Kony Jopuonjre Mondo Onan e Bwo Akwede
1 Sama ji chako puonjore Muma ka ‘gidwaro doko jo modembore e Kristo Yesu,’ Satan timo kinda makende mar kwedogi. (2 Tim. 3:12) Akwede nyalo wuok kuom jotich wetegi, joma gisomogo, kata joma gidakgo machiegni. Nyalo bedo matek ahinya ka wede kwedo jopuonjre manyien ka giparo ni gikonyogi.—Math. 10:21; Mari. 3:21.
2 Akwede Ne Okor: Jopuonjre manyien nyaka ng’e ni sand en gima gibiro yudo, kendo mano en gima biro nyiso ni gin jopuonjre madier mag Kristo. (Joh. 15:20) Kinde moko, jomoko kwedowa nikech osenyisgi weche ma ok gin adier kuom Joneno mag Jehova. Wiyi kik wil ni mor maduong’ bedoe ka ji ochayi nikech in jalup Yesu, kendo iluwo chik Nyasaye. (Tich 5:27-29, 40, 41) Kony jopuonjre mondo gibed gi adier ni Jehova oikore mar konyogi. (Zab. 27:10; Mari. 10:29, 30) Chung’gi motegno miyo gibedo kor Jehova kuom wach ratiro ma en-go mar bedo Jaloch.—Nge. 27:11.
3 Kaka Ng’eyo Makare Konyo: Nyis jopuonjreni mag Muma ber mar dhi nyime ka gipuonjore, mondo gibed gi ng’eyo makare kata obedo ni giromo gi tembe. Satan tiyo gi akwede mondo omi gik ma gipuonjore kik gurore ei chunygi. (Nge. 4:23; Luka 8:13) Nyaka gidhi nyime gi puonjruok ng’eyo makare mar Wach Nyasaye eka gibiro gurore motegno e yie.—Zab. 1:2, 3; Kol. 2:6, 7.
4 Nano Dwarore: Ka ng’ato nie bwo tem moro amora, nano en gima dwarore kendo nyak mabeyo nyalo betie. (Luka 21:16-19) Ka jopuonjre manyien nano e bwo akwede, giyudo ber giwegi kaachiel gi joma moko bende. Giyudo ni Jehova gwedho e yo malach joma nano kochung’ motegno.—Jak. 1:12.
5 Jaote Paulo ne mor ahinya gi dongruok ma owetene ma ne ni Thessalonika notimo e wach Nyasaye. Nogoyo ne Nyasaye erokamano nikech owetego, ma ng’enygi en ema nokonyo yudo adiera. (2 Thes. 1:3-5) Wan bende wanyalo yudo mor ma kamano sama wakonyo jopuonjrewa mag Muma mondo oikore ne akwede kendo nano.