Kaka Jodongo Nyiso Joricho Hera kod Ng’wono

1. En ang’o ma jomoko yiega timo bang’ timo richo moro maduong’?

E SULA mokalo, ne waneno gima jaote Paulo nonyiso kanyakla ma Korintho mondo otim ne Jakristo moro ma notimo richo maduong’. Jakristono notamore loko chunye kendo nochuno ni ogole e kanyakla. Kata kamano, mana kaka ndiko ma tayo sulani nyiso, nitie joricho ma pod inyalo kony ma lok chunygi. (Rumi 2:4) Ere kaka jodong-kanyakla nyalo konyogi mondo gilok chunygi?

2-3. Ang’o monego watim ka wafwenyo ni Jakristo wadwa otimo richo moro maduong’, to ang’o momiyo onego wakaw okang’ ma kamano?

² Ka jodongo ok ong’eyo ni Jakristo moro otimo richo, onge kaka ginyalo konye. Omiyo, ang’o monego watim ka wafwenyo ni Jakristo moro otimo richo maduong’ ma nyalo miyo ogole e kanyakla? Onego wajiwe mondo odhi omany kony kuom jodongo.—Isa. 1:18; Tich 20:28; 1 Pet. 5:2.

³ To nade ka Jakristono otamore dhi ir jodongo? Biro dwarore ni wadhi ir jodongo wan wawegi kendo wanyisgi wachno mondo gikonye. Mano biro nyiso ni wahero Jakristono nikech jodongo biro konye mondo odhi nyime bedo gi winjruok maber gi Jehova. Ka Jakristono odhi nyime gi yorene maricho, mano biro miyo omed ketho winjruokne gi Jehova. Mano bende nyalo miyo nying Jehova kod kanyakla okethre. Omiyo, wabiro kawo okang’ ma dwarore ma biro nyiso ni wahero Jehova kendo wahero jarichono.—Zab. 27:14.

KAKA JODONGO KONYOGA JAKRISTO MOTIMO RICHO MADUONG’

4. Gombo maduong’ mar jodong-kanyakla sama gitemo konyo Jakristo motimo richo en mane?

⁴ Sama ng’ato otimo richo maduong’ e kanyakla, bura mar jodongo yieroga jodongo adek ma biro bedo e komiti ma nono wachno.a Biro dwarore ni jodongogo obolre. Onego gipar ni sama gikonyo ng’ato mondo orie yorene, ok gibi chune gi timo lokruok. (Rap. 30:19) Jodongo ong’eyo ni ok ji duto motimo richo ma biro rwako kony ma gimiyogi kendo yie ni gin joketho mana kaka Ruoth Daudi noyie kethone. (2 Sa. 12:13) Joricho moko tamorega yie gi kony ma Jehova miyogi. (Cha. 4:6-8) Kata kamano, gima duong’ ma jodong-kanyakla temoga mondo gitim en konyo ng’at motimo richono mondo olok chunye oa e richo ka mano nyalore. Gin puonj mage ma jodongo onego oket e paro sama gitemo konyo Jakristo motimo richo?

5. En wach mane ma jodong-kanyakla onego opar sama gitemo konyo Jakristo motimo richo? (2 Timotheo 2:24-26) (Ne picha bende.)

⁵ Jodongo neno Jakristo motimo richo kaka rombo molal ma Jehova pod ogeno. (Luka 15:4, 6) Kuom mano, sama giromo gi Jakristo motimo richo ok gibi wuoyo kode e yo mager, kata timo gimoro ma nyiso ni ok gidewe. Bende, ok gibi neno chenro ma gitimo mondo girom kode mana kaka yo mar konyogi ng’eyo adiera mar wach. Kar mano, gibiro nyiso kido miwuoyoe e 2 Timotheo 2:24-26. (Som.) Jodong-kanyakla onego okony ng’at motimo richo e yor muolo kod ng’wono.

6. Ere kaka jodong-kanyakla nyalo iko chunygi ka pok giromo gi ng’at motimo richo? (Jo-Rumi 2:4)

⁶ Jodongo onego oik chunygi. Sama jodongo temo mondo gikony jaricho mondo olok chunye, onego giluw ranyisi mar Jehova kendo gipar weche ma Paulo nowacho niya: “Kokalo kuom [ng’wonone], Nyasaye temo tayi mondo ilok chunyi.” (Som Jo-Rumi 2:4.) Jodongo nyaka par ni gin mana jokwath ma Yesu Kristo e ma tayo. (Isa. 11:3, 4; Mat. 18:18-20) Ka pok jodongo oromo gi ng’at motimo richo, onego gipar e yor lamo gombogi maduong’ ma en konyo jarichono mondo olok chunye. Gibiro timo nonro ka gitiyo gi Ndiko kaachiel gi bugewa ma lero Muma, kendo gibiro lemo mondo Jehova omigi rieko sama gikonyo Jakristo motimo richo. Gibiro nono mondo ging’e gimomiyo odonjo richo.—Nge. 20:5.

7-8. Ere kaka jodongo nyalo luwo ranyisi mar Jehova mar horuok sama gikonyo jaricho mondo olok chunye?

⁷ Jodongo luwo ranyisi mar Jehova mar horuok. Sama gitemo konyo jaricho, giketo e paro kaka Jehova norieyo joricho e kinde mokalo. Kuom ranyisi, Jehova nohore gi Kain. Nonyise gima ne nyalo timorene ka notamore loko chunye kod gueth ma nonyalo yudo koyie loko chunye. (Cha. 4:6, 7) Jehova norieyo Daudi kotiyo gi janabi Nathan, ma notiyo gi ranyisi moro ma nomulo chuny ruodhno. (2 Sa. 12:1-7) Bende, Jehova ‘ne oroga jotichne ma jonabi’ mondo orie Jo-Israel sama ne gitamore winje. (Jer. 7:24, 25) Jehova ne ok obet abet korito mondo joge olok chunygi e ka okonygi. Kar mano, nokawo okang’ mar jiwogi mondo gilokre.

⁸ Jodongo luwo ranyisi mar Jehova sama gikonyo joma otimo richo maduong’. Sama gitemo konyo jaricho, gitimo kamano gi horuok duto mana kaka onyiswa e 2 Timotheo 4:2. Omiyo, kinde duto onego ginyis chuny mar ritruok kod horruok mondo gikony ng’at motimo richo obed gi gombo mar timo gik makare. Ka jaduong’-kanyakla iye nyalo wang’ kendo chwanyore, mano nyalo mono jaricho ma gikonyono rwako puonj ma gimiye kata loko chunye.

9-10. Ere kaka jodong-kanyakla nyalo konyo jaricho mondo one pek mar richone?

⁹ Jodongo biro temo nono chal moko ma ne nyalo miyo Jakristo moro odonj e richo. Kuom ranyisi, dibed ni Jakristono nochako jwang’o puonjruok ma mare owuon kata tij lendo? Dibed ni nosechako jwang’o wuoyo gi Jehova e lamo pile? Dibed ni nosechako timo gik ma miyo obedo gi gombo maricho, kuom ranyisi, bedo gi osiepe maricho kod yore mag manyo mor ma ok owinjore? Ere kaka yiero ma kamago osechiko ngimane? Be ong’eyo kaka Jehova Wuon-gi winjo e wi yiero ma notimogo?

¹⁰ Jodongo nyalo tiyo gi penjo e yo mariek ma ok gidonjore ahinya e ngima ng’atno mondo gikonye fwenyo gik ma nomiyo odonjo e richo. (Nge. 20:5) E wi mano, jodongo nyalo tiyo gi ranyisi e konyo jarichono neno pek mar richone mana kaka Nathan notimo ne Daudi. Samoro, e romogi mokwongo, jarichono nyalo neno kethone, kendo winjo malit nikech richo ma notimo. To mano nyalo miyo olok chunye.

11. Ere kaka Yesu ne neno joricho?

¹¹ Jodongo temo matek mondo giluw ranyisi mar Yesu. Ka ne Yesu wuoyo gi Saulo ma a Tarso, nopenje penjo moro ma nochiewo pache. Nopenje kama: “Saulo, Saulo, isanda nang’o?” Penjono nokonyo Saulo fwenyo ni gima notimo ne ok ber. (Tich 9:3-6) To ka Yesu nowuoyo kuom “dhako ma Jezebel,” nowacho kama: “Ne amiye kinde mar loko chunye oa e richo.”—Fwe. 2:20, 21.

12-13. Ere kaka jodongo nyalo miyo jaricho kinde mar loko chunye? (Ne picha bende.)

¹² Jodong-kanyakla luwo ranyisi mar Yesu kuom keto e paro ni Jakristo motimo richo pod nyalo loko chunye. Nitie joricho ma nyalo loko chunygi mana chieng’ ma gihangoe romo gi komiti mar jodongo, to moko nyalo dwaro kinde momedore mondo e ka gilok chunygi. Mano nyiso ni jodongo nyalo chano mondo girom gi Jakristo motimo richono diriyo kata mokalo mano. Samoro, bang’ romo mokwongo gi jodongo, Jakristono nyalo paro matut weche ma jodongogo onyise. Onyalo bolore kendo kwayo Jehova ng’wono. (Zab. 32:5; 38:18) Mano nyalo miyo e romo ma luwo, jarichono onyis chuny mopogore gi ma nonyiso mokwongo kendo olok chunye.

¹³ Mondo gikony jarichono olok chunye, jodongo biro keche kendo nyise ng’wono. Jodongo geno ni Jakristo motimo richo biro neno pek mar richone, kendo olok chunye. Bende, gilamo ni Jehova oguedh kinda ma gitimo mondo gikonye.—2 Tim. 2:25, 26.

14. En ng’ano mowinjore oyud pak sama jaricho oloko chunye moa e richo, to nikech ang’o?

¹⁴ Sama jaricho oloko chunye, ji duto bedoga mamor! (Luka 15:7, 10) En ng’ano mowinjore oyud pak e seche kaka mago? Be gin jodongo? Par ane gima Paulo nowacho e wi joricho. Nowacho kama: “Di po ka Nyasaye omiyo giloko chunygi gia e richo.” (2 Tim. 2:25) Omiyo Jehova, to ok dhano moro amora, e ma konyoga jaricho mondo olok pache kod yorene. Paulo lero gik mabeyo ma timorega bang’ ka ng’ato oseloko chunye moa e richo. Ng’atno nyalo medo ng’eyo adiera e yo matut kendo pache nyalo duogo, to mano nyalo miyo kik olwar e obadho mag Satan.

15. Ere kaka jodongo nyalo dhi nyime konyo jaricho moloko chunye?

¹⁵ Sama jaricho oloko chunye, komiti mar jodongo biro chano mondo gilime kinde ka kinde mondo gikonye kedo gi Satan kendo orie yorene. (Hib. 12:12, 13) En adier ni jodongo ok bi nyiso ji gima jarichono notimo. Kata kamano, ang’o ma gibiro nyiso kanyakla?

KWERO JARICHO “E NYIM JI DUTO”

16. Ka luwore gi 1 Timotheo 5:20, “ji duto” ma Paulo ne wuoyo kuomgi gin jomage?

¹⁶ Som 1 Timotheo 5:20. Paulo nondiko wechego ne Timotheo ma ne en jaduong’-kanyakla wadgi konyise gima nonego otim ne ‘joma nong’iyo gi timo richo.’ Ang’o ma notemo wacho? Paulo nowacho ni okwer jaricho e nyim “ji duto,” to ji duto ma nowuoyo kuomgi ne ok ochuno ni obed kanyakla mangima. Kar mano, jogo ne nyalo riwo joma nok ma nong’eyo richo ma jaricho notimo. Kuom ranyisi, joma noneno gima notimore kata joma jarichono nonyiso wachno. Jodongo biro tiyo gi rieko mondo ginyis joma kamago ni jarichono osekony mondo orie yorene.

17. Ka richo ma ng’ato otimo ong’ere ne jo kanyakla, kata nenore ni gibiro ng’eyo wachno bang’e, en ang’o monego oland ne kanyakla, to nikech ang’o?

¹⁷ Seche moko gima jaricho notimo nyalo bedo ni oseng’ere ne jo kanyakla kata ginyalo ng’eyo wachno bang’e. E chal kaka mano, “ji duto” miwuoye e 1 Timotheo 5:20 en kanyakla mangima. Kuom mano, jaduong’-kanyakla biro lando ni ng’at ma kamano osemi siem kata osekwer kuom timbene maricho. Nikech ang’o? Paulo dwoko penjono kama: “Mondo mano obed siem ne jomamoko.”

18. Sama nyathi mosebatisi otimo richo maduong’, ang’o ma jodongo biro timo? (Ne picha bende.)

¹⁸ To nade nyithindo mosebatisi ma pok ochopo higni 18 motimo richo maduong’? Bura mar jodongo biro chano mondo jodongo moko ariyo orom gi nyathino kod jonyuolne ma gin Jokristo.b Jodongogo biro temo nono okenge ma jonyuolgo osekawo mondo gikony nyathino olok chunye. Ka jodongo ariyogo oneno ni nyathino orwako kony ma jonyuolne miye kendo otimo lokruoge ma dwarore, ginyalo ng’ado mondo giwe wachno e lwet jonyuolne, kendo ni onge tiende loso komiti mar jodongo. Ging’eyo ni Jehova omiyo jonyuol ting’ mar rieyo nyithindgi kendo tayogi e yor hera. (Rap. 6:6, 7; Nge. 6:20; 22:6; Efe. 6:2-4) Kinde ka kinde, jodongo biro wuoyo gi jonyuol nyathino mondo gine ka be nyathino yudo kony ma dwarore. To nade ka nyathi mosebatisno otamore loko yorene? E chal ma kamano, komiti mar jodongo biro romo gi nyathino kod jonyuolne kata Janeno modak kode.

“JEHOVA OGUNDHO GI HERA MATUT KENDO OKECHO JI”

19. Ere kaka jodongo temoga matek mondo giluw ranyisi mar Jehova sama gikonyo jaricho?

¹⁹ Komiti mar jodongo nigi ting’ mar neno ni kanyakla mar Jehova osiko ka ler. (1 Kor. 5:7) Jodongo timoga duto ma ginyalo mondo gikony jaricho olok chunye ka mano nyalore. Omiyo, kinde duto ma gitemo konyo jaricho, gigeno ni gikone obiro loko chunye. Nikech ang’o? En nikech gidwaro ni giluw ranyisi mar Jehova “[mogundho] gi hera matut kendo okecho ji.” (Jak. 5:11) Ne ane kaka jaote Johana nonyiso chuny ma kamano. Nondiko kama: “Nyithinda matindo, koro andikonu wechegi mondo kik utim richo. To ka ng’ato otimo richo, wan gi jakony moa kuom Wuoro, ma en Yesu Kristo, ng’at makare.”—1 Joh. 2:1.

20. Ang’o ma wabiro nono e sula mogik ma yudore e gasedni?

²⁰ Gima lit en ni seche moko Jakristo motimo richo tamorega loko chunye. Ka en kamano, nyaka gole e kanyakla. Ang’o ma jodong-kanyakla biro timo e chal ma kamano? Wabiro nono wachno e sula mogik ma yudore e gasedni.