Sandug Penjo
◼ En ng’a monego oriw joma kendore kata golo twak mar yik?
Gaset mar Ohinga mar Jarito ma Desemba 1 higa mar 1975 (e dho Igresa), nolero ni jodong-kanyakla gi jokony-tich ema owinjore oluong ni “jotich mopwodhi” mana kaka osebed ka iluongogi. Kapo ni chik mar piny moro, kata chik mar kaunti, kata chik mar oganda moro dwaro ni kend nyaka riw mana gi jatend din (bedni en-gi “barua” moa ka sirkal kata “nyinge nie list” mar joma sirkal oyienegi riwo kend kata ma “opwodh” gi din), to owete kende ma “opwodhi” kata (moketi) kaluwore gi Ndiko (jodong-kanyakla kata jokony-tich) mondo oti e kanyakla, ema owinjore riwo kend. (Wach mar kabe joma ne riwo kend chon ne owinjore kata ooyo ok onego ochand pachwa.)
Onego wanon gima chike mag piny ma wadakie wacho e wi wach riwo kend, kendo luwo chikego. Wakwayou ni kik undik ne ofis barua ka upenjo wach chikego, nikech ofis onge gi chike mag pinje kata kaunti mopogore opogore e wi wach riwo kend.
Kapo ni joma dwaro kendore diher ni owadwa moro ma en ranyisi maber ema ogolnegi twak mar kend, to owadwano ok en jaduong’-kanyakla kata jakony-tich, inyalo tim chenro mondo owadwano ogol agola twak mar kend, kae to bang’e, jaduong’-kanyakla kata jakony-tich mowinjore kendo ma chik oyiene riwo kend, ema biro tayo sama joma dwaro kendorego singore. Gima miyo ineno kend kaka gima opwodhi en singruok ma joma kendorego timo.
Komiti matayo tij kanyakla ema pwodho kabe ibiro ti gi Od Romo e riwo kend. (Ne Tijwa mar Pinyruoth ma Jun 1975 [e dho Ingresa], “Sandug Penjo.”)
Wach golo twak e yik to opogore gi wach riwo kend. Onge chik ma lero ni en ng’a mowinjore ogol twak mar yik. Kinde mang’eny, jood ng’ama othono ema biro yiero owadwa ma en ranyisi maber mondo ogol twak mar yik. Mano en yiero margi kendo en chenro margi giwegi. Ok ochuno ni nyaka owadwa ma joodno oyiero obed “jatich mopwodhi,” kata kaluwore gi Ndiko, en “jatich moyier kata moketi” e kanyakla.