Kaka Onego Oti gi Bug “Hera mar Nyasaye” e Puonjruok gi Ji Muma
1. Ang’o momiyo ne ogo bug “Hera mar Nyasaye”?
1 Mano kaka ne wamor kuom nwang’o bug “Ritreuru e Hera mar Nyasaye” e Chokruog-Distrikt mar “Kuongozwa na Roho ya Mungu”! Mana kaka ne olandi, bugni ogo mondo okonywa ng’eyo kendo hero chike Jehova to ok mondo opuonj kode ji puonj michako ng’eyogo Muma. Ok wabi chiwo bugni e tij lendo mar ot ka ot.
2. Bugni ibiro tiyogo nade, kendo ibiro puonj kode jomage?
2 Bugni biro bedo mar ariyo mitiyogo e puonjruok gi ji Muma bang’ tieko buk mar Muma Puonjo. Ng’euru ni ji timo dongruok e wach Nyasaye e okang’ mopogore opogore. Onego otim puonjruok kaluwore gi nyalo mar japuonjre. Ne ni japuonjre owinjo maler tiend weche ma upuonjore. Bugni ok onego otigo e chako puonjruok mar Muma gi thoth ji mosepuonjore buge mamoko e kinde mokalo to ok gidhi e chokruoge mag kanyakla, kendo kit ngimagi nyiso malong’o ni ok giikore timo lokruok kaluwore gi adiera mag Muma ma ne opuonjgi.
3. Wanyalo timo ang’o kapo ni sani watimo puonjruok gi japuonjre e bug Lam Nyasaye?
3 Ka gie sani ipuonjri gi japuonjre bug Lam Nyasaye, kendo udong’ gi sula matin kende, inyalo yiero mondo utiek bugno kendo jiwo japuonjre mondo osom bug “Hera mar Nyasaye” kende owuon. Ka ok kamano, to daber ahinya ka uloko udhi e buk manyienni kendo uchake e tiende. Mana kaka itimo gi bug Muma Puonjo, unyalo yiero kabe ubiro wuoyo e wi apendiks.
4. Ang’o ma onego watim ka japuonjre obatisi kapok otieko puonjre Muma Puonjo kod “Hera mar Nyasaye”?
4 Ka obatisi japuonjre kapok otieko buge ariyogi, onego odhi nyime gi puonjruok e bug “Hera mar Nyasaye” nyaka otieke. Kata bed mana ni japuonjre osebatisi, inyalo chiwo ripot kuom sa, dok timo limbe, kod puonjruok. Ka udhi gi jalendo machielo to en bende oriwo puonjruokni lwedo en bende onyalo kwano sa.
5. Ere kaka inyalo ti gi bug “Hera mar Nyasaye” e konyo jolendo ma kuom kinde moko osebedo ka ok ti tij lendo?
5 Kapo in achiel kuom jokanyo mag Komiti Matayo Kanyakla omiyi migawo mar timo puonjruok mar Muma gi jal moro modok chien e tij lendo, inyalo kwayi mondo itim kode sula moko moyier e bug “Hera mar Nyasaye.” Puonjruok ma kamago ok onego otim kuom kinde malach. Mano kaka buk manyienni en mich maber, ogoye mondo okonywa ritruok “e hera mar Nyasaye”!—Juda 21.