Sandug Penjo

◼ Seche ma okwa kanyakla mondo okony e chenro mar yik, penjo maluwogi nyalo betie:

Ng’ano monego ogol twak mar yik? Mani en gima joot ema onego oyier. Ginyalo yiero owadwa moro amora mosebatisi ma nigi nying’ maber. Kapo ni okwa jodong-kanyakla mondo oyier jagol twak, gibiro yiero owadwa ma en jaduong’ mong’eyo golo twak e yo maber kotiyo gi twak ma Ofis ochiwo. Kata obedo ni ok obi pako jal mothono ahinya, pod nyalo bedo gima ber ka jagol twak owuoyo kuom kido mabeyo ma ng’at mothono ne nigo.

Be Inyalo ti kod Od Romo? Ee, mana ka jodong-kanyakla ochiwo thuolo, kendo ka timo kamano ok bi mono kanyakla bedo gi chokruok mosechan. Inyalo ti kod Od Romo ka ng’at mothono nyinge ne ber, kendo ne en jakanyo mar kanyakla, kata ka en nyathi owadwa kata nyaminwa ei kanyakla. Kapo ni ng’at mothono ne en ng’at ma timbene richo ahinya, kata kapo ni nitie gik mamoko manyalo chido nying’ kanyakla, jodongo nyalo ng’ado mondo kik ti kod Od Romo.−Ne bug Tengenezo ite mar 42 kod 122.

Pile, Utewa mag Romo ok timie nyasi mag yik mar joma ok gin jotich Jehova. Mana kapo ni joot modong’ gin jolendo mosebatisi, momakore gi kanyakla, kendo ka jal mothono ne ong’ere gi joma nie kanyakla kaka ng’at mohero adiera kendo ma timbege beyo e alwora, inyalo ti kod Od Romo tek mana ni, ok kik timbe mag piny e programno.

Seche ma jodong-kanyakla yie mondo oti kod Od Romo, ginyalo neno kabe rwako sanduk moting’o kitundu e Od Romo en gima owinjore gi alworano. Ka en kamano, ginyalo yie mondo orwak sandugno.

To nade nyasi mag yiko jo ma ok gin jatich Jehova? Kapo ni ng’at mothono ne nigi nying’ maber e alworano, owadwa moro nyalo chiwo twak mowuok ei Muma, mahoyo ji sa yik. Kanyakla ok bi yie yiko ng’at ma timbene ong’ere ni ne richo, kata ma kit ngimane ne ok owinjore chuth gi puonj mag Muma. Kuom adier, owadwa moro amora ok bi riwore gi jatend din moro e golo twak mar yiko ng’ato, kata riwo lwedo yik moro amora mitimo e kanisa mar Babulon Maduong’.

To nade ka ng’at mothono ne osegol ei kanyakla? Kanyakla ok bi yiko ng’atno. Od Romo ok bi ti godo. Kapo ni ng’atno nosebedo kanyiso ni otimo lokruok, kendo nyiso ni ogombo mondo odwoke, chuny owadwa moro nyalo yie mondo ochiw twak mar yik mowuok ei Muma, kochiwo godo neno ne joma ok gin jotich Jehova, kendo kohoyo godo wede ng’at mothono. Kata kamano, kapok ong’ado mar timo mano, owinjore owadwano openj jodong-kanyakla kendo oket e paro weche ma ginyise. Kapo ni oyud ni owadwano ok owinjore ogol twagno, nyalo bedo maber ka owadwa machielo ma en wat ng’at mothono ema mondo ochiw twak mihoyogo wede mantie.

Weche mamoko manyalo chikowa inyalo yud e Watchtower mag Oktoba 15, 1990, ite mag 30-31; Septemba 15, 1981, ite mar 31; Mach 15, 1980, ite mag 5-7; Jun 1, 1978, ite mag 5-8; Jun 1, 1977, ite mag 347-348; Mach 15, 1970, ite mag 191-192; kod Awake! mar Septemba 8, 1990, ite mag 22-23 kod Mach 22, 1977, ite mag 12-15.