Barua Mowuok Kuom Bura Maduong’
Ni Owete gi Nyimine ma Wahero:
Mana kaka Yesu ne timo, walamo Nyasaye gi chunywa duto niya: “Nyingi mondo obed maler.” Wanyiso ni wagombo ahinya mondo kwayowani ochop kare, kaluwore gi yo ma wadakgo kaka Joneno mag Jehova. En adier ni dwarore mondo wang’e mathoth kuom Nyasaye moloyo ng’eyo mana ni nyinge en Jehova. Nyaka wati gi thuolo duto ma wan-go mondo wami nyingno duong’. Kuom adier, onge gweth maduong’ ma ng’ato ang’ata kuomwa nyalo bedogo maloyo bedo ni iluongowa ni Joneno mag Jehova.—Math. 6:9; Isa. 43:10.
Kaluwore gi Zaburi 110:3, oganda Jehova ochiwore tiyo tich ma Jehova osewacho ni nyaka tim. Ang’o momiyo joma dongo gi matindo mowuok kuonde mopogore opogore tiyo gi teko ma gin-go e tij lendo? Gima duong’ momiyo, en nikech gihero Nyasaye kendo ng’ato ka ng’ato kuomgi osechiwore ne Nyasaye. Rapar mar Chik 6:5, 6, chikowa ni mondo waher Jehova ‘gi chunywa duto, gi pachwa kendo gi tekowa duto.’ Herani mawuok e chunywa, jiwowa mondo wati gi thuolowa, tekowa kaachiel gi mwanduwa e riwo lwedo Pinyruodh Nyasaye, to achiel kuom yore mag timo kamano, en tiyo tij lando Wach Nyasaye e okang’ malach kaluwore gi nyalo marwa.
Nikech Jehova ohero dhano, mano e gimomiyo ogolo chik mondo wach maber mar Pinyruodhe oland kuonde duto e piny mangima. Ok odwar mondo ng’ato otho, to odwaro ni ji duto olok yoregi maricho kendo gidwog ir Jachwechgi mondo giyud ngima. (2 Pet. 3:9) Jehova wacho kama: “Ok amor ka ng’a marach otho; to adwaro mondo ng’a marach olokre oa e yore obedi mangima.” (Ezek. 33:11) Seche ma watiyo tij lendo, wabedo ne dhano wetewa ranyisi manenore ratiro ni Jehova oherogi. Onge kiawa ni nyiso herano en achiel kuom gigo ma miyowa mor kod paro mokuwe seche ma watimo tich maduong’ni.
Hera ma waherogo Jehova ahinya, bende nenore e yo ma wakawo godo Wachne mondiki kuom muche, tiende ni Ndiko Maler. Dine bed ni Muma onge, dine ok wang’eyo Nyasaye mondo omi wasud ire kaka Jakobo 4:8 nyisowa mondo watim. Bende dikoro ok wang’eyo gimomiyo wadak e piny kae, kata ng’eyo gima biro timore e kinde mabiro. Dikoro ok wang’eyo ni kare chandruok magwa nochakore kowuok kuom kwarwa mokwongo ma en Adam. (Rumi 5:12) Bende dikoro ok wang’eyo hera maduong’ ma Nyasaye ne oherowago kane ochiwo Wuode ma miderma mondo obednwa rawar. To bende, Jehova tiyo gi yore mamoko mang’eny mondo okonywa wabed gi ng’eyo mar yorene, wabed gi rieko mowuok kuome, kaachiel gi nyalo mar winjo tiend weche. To mano kaka wadwokone erokamano kuom mich ma osemiyowa ma en Wachne mondiki kuom muche! Erokamano ma wagoyo kuom mich majaberni miyo wasomo, wapuonjore, kendo waparo matut kuom wachne ‘ma ok waketh kinde.’ (Efe. 5:15, 16; Luo NT, 2003 Zab. 1:1-3) Ok onego wane marach ni somo Wach Nyasaye pile ka pile en gima kawo thuolo mang’eny. Kar mano, hera ma wan-go kuom Nyasaye onego omi waher Wachne, mondo omi wamed ng’eye maber kendo wamed here ahinya.
Wasepuonjore kowuok e Muma ni kane Adam otimo richo ne Jehova, Adam ne orwako kothe duto ma ne dhi bedoe bang’e, moriwo nyaka ng’ato ka ng’ato kuomwa, e ngima marach miwuoro ma onge geno. Kata kamano, Nyasaye ne nyalo kendo nochiwo ne dhano yo miwuok godo e ngimano, kane okawo okang’ mar neno ni dwaro mare ne pinyni ne dhi chopo kare.—Chak. 3:15.
Onge kiawa ni ng’ato ka ng’ato kuomwa nigi gombo ahinya mar keto nying’ majaber mar Nyasachwa obed maler. Kaka wamedo ng’eyo ber miwuoro mar Jehova Nyasaye, e kaka chunywa medo riwe lwedo kaachiel gi riwruok mar oganda mare mondo nyinge maduong’no koda dwaro mare omed ng’ere. Wabedo gi adier ni oyie kodwa kendo ogwedhowa sani, kendo obiro miyowa ngima mochwere e piny manyien.
Wan kaka jokanyo mag Bura Maduong’, dwaher nyisou un owete gi nyimine ma wageno, ni waherou. Bende, dwaher dwokonu erokamano maduong’ kuom kinda ma unyiso e tiyo gi thuolo modong’ ka ‘masira maduong’no’ podi ok ochakore, mondo uchop ne ji mang’eny kaka nyalore gi wach maberni. (Fwe. 7:14) Kuom timo kamano, gin bende umiyogi thuolo kaka ma useyudo, thuolo mar ng’eyo Nyasaye kod Kristo ma en ng’eyo matero ji e ngima mochwere.—Joha. 17:3.
Wan Oweteu,
Bura Maduong’ mar Joneno mag Jehova