‘Hul Wach Nyasaye ma Ok Iluor’
1 Be seche moko inwang’o ka iluor wuoyo kuom yie mari ka omiyi thuolo mar timo kamano e skul kata kar tich? Be en gima tekni chiwo neno ne wedeni kod joma odak machiegni kodi e sama iwuoyo kodgi kata kiwuoyo gi jomoko ma ok ing’eyo? Ang’o manyalo konyowa waduto kawo thuolo mayudore mondo ‘wahul wach Nyasaye ma ok waluor’?—Fili. 1:14.
2 Kik Iluor: Ka odonjne osiepni kata watni man machiegni kodi gi ketho mar miriambo, be inyalo luor chung’ kore mondo ikwed miriambono? Kuom higini ma dhano osebetie e piny ka, osewuo marach kuom Jehova, ma en Osiepwa man machiegni moloyo. Wan kod thuolo makende mar bedo joneno mochung’ kor Nyasachwa maduong’! (Isa. 43:10-12) Ka wahero Jehova ahinya, mano nyalo konyowa kedo gi paro mag luoro kendo miyowa wawuo gi chir ma ok waluor chiwo neno e wi adiera.—Tich 4:26, 29, 31.
3 Ng’e ni ote ma walando en wach maber. Obiro kelo mor mosiko ne jogo ma winje. Ka waketo pachwa kuom ber mar tij lendo ma ok waket pachwa kuomwa wawegi kata kuom joma kwedowa, mano biro miyo walend ka wan gi chir.
4 Ranyisi mag Jomoko: Wanyalo jiwore kuom jogo ma ne ochung’ motegno e yiegi ka gihulo wach Nyasaye ma ok giluor. Kuom ranyisi, Enok nohulo gi chir bura ma ne Jehova ong’ado ne joricho ma ne ok oluoro Nyasaye. (Juda 14, 15) Noa ne olendo ma ok owe ne jogo ma ne ok dwar winjo. (Math. 24:37-39) Kata obedo ni Jokristo ma ne okwongo betie ne gin “ji ajia ma ok osomo,” ne gidhi nyime gi lendo kata obedo ni ne giyudo akwede mager. (Tich 4:13, 18-20, Luo, 1976) Ndalo mang’eny Mnara wa Mlinzi kod Amkeni! ting’o weche mag ngima jogo modak e kindewagi, ma ne oloyo paro mag luoro dhano ma gibedo jolendo ma nigi kinda nikech keto yie kuom Jehova.
5 Wanyalo jiwore kuom paro ngima jotich Nyasaye machon ma ne otiyo ne Nyasaye e bwo chandruok. (1 Ruo. 19:2, 3; Mari. 14:66-71) Ne ‘gitimo chir kuom Nyasaye’ ma giwuoyo ma ok giluor. Wan bende wanyalo timo kamano!—1 Thes. 2:2.