Ji Duto Nyalo Tiyo Tij Timo Jopuonjre Manyien
1 Japuonjre manyien ok bedie mana nikech kinda mar ng’ato achiel kende. Jehova nyalo tiyo kod joma gin ‘jotich kaachiel kode’ e konyo jopuonjre Muma mondo odong e Wachne. (1 Kor. 3:6-9) Waduto ng’ato ka ng’ato wakonyo jopuonjre manyien, ok mana kuom chiwo paro mowuok e chunywa sama wan e chokruogewa mag Jokristo, to bende kuom timbe mabeyo manyiso ayanga ni roho mar Nyasaye tiyo e ngimawa. (Joha. 13:35; Gala. 5:22, 23; Efes. 4:22, 23) Ang’o kendo ma inyalo tim mondo okony jopuonjre manyien?
2 Kaka Kanyakla: Waduto wanyalo nyiso ni wadewo jogo machako biro e chokruok, ka wakawo okang’ mokwongo mar mosogi gi mor kod wuoyo kodgi kapok chokruok ochakore koda bang’ chokruok. Kowuoyo kuom birone mokwongo e chokruok mar kanyakla, dichwo moro ne owacho kama: “E odiechieng’ achiel, ne aromo gi joma ne akiya chuth manyiso hera madier, joma ng’eny moloyo ma ne aseromogo e kanisa ma ne adongoe. Ne nenore ratiro ni ne aseyudo adiera.” Ne obatise dweche abiriyo bang’ birone mokwongo e chokruok.
3 Puo japuonjre Muma gi chuny madier kaka omedo timo dongruok e Wach Nyasaye. Be osebedo ka onano e bwo akwede? Be obiro e chokruok pile ma ok obare? Be osebedo gi chir mar chiwo paro e chokruok? Be osedonjo e Skul mar Tij Nyasaye kata chako tiyo tij lendo? Puoye kuom dongruok ma osetimo. Mano biro duogo chunye kendo biro jiwe.—Nge. 25:11.
4 Kaka Japuonjne mar Muma: Jolendo moko osekonyo jopuonjregi mag Muma mondo ong’ere gi jolendo mamoko e kanyakla, ka gigwelo jolendo mamoko mondo odhi kodgi e puonjruokno. Gwel japuonjre Muma mondo ochak biro e chokruoge mag kanyakla mapiyo kaka nyalore. E seche ma ochako biro e chokruok, ne ni ikonye ng’eyo jolendo mamoko. Be okedo mondo olo tim moro marach kaka mar madho ndawa? Be nitie ng’ato e odgi ma kwede mondo kik opuonjre Muma? Onyalo yudo kony kuom wuoyo gi jalendo ma bende ne osekedo ma oloyo chandruok machal gi mano.—1 Pet. 5:9.
5 Jopuonjre manyien dwaro jip e Wach Nyasaye koa kuom kanyakla. Ji duto ei kanyakla nyalo konyogi e timo dongruok ka ginyiso ni gidewogi gadier.