‘Wach Maberni Nolandre’!
1. Ere kaka wang’eyo ni onge gima nyalo mono tij lendo chopo?
1 Onge gimoro kata matin manyalo mono Jehova timo dwaro mare. (Isa. 14:24) Kata obedo ni Jabura Gideon kod jolwenje 300 nochomo lweny ma ne nenore ni idhi logie nikech ne gidhi kedo gi jolweny ma Jo-Midian 135,000, Jehova nowachone ni: “Dhiyo kuom tekoni momiyi ni, kendo ires Israel e lwet Jo-Midian: ok an e maseoroi koso?” (Bura 6:14) En tich mane ma Jehova tayo e kindegi? Yesu nowacho kama: “Wach Maberni mar pinyruoth nolandre e pinje duto.” (Math. 24:14) Onge ng’at mabiro geng’o tijni mondo kik chopi!
2. Ang’o momiyo wanyalo geno ni Jehova biro konyowa ng’ato ka ng’ato e tijwa mar lendo?
2 Jehova Konyowa Ng’ato ka Ng’ato: Kata obedo ni wanyalo bedo gadier ni Jehova biro konyo Joneno mage e chopo tij lendo ka gin oganda, donge wanyalo geno ni Jehova biro konyo ng’ato ka ng’ato kuomwa bende? E kinde ma jaote Paulo ne dwaroe kony ahinya, ema noneno ka Jehova konye owuon kokalo kuom Wuode ma Yesu. (2 Tim. 4:17) Wanyalo bedo gadier ni Jehova biro gwedho kinda ma ng’ato ka ng’ato kuomwa timo e chopo dwache.—1 Joh. 5:14.
3. Jehova konyowa e loyo pek kaka mage?
3 Dibed ni parruok mag ngima weyi kidong’ gi teko matin maok romi e tij lendo? “Omiyo jo mool teko.” (Isa. 40:29-31) Dibed ni iromo gi sand kata akwede? “Ket ting’ mari kuom Jehova, mi nopidhi.” (Zab. 55:22) Dibed ni nitie kinde mineno ni in gi kiawa e yo moro? “Dhiyo, mi nabed gi dhogi.” (Wuok 4:11, 12) Dibed ni midekre moni tiyo tij lendo e okang’ midwaro? Jehova ogeno ahinya kinda mitimo gi chunyi duto maok odewo ni orom nade.—1 Kor. 3:6, 9.
4. Ere kaka bedo gi chir kuom Jehova biro konyowa?
4 Lwet Jehova “oseriere, ng’a ma diduoke piny?” (Isa. 14:27) Ka wan gadier ni Jehova gwedho tijwa mar lendo, mad wadhi nyime maok waweyo ‘ka wayalo gi chir kuom’ Jehova.—Tich 14:3.