Puonj Nyithindi Mondo Opak Jehova

1. Be nyithindo matindo nyalo pako Jehova?

¹ Zaburi 148:12, 13 jiwo yawuowi kod nyiri mondo “gipak nying Jehova.” Ndiko oting’o ranyisi mang’eny mag nyithindo matindo ma ne otimo kamano. Kuom ranyisi, “Samuel notiyo nyim Jehova ka pod en nyathi.” (1 Sam. 2:18) “Nyako matin” ema ne onyiso chi Naaman ni janabi mar Jehova ma ne nie Israel, ne nyalo chango dhoho mar Naaman. (2 Ruo. 5:1-3) Kane Yesu odonjo ei hekalu mi otimo honini, “nyithindo” ema ne okok niya: “Hosana ni Wuod Daudi!” (Math. 21:15) Jonyuol nyalo puonjo nade nyithindgi mondo opak Jehova?

2. Ang’o momiyo dwarore mondo jonyuol oket ne nyithindgi ranyisi maber?

² Ket Ranyisi: Ne ochik wuone ma Jo-Israel mondo gikwong giher Jehova kendo gimak chikene e chunjegi giwegi kapok gijiwo adiera e chuny nyithindgi. (Rapar 6:5-9) Ka kinde duto iwuoyo maber kuom tij lendo kendo keto tijno e chenro mari juma ka juma, nyithindi biro kawo tij lendo kaka tich maduong’ kendo makelo mor.

3. Ranyisi maber mar jonyuol ne okonyo nyaminwa moro nade?

³ Nyaminwa moro paro kawacho gimor niya: “Kinde ma ne adongo, achiel kuom chenro ma joodwa nong’iyogo, noriwo tiyo tij lendo e giko juma ka juma. Ne aneno ni jonyuolna ne ohero tij lendo kuom adier. Ne wadongo ka waneno ni tij lendo en tich makelo mor.” Nyaminwani ne obedo jalendo ma podi ok obatisi ka en jahigini abiriyo, kendo sani ochiegni tieko higini 33 kotiyo ne Nyasaye kuom thuolone duto.

4. Tiego nyithindo mondo otim dongruok, tiende en ang’o?

⁴ Tieggi Gitim Dongruok: Migi thuolo mar timo gimoro seche ma ulendo kanyachiel. Kanyalore, to ginyalo duong’o dhoot, chiwo ne wuon ot trakt, kata somo ndiko. Mano biro miyo gimed bedo mamor kendo konyogi yudo jing’o ni ginyalo lando wach Pinyruoth. Kaka gimedo dongo, onego gitim tij lendo e yo momedore. Kuom mano, konygi gitim dongruok kendo gipar kaka ginyalo medo tiyo tij Nyasaye e yo malach.

5. Ang’o madwarore mondo nyathi owinjre bedo jalendo ma podi ok obatisi?

⁵ Wuo kod jodong-kanyakla mapiyo bang’ neno ni nyithindi oromo bedo jolendo ma podi ok obatisi kendo ka ginyiso gombo ni gidwaro timo kamano. Ka gibedo jolendo, mano biro miyo gikaw pako Jehova kaka ting’ ma margi giwegi. Ber ng’eyo ni ok ochuno ni nyathi nyaka bed gi ng’eyo malach machalo gi mar joma dongo mosebatisi kapok oyiene bedo jalendo. Be nyathini ong’eyo puonj mag Muma michako godo? Be timbene nyiso ni omako puonj mag Muma? Be en gi gombo mar tiyo tij lendo kendo mondo ji ong’eye kaka achiel kuom Joneno mag Jehova? Ka en kamano, jodong-kanyakla nyalo neno ni owinjore bedo jalendo ma podi ok obatisi.—Ne buk mar Tengenezo Linalofanya Mapenzi ya Yehova, ite mag 79-82.

6. Ang’o momiyo en gima ber ka jonyuol tiego nyithindgi?

⁶ Puonjo nyithindo mondo opak Jehova e chunygi en gima dwaro kinda. Kata kamano, neno nyithindgi ka timo dongruok e wach Nyasaye en achiel kuom gigo makelo ne jonyuol mor. To moloyo, Jehova bedo mamor ka nyithindo wuoyo kuom tijene mabeyo.