitie Joneno mosebatis to yiero kendgi giwegi ni ok gidwar bedo Joneno mag Jehova kendo. Kata nyalo bedo ni jo ma kamago osedonjo e riwruoge moko mag jopiny ma timo gik ma Muma kwedo ka nyiso ni koro giseweyo riwore gi kanyakla mar Jokristo kendo koro buch Nyasaye ni kuomgi.​—Isa. 2:4; Fwe. 19:17-21.

³¹ Jaote Johana nowuoyo e wi jomoko ma ne okwedo yie mar Jokristo. Nondiko kama: ‘Ne gia kuomwa, to ne ok gichal kodwa; nimar ka di ne bed ni gichal kodwa, di ne gisiko kodwa.’​—1 Joh. 2:19.

³² Ka ng’ato oseyiero owuon mar weyo kanyakla, ok nyal pime gi Jakristo ma kindane osedok chien moweyo tij yalo. Gima nyalo miyo jomoko odog chien mi we tij yalo en ni gisebedo ka ok gisom Wach Nyasaye pile ka pile. Kata nyalo bedo ni gisebedo gi chandruoge moko, kata sand, kata kinda ma ne gin-go mar tiyo ne Jehova e ma osedok chien. Jodongo kaachiel gi jo mamoko e kanyakla biroga dhi nyime konyo Jokristo mosedok chien kamano.​—Rumi 15:1; 1 The. 5:14; Hib. 12:12.

³³ Kata kamano, onego oland ne kanyakla wach Jakristo moseyiero owuon ni ok odwar bedo Janeno mar Jehova. Lendono en mana machuok niya: “[Ng’ane ng’ane] koro ok en achiel kuom Joneno mag Jehova.” Jo kanyakla biro kawo ng’at ma kamano e yo ma chal gi kaka gikawo ng’at mosegol e kanyakla.

DUOKO NG’AT MA NE OGOL E KANYAKLA

³⁴ Inyalo duok ng’at ma ne ogol e kanyakla kata ng’at ma ne oyiero owuon weyo kanyakla. Mano nyalore mana ka giseloko chunygi gadier gia e richogi kendo kinde mowinjore osekalo ma nyiso ni gisewere gi yorgi mar richo. Ng’at ma kamano koro nyiso ni ogombo bedo gi winjruok maber gi Jehova kendo. Jodongo ok bi rikni duoke, to nyalo dwarore ni girit dweye, higa, kata mana mokalo kanyo ka luwore gi chal ma nitie mondo mi ng’atno onyis ni oseloko chunye gadier. Sa ma bura mar jodongo oyudo barua mar ng’at ma kwayo ni oduoke, komiti mar duoko ng’at ma ne ogol e kanyakla biro wuoyo kode. Komitino biro nono ka be ng’atno osebedo ka ‘timo gik ma nyiso ni oseloko chunye’ kae to gibiro ng’ado ka be owinjore giduoke e kindeno kata ooyo.​—Tich 26:20.

³⁵ Ka kanyakla machielo e ma nogolo ng’at ma kwayo ni oduokeno, komiti mar duoko ng’at ma ne ogol e kanyakla manie kanyakla mochiwoe kwayoneno biro romo kode mondo giwinje. Ka komitino oneno ni onego odwoke, gibiro nyiso bura mar jodongo e kanyakla ma ne ong’ado buche wach ma giseng’ado. Komiti ariyogo biro tiyo kanyachiel e neno ni giyudo weche duto ma dwarore mondo okonygi ng’ado bura makare. Kata kamano, komiti mar kanyakla ma ne ogolecha e ma biro ng’ado ka be owinjore oduoke.

KAKA ONEGO OLAND NG’AT MODUOK E KANYAKLA

³⁶ Ka komiti mar duoko ng’at ma ne ogol e kanyakla oneno ni ng’at ma ne ogolno kata ng’at ma ne oyiero owuon mar weyo kanyakla, oseloko chunye gadier kendo ni owinjore oduoke, ibiro land ne kanyakla ma ne ong’adone bura ni koro oseduoke. To ka sani en e kanyakla machielo, ibiro lande e kanyaklano bende. Lendono en mana machuok niya: “[Ng’ane ng’ane] koro en achiel kuom Joneno mag Jehova kendo.”

KETHO MOMAKO NYITHINDO MOSEBATIS

³⁷ Ka nyithindo ma pod tindo otimo ketho moro maduong’, onego onyis jodongo wachno. Sa ma jodongo yalo kes mar richo maduong’ ma nyathi moro otimo, ber ka jonyuolne mosebatis bende obetie. Biro dwarore ni giriw lwedo komiti mar ng’ado bura ma ok gitem dok ne nyathino ka gitemo geng’o okang’ monego orieyego. Mana kaka komiti mar ng’ado bura temoga konyo jo madongo moketho mondo giduog e wang’ yo, e kaka gibiro timo gi nyithindo bende. Kata kamano, ka nyathi mosebatisno otamore loko chunye gadier oa e richone, ibiro kaw okang’ mar gole e kanyakla.

KA JALENDO MA POK OBATIS OTIMO RICHO

³⁸ Ang’o monego otim ka po ni jalendo ma pok obatis e ma otimo richo maduong’? Nikech pok obatise, ok nyal kawne okang’ mar gole e kanyakla. Kata kamano, nyalo bedo ni nitiere puonj moko mag Muma ma pok ong’eyo korgi maber. Omiyo, konye kendo rieye e yo mamuol nyalo miyo olos “nderni moriere tir” ne tiendene.​—Hib. 12:13.

³⁹ Ka ng’at ma pok obatis nyiso tok teko ka jodongo odhi romo kode ka temo konye, ber mondo giland ne kanyakla wachno. Lendono en mana machuok niya: “[Ng’ane ng’ane] koro ok kwan kaka jalendo ma pok obatis.” Koro kanyakla biro kawe mana kaka japiny. Kata obedo ni jakethono ok ogol oko mar kanyakla, lendono biro konyo Jokristo mamoko mondo otang’ kode. (1 Kor. 15:33) Kanyakla ok bi kawo ripod tij yalo koa kuome.

⁴⁰ Bang’ kinde, ng’at ma ne osegol bedo jalendo nyalo dwaro bedo jalendo kendo. Ka mano otimore, jodongo ariyo biro romo kode mondo gine ka osetimo dongruok ma dwarore. Ka ochopo ka ma oyiene bedo jalendo kendo, inyalo land ne kanyakla kama: “[Ng’ane ng’ane] koro ikwano kendo kaka jalendo ma pok obatis.”

JEHOVA GUEDHO JO MA LAME KA GIN GI KUE KENDO KA GILER E TIMBEGI

⁴¹ Jogo duto ma gin jo kanyo mag kanyakla mar Nyasaye ndalogi mor ahinya gi riwruok ma Jehova osemiyowa. Ipidhowa gi chiemb chuny kod pi adiera mogundho ma loyonwa riyo mar Wach Nyasaye. Chenro ma Jehova oketo mar bedo gi Kristo kaka Wi kanyakla bende rito winjruokwa kode. (Zab. 23; Isa. 32:1, 2) Bedo e riwruok ma ji opong’ie gi kue kod winjruok ma jaber kamano osebedo gima miyo chunywa mor ahinya.

⁴² Sa ma watemo mondo warit kue kod ler mar kanyakla, wadhi nyime miyo ler mar adiera mar Pinyruoth omed rieny. (Mat. 5:16; Jak. 3:18) Onge kiawa ni kokalo kuom gueth mag Nyasaye, wabiro medo neno ji mang’eny ka ng’eyo Jehova kendo timo dwache kanyachiel kodwa.