‘Luong Jodongo’

1. Jehova osenyiso nade ni ogeno jotichne?

JEHOVA ohero jotichne ahinya kendo ogenogi mana kaka jakwath ogeno rombene. Nong’iewogi gi remb Yesu kendo oketo jodong-kanyakla mondo orit kuethne owuon. (Tich 20:28) Nyasaye dwaro ni mondo orit rombene e yo maber kendo mang’won. Jodongo luwo ranyisi mar Yesu kuom jiwo owete gi nyimine kendo konyogi dhi nyime makore gi Jehova.—Isa. 32:​1, 2.

2. Gin jomage ma Jehova dewo ahinya? (Ezekiel 34:​15, 16)

² Jehova ogeno rombene duto kendo odewo ahinya jotichne mohinyore. Moko kuom rombene osehinyore nikech gituo e yor chuny kendo otiyo gi jodong-kanyakla e konyo joma kamago. (Som Ezekiel 34:​15, 16.) Kata kamano, odwaro ni wamany kony sama dwarore ni watim kamano. E kinde kaka mago, dwarore ni walem mondo Jehova okonywa, kae to wamany kony kuom “jokwath kendo jopuonj” manie kanyakla.—Efe. 4:​11, 12.

3. Ng’eyo migawo ma jodongo nigo nyalo konyowa nade?

³ E sulani, wabiro nono kaka Nyasaye tiyoga gi jodong-kanyakla e konyo joma tuo e yor chuny. Wabiro yudo dwoko mag penjogi: Gin kinde mage monego wakwaye jodongo kony? Ang’o momiyo onego watim kamano? To ere kaka gikonyowa? Kata ka po ni sani wan gi winjruok maber gi Nyasaye, dwoko mag penjogi biro konyowa neno kaka Jehova tiyoga gi jodongo e konyowa kod kaka wanyalo yudo kony ma gichiwo.

GIN KINDE MAGE MONEGO ‘WALUONGIE JODONGO’?

4. Ang’o momiyo wanyalo wacho ni Jakobo 5:​14-16, 19, 20 wuoyo e wi ng’at ma tuo e yor chuny? (Ne pichni bende.)

⁴ Jakobo nochako wuoyo e wi chenro ma Jehova tiyogo e konyowa e yor chuny kopenjo kama: “Be nitie ng’at ma tuo e kindu? Oluong jodongo.” (Som Jakobo 5:​14-16, 19, 20.) Weche molworo ndikono nyiso ni Jakobo wuoyo kuom ng’at ma tuo e yor chuny. Mano e momiyo ndikoni nyiso ng’at ma tuono ni oluong jodongo to ok laktar. Bende, Jakobo nowacho ni ng’at ma tuono nyalo chango ka owene richone. Nitie kaka yo ma laktar thiedhogo ng’at ma tuo chalrega gi yo ma jodongo konyogo ng’at motimo richo. Sama watuo, wadhiga ir laktar kendo wanyise kaka wawinjo kae to watiyo gi paro momiyowa mondo wachangi. E yo kamano bende, ka watuo e yor chuny, onego wadhi ir jodongo, walernegi gik motimore, kendo wati gi puonj mag Muma ma gimiyowa.

5. Ang’o ma nyalo konyowa ng’eyo ka be winjruokwa gi Jehova osedok chien?

⁵ Jakobo sula mar 5 nyisowa ni wadhi ir jodongo sama waneno ka winjruokwa gi Jehova ochako dok chien. Kata kamano, ber wuoyo gi jodongo ka pok watimo gima nyalo miyo walal osiep ma wan-go gi Jehova. Ok onego wawuondre. Ndiko siemowa ni nyaka watang’ mondo kik wapar ni wan gi winjruok maber gi Jehova to kare ok en kamano. (Jak. 1:22) Moko kuom Jokristo ma ne nie kanyakla mar Sarde ne paro ni gin gi winjruok maber gi Jehova. Kata kamano, Yesu nonyisogi ni ne giwuondore. (Fwe. 3:​1, 2) Yo achiel ma wanyalo ng’eyogo kaka winjruokwa gi Jehova chalo en nono ka be pod wahero adiera kaka ne wahere e kinde mokalo. (Fwe. 2:​4, 5) Wanyalo penjore kama: ‘Dibed ni siso ma ne an-go mar somo Muma kod paro matut osedok chien? Be pod aikoga chokruoge duto kendo dhi e chokruogego ma ok abara? Dibed ni tinde ok ahero tij lendo? Dibed ni atiyo gi thuolo mang’eny ahinya e manyo mor kod mwandu?’ Ka po ni idwoko penjo moro amora kanyo ni ee, mano nyiso ni onego itim lokruok mapiyo ka pok weche okethore ahinya. Ka po ni ok wanyal loso wachno kendwa kata ka wasetimo gima nyalo ketho winjruokwa gi Jehova, onego wakwa jodong-kanyakla mondo okonywa.

6. Ng’at motimo richo moro maduong’ onego otim ang’o?

⁶ Ng’at motimo richo maduong’ ma nyalo miyo ogole e kanyakla onego owuo gi jodong-kanyakla. (1 Kor. 5:​11-13) Ng’at ang’ata motimo richo moro maduong’ nyaka kony mondo obed gi winjruok maber gi Jehova kendo. Mondo Jehova ong’won ne ng’at motimo richo, nyaka ‘otim gik ma nyiso ni oseloko chunye’ gadier. (Tich 26:20) Gigo oriwo nyiso jodong-kanyakla ni osetimo richo moro maduong’.

7. Gin jomage ma bende onego omany kony kuom jodong-kanyakla?

⁷ Mopogore gi konyo joma otimo richo madongo, jodong-kanyakla bende konyoga joma winjruokgi gi Jehova osechako dok chien. (Tich 20:35) Kuom ranyisi, inyalo yudo ka tekni kwedo gombo moro kata tim moro marach ma ne iseloyo ka ne pok ibedo Jakristo. Moko kuom timbego nyalo bedo tiyo gi yedhe ma mero ji, ng’iyo ponografi, kata timo timbe maricho mag terruok. Ka en kamano, kik iluor kwayo kony. Inyalo wuoyo gi jaduong’-kanyakla moro ma biro chikoni ite maber, miyi paro ma nyalo konyi, kendo konyi bedo gadier ni sama ikwedo gombo moro marach to imoro chuny Jehova. (Ekl. 4:12) Ka po ni chunyi osenyosore nikech gombo maricho ma in-go, jodong-kanyakla biro konyi ng’eyo ni mano nyiso ni ikawo winjruokni gi Jehova mapek kendo ni ok igenori iwuon.—1 Kor. 10:12.

8. Be ochuno ni wadhi ir jodong-kanyakla sa asaya ma waketho? Ler ane.

⁸ Ok ochuno ni wadhi ir jodong-kanyakla e wi ketho duto ma watimo. Kuom ranyisi, nitie seche moko ma iwa nyalo wang’ mi wa po ka wanyiso Jokristo wetewa weche ma chwoyo chunygi. Kar dhi wuoyo gi jodongo e wi wachno, inyalo tiyo gi puonj ma Yesu nochiwo kendo dhi loso kuwe gi Jakristo waduno. (Mat. 5:​23, 24) Bende, mondo kik ilwar e obadho ma kamano e kinde ma biro, inyalo timo nonro mondo ing’e kaka inyalo bedo gi kido mar muolo, horuok, kod ritruok. Kata kamano, ka loso kuwe gi Jakristo waduno otami, inyalo kwayo kony kuom jaduong’-kanyakla moro. Ka ne jaote Paulo ndiko ne Jo-Filipi, nokwayo owadwa moro ma ok owach nyinge mondo okony Yuodia gi Suntuke loso kuwe e kindgi. Mano bende e gima jodong-kanyaklau nyalo konyi timo.—Fil. 4:​2, 3.

ANG’O MOMIYO ONEGO WALUONG JODONGO?

9. Ang’o momiyo ok onego wayie mondo wich-kuot omonwa luongo jodongo? (Ngeche 28:13)

⁹ Dwarore ni wabed gi yie kod chir mondo wakwa kony sama watimo richo moro maduong’, kata sama waneno ka nyawo moro ma wan-go chiegni loyowa. Ok onego wayie mondo wich-kuot omonwa luongo jodongo. Nikech ang’o? Sama waluwo chenro ma Jehova oketono, wanyiso ni wagene kendo wageno chike moketo mondo okonywa chung’ motegno e yie. Wanyiso ni wan gadier ni obiro konyowa ka pok walwar e obadho. (Zab. 94:18) Ka watimo richo, Jehova biro kechowa ka waloko chunywa gadier kendo weyo richowa.—Som Ngeche 28:13.

10. Ang’o ma nyalo timore ka watemo pando richo ma watimo?

¹⁰ Ka wanyiso jodong-kanyakla richo ma watimo kendo weyogi, Jehova biro weyonwa kendo yie mondo wabed gi winjruok maber kode kendo. Kata kamano, ka watemo pando richowa, to weche biro mana medo kethore. Ka ne Ruoth Daudi otemo pando richone, winjruokne gi Jehova nomedo kethore, nobedo matuo, kendo chunye nonyosore ahinya. (Zab. 32:​3-5) Mana kaka tuo nyalo medore ka ok othiedhi, e kaka winjruokwa gi Jehova nyalo medo kethore ka ok wakawo okenge ma dwarore. Jehova ong’eyo wachno, to mano e momiyo ojiwowa ni “walos weche” kode kokalo kuom jodong-kanyakla.—Isa. 1:​5, 6, 18.

11. Ang’o ma nyalo timore ka ok wanyiso jodong-kanyakla richo moro maduong’ ma watimo?

¹¹ Ka ok wanyiso jodongo richo maduong’ ma watimo, wanyalo hinyo jomamoko. Wanyalo mono roho maler mar Jehova bedo e kanyakla kendo ketho kuwe manie kind owete gi nyimine. (Efe. 4:30) Kamano bende, ka wafwenyo ni Jakristo wadwa moro otimo richo maduong’, onego wajiwe mondo owuo gi jodong-kanyakla e wi wachno.a Ka watemo pando richo mar ng’at machielo, wan bende ikwanowa ka joricho. (Lawi 5:1) Hera ma waherogo Jehova onego ochwalwa mondo wahul richono. Ka watimo kamano, to wamiyo kanyakla siko ka ler kendo wakonyo jarichono mondo olos winjruokne gi Jehova.

ERE KAKA JODONG-KANYAKLA KONYOWA?

12. Ere kaka jodong-kanyakla konyoga joma osedok chien e weche Nyasaye?

¹² Muma chiko jodongo ni gikony joma winjruokgi gi Nyasaye osedok chien. (1 The. 5:14) Ka po ni itimo richo moro, ginyalo penji penjo moko mondo ging’e paro manie chunyi kod kaka iwinjo. (Nge. 20:5) Inyalo miyo tijgi obed mayot ka ibedo thuolo kodgi kata ka po ni ok yotni timo kamano nikech kaka nipon, kiti, kata wich-kuot. Kik iluor ni inyalo ‘rikni wuoyo’ ma ipo kiwacho gimoro marach. (Ayub 6:3) Jodongo ok bi rikni ng’ado bura, kar mano, gibiro chiko itgi mondo ging’e weche duto ka pok gimiyi paro ma nyalo konyi. (Nge. 18:13) Ging’eyo ni rito kueth en gima dwaro thuolo, to mano e momiyo ginyalo wuoyo kodi nyadinwoya mondo gikonyi loso winjruokni gi Jehova.

13. Ere kaka jodongo nyalo konyowa kokalo kuom lamo kod Ndiko? (Ne pichni bende.)

¹³ Sama iluongo jodongo, gibiro temo matek mondo kik gimi chunyi omed chandore. Kar mano, gibiro lemo e loyi. Jehova biro winjo lamo margi to mano biro tegi kendo hoyi e yo ma ok ipar kata nikech lamogi “nigi teko.” Kony ma gibiro miyi oriwo ‘wiri gi mo e nying Jehova.’ (Jak. 5:​14-16) ‘Morno’ ochung’ ne adiera manie Wach Nyasaye. Jodongo biro tiyo gi Muma mondo gihoyi kendo konyi mondo ichak ibed gi winjruok maber gi Jehova. (Isa. 57:18) Ndiko ma gibiro somoni biro jiwi mondo ichung’ motegno kendo idhi nyime timo gik makare. Jodongo nyalo konyi mondo iwinj dwond Jehova ka nyisi niya: “Ma e yo, luwe.”—Isa. 30:21.

14. Ka luwore gi Jo-Galatia 6:​1, ere kaka jodongo nyalo konyo ng’at ma ‘ochomo yo ma ok kare’? (Ne pichni bende.)

¹⁴ Som Jo-Galatia 6:1. Sama Jakristo moro ‘ochomo yo ma ok kare,’ mano nyiso ni osechako timo gik ma ok winjre gi chike makare mag Nyasaye. Yo ma ok kareno nyalo bedo yiero moro marach kata richo moro maduong’. Hera e ma chwaloga jodong-kanyakla mondo ‘gitem rieyo ng’at ma kamano gi chuny mamuol.’ E dho Grik, wach motigo e ndikono ni “rieyo” bende itiyogo kiwuoyo kuom duoko chogo moro motur mondo ochang maber. Laktar molony biro temo ahinya mondo sama oduoko chogo moro motur, kik omed ng’atno rem. E yo ma chalo kamano, sama jodongo rieyo jaricho, gitemoga mondo kik gimedne lit, kar mano, gitimoga duto ma ginyalo mondo girie ng’atno e yo mamuol. Ndikono bende jiwo jodongo ni gin bende ‘gitang’.’ Sama jodongo konyowa mondo warie yorewa, gin bende onego ging’e ni girem kendo ginyalo timo richo. Mano miyo ok gikawre ka joma kare moloyo jarichono, kar mano, gibolore kendo gidewe ahinya.—1 Pet. 3:8.

15. Ang’o ma wanyalo timo sama wach moro chandowa?

¹⁵ Wanyalo geno jodong-kanyakla nikech osetieggi kano weche ma ling’ ling’, chiwo paro ka gitiyo gi Muma kar tiyo gi pachgi giwegi, kendo konyowa mondo wanyagre gi pek ma wan-go. (Nge. 11:13; Gal. 6:2) Lony kod kido ma gin-go opogore opogore, kata kamano, wanyalo bedo thuolo wuoyo gi jaduong’-kanyakla moro amora e wi wach ma chandowa. En adier ni ok wabi wuoyo gi jaduong’ achiel bang’ machielo ka watemo manyo jaduong’ ma biro nyisowa gima wagombo winjo. Ka watimo kamano, to wabiro chalo joma gombo winjo “weche ma moro mana itgi” kar winjo “puonj mangima” manie Wach Nyasaye. (2 Tim. 4:3) Sama wawuoyo gi jaduong’ moro e wi wach ma chandowa, onyalo penjowa ka be wasewuoyo gi jodongo mamoko e wi wachno kod ka be ne gimiyowa paro moko. Bende, nikech ong’eyo ni orem, onyalo kwayo jaduong’ machielo paro e wi wachno.—Nge. 13:10.

TING’ MA WAN-GO

16. En ting’ mane ma wan-go?

¹⁶ Kata obedo ni Jehova oketo jodongo mondo oritwa, ok ginyal timonwa yiero. Wan gi ting’ mar dak ka luwore gi chike mag Nyasaye. Ng’ato ka ng’ato biro chiwo dwoko ne Nyasaye ka luwore gi wechene kod timbene. Jehova nyalo konyowa mondo watim yiero mabeyo kendo wamakre kode. (Rumi 14:12) Mano e momiyo jodongo tiyoga gi Muma e nyisowa paro ma Nyasaye nigo, kar nyisowa gik monego watim kod ma ok onego watim. Sama watiyo gi paro ma gimiyowa, watiego ‘nyalowa mar ng’eyo tiend weche,’ kendo mano konyowa timo yiero mabeyo.—Hib. 5:14.

17. Ang’o monego wang’ad e chunywa ni wabiro timo?

¹⁷ To mano kaka wan gi thuolo makende mar bedo e kueth mar Jehova! Nooro Yesu ma en “jakwath maber,” mondo obi othonwa kendo wayud thuolo mar dak nyaka chieng’. (Joh. 10:11) Jehova bende osemiyowa jodongo ma ritowa e kanyakla mana kaka nosingo niya: “Anamiu jokwath ma moro chunya, mi ginipidhu gi ng’eyo kod rieko.” (Jer. 3:15) Omiyo, sama yiewa ochako dok chien kata watimo richo moro maduong’, ok onego waluor luongo jodong-kanyakla mondo okonywa. Wang’aduru e chunywa ni wabiro dhi nyime yudo ber chuth kuom mich ma Jehova osemiyowago.