Tieg Nyithindi Mondo Oti ne Nyasaye
1. En ting’ mane ma jonyuol ma Jokristo nigo kaluwore gi Zaburi 148:12, 13?
1 Jehova gwelo rowere mondo opake. (Zab. 148:12, 13) Omiyo, jonyuol ma gin Jokristo timo gik mang’eny moloyo mana puonjo nyithindgi adiera mag Muma kod chike Nyasaye. Bende gitiegogi mondo gibed joland wach maber. Ere kaka ginyalo timo mano e yo maber?
2. Ere kaka ranyisi maber mar janyuol nyalo konyo nyithinde?
2 Ranyisi Maber: Gideon ma ne en jabura nonyiso chwo 300 ma ne nikode kama: “Ng’iyauru, un bende utim kamano.” (Bura 7:17) Kinde duto nyithindo ng’iyo kendo timo gik ma jonyuolgi timo. Wuoro moro matiyo gotieno yiero mar dhi lendo gi nyithinde Ngeso gokinyi kata obedo ni sechego yudo ka ool ahinya. Kokalo kuom ranyisi moketo, opuonjo nyithinde ni tij lendo e gima onego giket mokwongo e ngimagi. (Math. 6:33) Be nyithindi neno ka imor timo gik mopogore opogore e lamo mar Nyasaye kaka lemo, somo Muma, chiwo paro e chokruoge kod dhi lendo? En adier ni ok inyal ketonegi ranyisi makare chuth. Kata kamano nyithindi biro timo gik mipuonjogi mondo gitim e lamo mar Jehova bang’ ka giseneno kinda mitimo e lame.—Rapar 6:6, 7; Rumi 2:21, 22.
3. Gin chenro mage ma jonyuol nyalo konyo nyithindgi keto kendo chopoe?
3 Ketnegi Chenro: Jonyuol timo kinda ahinya e konyo nyithindgi mondo ong’e wuotho, wuoyo, rwako law kaachiel gi timo gik mamoko. Kaka gimedo dongo, e kaka gimedo bedo gi gik mamoko madwarore ni gitim e ngimagi. Ka jonyuol gin Jokristo, onego bende gikony nyithindgi bedo gi chenro mag gik ma gidwaro chopo e tij Nyasaye kaluwore gi hikgi kod nyalogi. (1 Kor. 9:26) Be ipuonjo nyithindi chiwo paro e chokruoge maok gisomo weche mondiki kendo iko migepe ma gin-go e Skul mar Tij Nyasaye? (Zab. 35:18) Be itiegogi e yore mopogore opogore mag lendo? Be ikonyogi neno gimomiyo onego obatisgi kendo tiyo ne Nyasaye e thuologi duto? Be ikonyogi bedo gi osiepe ma gin jolendo ma jokinda mabiro medo jiwogi?—Nge. 13:20.
4. Ere kaka nyithindo yudo ber kuom bedo gi jonyuol machako tiegogi kapod gitindo mondo giti ne Nyasaye?
4 Jandik-zaburi: “A Nyasaye, isepuonja nyaka aa e rawera; kendo asehulo honini magi nyaka chil kawuono.” (Zab. 71:17) Chak tiego nyathini kapod otin mondo oti ne Nyasaye. Mise maber mar tiyo ne Nyasaye miketonegi kapod gitindo ema biro konyogi ka koro gisedoko joma dongo!—Nge. 22:6.