Sandug Penjo

◼ Ere kaka ng’ato ka ng’ato nyalo konyo mondo chokruok mag kanyakla obed ma wapuonjore e yo maber? (Rapar 31:12)

Kuom chiwo luor matut ne Jehova kod chenro mochiwo mar chokruok mag kanyakla, ijiwo ji duto mondo ochop chon kendo giikre mondo Jehova opuonjgi. En gima ber ahinya ka wabet e kombe ma nyime e Od Romo, mondo wawe kombe machien ne joma nigi nyithindo matindo kod joma kinde moko nyalo biro kolewo. Kapok chokruok ochakre, onego joma nigi simo kata gik mamoko ma kamago oketgi e yo maok mon ji winjo chokruok. Gik mamono ji winjo chokruok biro bedo matin ka ji duto nigi luor mowinjore ne kar lamo seche ma chokruok dhi nyime.​—Ekl. 5:1; Fili. 2:4.

Seche ma joma welo ochako biro e chokruok, jalendo moro mong’eyogi nyalo chiwore mar bet kodgi. Mae nyalo konyo ahinya, ka welogo nigi nyithindo matindo madwarore mondo otiegi. Biro e chokruok nyalo bedo gima eka gihango timo. Ka en kamano, ginyalo hero bet chien kama ok gibi mono jomoko winjo chokruok seche ma dwarore ni giwuog oko matin mondo gikony nyithindgi. (Nge. 22:6, 15) Joot ma nigi nyithindo matindo onego obed kanyachiel mondo gikony nyithindgi kik go koko. En gima ber ka jonyuol ogolo nyithindgi oko ka owinjore mondo oriegi kata mondo otim negi gima dwarore eka giduoggi e Od Romo.

Joruak welo konyo e neno ni gik moko timore e yo mowinjore e od lamo. Gikonyo joot kod joma kinde moko jolewo mondo oyud kuonde bet mowinjore. Joruak welo tiyo gi paro maber kendo e yo maok gichwany ng’ato e konyo ji mondo obed kama onge gik manyalo monogi winjo chokruok. Gitiyo gi paro maber e ng’ado gima ginyalo timo ka gimoro otimore apoya. Ka tim nyathi moro mono ji winjo chokruok, joruak welo nyalo konyo e yo mang’won.

Ji duto manie chokruok nyalo miyo chokruok obed ma wapuonjore e yo maber kuom Jehova kod dwarone mar piny manyien mokuwe kendo makare.​—Hib. 10:24, 25.