Walando ne Jomoko Geno Marwa mar Pinyruoth
1 E ndalo mag giko mopong’ gi chandruokgi, ji mathoth e piny onge geno. (Efes. 2:12) Jomoko ma ok riek oseketo genogi kuom mwandu, dhano ma joloch, sayans, kod gik mamoko. Mano kaka wan to wan gi mor kuom bedo gi geno madier mar kinde mabiro, geno ma “en kaka loch mogur ni chunywa; en loch ma ok gingni, ma omoko matek”!—Hibr. 6:19.
2 E bwo loch mar Pinyruodh Nyasaye, pinyni ibiro loki ma bed paradis. Jogo mwahero mosetho ibiro chiero. (Tich 24:15) Dhier, timbe ma ok kare, tuoche, tiyo, koda tho ok nobedie kendo. (Zab. 9:18; Math. 12:20, 21; Fwe. 21:3, 4) Magi gin moko kuom gigo ma Jehova osingo machiegni chopo. En singo mane ma in iwuon igombo neno ahinya ka chopo?
3 Land Wach Maber: Geno mar Pinyruoth ok en gima onego waling’ godo wawegi. Hero Nyasaye koda dhano wetewa miyo waluwo kaka Yesu notimo kane ‘oyalo Wach Maber ne jo modhier, . . . ka nohulo gony ne jo motue, kendo hulo yepo mar wang’ ne muofni, mondo ogony jo misando.’ (Luka 4:18) Jaote Paulo ne lando wach maber kuonde chirni koda kamoro amora ma ne ji yudore. Ne ochiwore ahinya ne tij lendo. (Tich 18:5) Luwo ranyisi mar kinda mare e lendo biro konyowa geng’o “parruok mag piny kod wuond mar mwandu,” mondo genowa mar Jokristo kik thung’.—Mari. 4:19.
4 Geno marwa mar Pinyruoth ok dog chien sama waromo gi joma ok dew, joma kawo wach Pinyruoth ka gima tin, kata ma kwedo ratiro. Wan ‘wamako matek genono mwahulo ma onge mindni.’ (Hibr. 10:23) ‘Wiwa ok kuodi nikech wach maberno.’ (Rumi 1:16) Nyalo bedo ni yie motegno koda sinani ma wan-go gikone biro chwalo jomoko mondo ochik itgi.
5 Kata obedo ni nyiso ji kaka piny masani kethore kaka Muma ne okoro en gima owinjore, wan ok waland mana wach kethruok kende. Mopogore gi mano, tijwa mar lendo jiwo ahinya genowa mar Pinyruoth—wach maber mar Pinyruodh Nyasaye. Mad wamed lando wach maberni ka wanyiso yie koda kinda motegno, nyaka chop ‘gi mwageno ochop chuth.’—Hibr. 6:11.