Wamor Tiyo Matek e Tij Jehova!
1 Jaote Paulo ne mor kuom ‘tiyo chutho’ mondo omi ochop migawone mar lendo kaka Jakristo. (2 Kor. 12:15) Kamano bende e ndalogi, Jokristo mang’eny tiyo matek kaka jo painia. Jomoko kuomgi ma nigi ting’ mapek mar rito joodgi, timo chenro kata obedo ni gidich mondo omi giti tij lendo juma ka juma. To moko ma nigi midekre machandogi ahinya, tiyo gi teko matin ma gin-go mondo giland wach Pinyruoth. Mano kaka en gima jiwo chuny neno oganda Jehova ka tiyone matek, gibed ni giti kata gin e chal moro amora!
2 Hero Dhano Wadwa: Timo duto ma wanyalo mondo omi wati ne Jehova, kendo nyiso Nyasaye koda dhano wadwa hera, miyo wabedo gi chuny maler. To nikech Paulo ne ochiwo chunye e lando wach maber, ne onyalo wacho gi mor kama: “E momiyo tinende ahulonu ni, aler kuom remb ji duto.” (Tich 20:24, 26; 1 Thes. 2:8) Tiyo tij lendo e okang’ ma wanyalo, biro miyo kik wabed gi buch remo.—Ezek. 3:18-21.
3 Tiyo matek mondo wakony jomoko en gima kelonwa mor. (Tich 20:35) Owadwa moro ne owacho niya: “En adier ni kochopo odhiambo, bang’ tiyo ne Jehova ma adok e ot, awinjo ka aol. Kata kamano, amor kendo aduoko ne Jehova erokamano kuom miya iilo ma onge ng’at manyalo mayago.”
4 Hero Nyasaye: Gima duong’ moloyo mamiyo watiyo matek e tij Jehova en nikech timo kamano moro Wuonwa manie polo. Hero Nyasaye jiwo chunywa mondo wamak chikene, moriwo nyaka lendo koda timo jopuonjre. (1 Joha. 5:3) Kata e kinde ma ji nyiso chuny ma ok odewo kata kwedowa, wan wadhi nyime tiyo matek ne Jehova gi iilo.
5 Magi ok gin kinde mag dok chien. Wadak e kinde mag keyo. (Math. 9:37) Kinde mathoth, japur tiyo gi seche mang’eny sa keyo nikech en gi kinde manok mar choko cham kapok chamgo okethore. Kinde mochiw mar tiyo tij keyo mar Nyasaye bende nok. Ka waketo e paro kinde ma wadakieni, waduto wadhi uru nyime gi tiyo matek e tij lendo.—Luka 13:24; 1 Kor. 7:29-31.