Kaka Inyalo Dak e Ngima Maber Gie Sani

PAR ane ni idak e piny ma ji ok tuoree, ji ok bed moti, kendo ok githo. Mano en gima biro nyalore! Gie sani to piny opong’ gi chandruok. Ere kaka inyalo dak e ngima maber kata mana gie sani? Muma oting’o puonj ma kiluwo to inyalo dak e ngima maber. Ne ane moko kuom pek ma wabedogago kod kaka Muma nyalo konyowa nyagore kodgi.

DAK KA GIK MA WAN-GO ROMOWA

Puonj ma Muma chiwo: “Kit ngimau mondo kik obed mar hero pesa, to ubed joma gik ma un-go sani romou.”—Jo-Hibrania 13:5.

E piny ma sani, nitie gik mang’eny ma ji wacho ni nyaka wabedgo. Muma to wacho ni ‘gik ma wan-go sani onego oromwa.’ Mano nyalore nade?

Kik ‘iher pesa.’ Ji oyie ketho ngimagi, odgi, osiep ma gin-go gi jomoko, kata nyinggi mana nikech “hero pesa.” (1 Timotheo 6:10) Mano gima ok onego otimre kata matin! Adiera en ni pesa ok nyal romo ng’at mohero pesa.—Eklesiastes 5:10.

Her ji, to ok mwandu. En adier ni mwandu nyalo konyowa; kata kamano, mwandu ok nyal herowa kata dewowa. Dhano e ma nyalo timonwa kamano. Ka wan gi osiepe madier, gibiro jiwowa mondo gik ma wan-go sani oromwa aroma.—Ngeche 17:17.

WANYALO DAK E NGIMA MABER GIE SANI KA WALUWO PUONJ MAG MUMA

NYAGRUOK GI TUOCHE

Puonj ma Muma chiwo: “Chuny mamor chal gi yath maber.”—Ngeche 17:22.

Bedo gi chuny ma mor nyalo bedonwa kaka “yath maber” nikech onyalo konyowa nyagore sama watuore. Kata kamano, ere kaka wanyalo bedo ma mor sama watuore?

Bed ng’at ma goyo erokamano. Ka waketo pachwa ahinya e chandruogewa, ‘ndalowa duto’ biro bedo marach. (Ngeche 15:15) Kar timo kamano, Muma jiwowa ni wabed joma nyiso “chuny mar goyo erokamano.” (Jo-Kolosai 3:15) Puonjri neno gik mabeyo ma timore e ngimani kata gibed matindo manade. Kuom ranyisi, sama waneno ka chieng’ podho, yamo kudho maber, kata waneno ng’at moro ma wahero ka bwonjo kodwa, mano nyalo miyo wabed ma mor.

Tim gik ma konyo jomamoko. Kata ka watuo, pod “chiwo kelo mor mogundho moloyo kawo.” (Tich Joote 20:35) Sama jomoko goyonwa erokamano nikech gik ma watimonegi, mano miyo wabedo ma mor kendo koro ok waket pachwa ahinya kuom chandruogewa. Adier, sama wamiyo ngima jomoko dhi maber, wan bende ngimawa dhi maber!

MIYO KEND OBED MOTEGNO

Puonj ma Muma chiwo: “Uyang gadier gik ma dwarore moloyo.”—Jo-Filipi 1:10.

Joma ni e kend ma ok kaw thuolo mar budho kanyachiel nyalo miyo kend margi kik dhi maber. Dichwo gi dhako onego one kend margi kaka gima duong’ ahinya, nikech kendgino en achiel kuom gik ma dwarore moloyo e ngimagi.

Timuru gik moko kanyachiel. Kar mondo ng’ato ka ng’ato otim gik moko ka en kende, chanuru mondo ubedie gi thuolo mag timo gik moko kanyachiel. Muma wacho niya: “Jariyo oloyo achiel gi ber.” (Eklesiastes 4:9) Unyalo tedo kanyachiel, dhi bayo kanyachiel, limo osiepe ka un kanyachiel, kata neno sinema moro ma uhero.

Timuru gik ma nyiso ni uheroru. Muma jiwo dichwo gi dhako mondo giherre kendo gimire luor. (Jo-Efeso 5:28, 33) Bwonjo gi jaodi, kwake, kata nyiewone mich moro nyalo tego kend maru. Ber ng’eyo ni jaodi kende e ma onego ibedgo e achiel.—Jo-Hibrania 13:4.

“GIKONE NANG’EYO KUMA NGIMANA OCHOMO!”

—Kaka Iwachonwa gi Ryoko Miyamoto ma Wuok Japan.

Ngima ne ok dhi kodwa maber. Chwora ne madho kong’o aduwa kendo nosiko koketho aketha tich. Ne oweyo rito nyithindwa ang’wen e yo mowinjore. Kata obedo ni natemo tiyo matek ahinya, weche ne odhi nyime bedo maricho. Nasiko ka apenjora ni: ‘Dibed ni mae e ngima ma nochanna are chon, koso dibed ni Nyasaye chwada nikech richo ma natimo e ngima moro machon ka pok nonyuola kaka dhano?’

Chieng’ moro, Janeno moro mar Jehova nobiro e oda. Nowuoyo gi ilo kolerona weche Pinyruodh Nyasaye kod ngima mochwere mosing ne dhano. Nochiwore puonja Muma. Nachako fwenyo ni kare Nyasaye nitie kendo ni Nyasaye riek, ohero tim makare, kendo ojahera. Napuonjora bende ni jomotho ok ong’eyo gimoro amora. Bende, namor ng’eyo ni kare chandruok ma ne an-go ne ok ochanna are chon.

To moloyo duto, nafwenyo ni ng’ato nyalo bedo gi ngima maber mana kobedo osiep Nyasaye. Ng’eyo adiera ma ni e Muma osejiwa, osemiyo abedo thuolo, kendo oseduogo chunya ahinya. Gikone nang’eyo kuma ngimana ochomo!