Joyal Wach Maber

JEHOVA nomiyowa Wuode Yesu Kristo mondo obednwa ranyisi maber monego waluw. (1 Pet. 2:21) Ka ng’ato obedo jalup Yesu, ng’atno bedo jayal wach maber kanyachiel gi jotich Nyasaye. Yesu nonyiso ni tijno ne dhi miyo jolupne yueyo ka nowacho niya: “Biuru ira, un duto mujony kendo ma ting’ turou, to anamiu yueyo. Keturu jok mara kuomu kendo puonjreuru kuoma, nimar adembora kendo chunya muol, to ununwang’ yueyo.” (Mat. 11:28, 29) Jogo duto moyie lando wach maber oseyudo yueyo ka luwore gi wach ma Yesu nosingono!

² Nikech Yesu e Jayal wach Nyasaye maduong’ie moloyo, nogwelo jo mamoko mondo obi obed jolupne. (Mat. 9:9; Joh. 1:43) Ne otiegogi ne tij yalo mi oorogi mondo gitim tich ma en bende ne otimono. (Mat. 10:1–11:1; 20:28; Luka 4:43) E kinde ma bang’e, nooro jo mamoko 70 mondo gidhi giyal wach maber e wi Pinyruodh Nyasaye. (Luka 10:1, 8-11) Sa ma Yesu ne oro jopuonjrenego, nonyisogi niya: “Ng’at ma winjou, owinja, kendo ng’at ma chayou, ochaya an bende. To ng’at ma chaya, ochayo bende ng’at ma noora.” (Luka 10:16) Kuom nyisogi kamano, Yesu nojiwo kaka ting’ ma ne omiyo jopuonjrenego ne en ting’ maduong’ ahinya. Ne gidhi tiyo e lo Yesu kod Nyasaye Mamalo Moloyo! Jo ma Yesu gwelo ndalogi ni, ‘bi ibed jalupna’ bende tiyo e lo Yesu kod Nyasaye. (Luka 18:22; 2 Kor. 2:17) Jogo duto ma bedo jolup Yesu nigi ting’ mar yalo wach maber mar Pinyruoth kendo loko ji obed jopuonjrene.​—Mat. 24:14; 28:19, 20.

³ Nikech waseyie bedo jolup Yesu, mano osemiyo ‘wang’eyo’ Jehova Nyasaye kod Yesu Kristo. (Joh. 17:3) Osepuonjwa yore Jehova. Jehova osekonyowa loko pachwa obed manyien, osekonyowa rwako kit dhano manyien, kendo miyo wabed gi timbe ma luwore gi puonjne makare. (Rumi 12:1, 2; Efe. 4:22-24; Kol. 3:9, 10) Nikech wahero Jehova, mano osemiyo wachiwone ngimawa kendo nyiso mano kokalo kuom batiso mar pi. Chieng’ mitisowa, wabedo joyal wach maber moseyiedhi.

⁴ Kinde duto, ng’e ni nyaka wati ne Nyasaye gi lwedo ma kia richo kendo gi chuny maler. (Zab. 24:3, 4; Isa. 52:11; 2 Kor. 6:14–7:1) Nikech waseketo yie kuom Yesu Kristo, koro wan gi chuny maler ma ok ketnwa bura. (Hib. 10:19-23, 35, 36; Fwe. 7:9, 10, 14) Jaote Paulo nojiwo Jokristo mondo gitim gik moko duto ne duong’ mar Nyasaye e ka mondo kik gichwany jo mamoko. Jaote Petro nonyiso kaka bedo gi timbe mabeyo nyalo ywayo jo ma ok luw Wach Nyasaye mondo gidonj e adiera. (1 Kor. 10:31, 33; 1 Pet. 3:1) Ere kaka inyalo konyo ng’ato mondo en bende obed ng’at moromo bedo jayal wach maber?

JOLENDO MANYIEN

⁵ Sa asaya michako puonjori Muma gi ng’ato, tem jiwe mondo onyis jo mamoko weche mosepuonjore. Onyalo wuoyo gi wedene, osiepene, jo motiyogo, kod jo mamoko moromogo e dijene. Mano en yo maber mar puonjo jo manyien mondo gibed jolup Yesu Kristo e yalo wach maber. (Mat. 9:9; Luka 6:40) Kaka ng’at manyienno medo dongo e yie mare kendo lony e nyiso ji wach maber kata ka en e dijene, mano biro miyo ogomb bedo jalendo moyiedhi.

WECHE MA DWARORE E KA NG’ATO OBED JALENDO

⁶ Ka pok igwelo ng’ato mondo ochak dhi yalo kodi ot ka ot, nitiere weche moko ma dwarore ni okwong ochop mondi. Sa ma ng’ato dhi kodwa e tij yalo, mano miyo ji nene ni en achiel kuom Joneno mag Jehova. Kuom mano, dwarore ni chop kanyo, kit ngimane onego obed ni luwore adimba gi puonj makare mag Jehova mondo e ka obed jalendo ma pok obatisi.

⁷ Sa ma isebedo kipuonjo ng’ato kendo konye lony gi puonj mag Muma, nyaka bed ni iseng’eyo kaka ochalo. Nyalo bedo ni isefwenyo ni kit ngimane koro luwore gi weche mosepuonjore. Kata kamano, nitiere weche moko e kit ngima japuonjreno ma jodong-kanyakla diher nono ka un kode.

⁸ Jachan bura mar jodongo biro chano mondo jodongo ariyo (achiel kuomgi onego obed ja komiti ma tayo tije kanyakla) onon weche ma dwarorego kanyachiel kodu. E kanyakla ma jodongo nokie, jaduong’ achiel kod jakony-tich mowinjore nyalo timo tijno. Owete moyier ni odhi owuo gi ng’at ma dwaro bedo jalendo, onego otim kamano mapiyo. Ka po ni chieng’ chokruok moro mar kanyakla e ma giyudoe wach ni japuonjre dwaro bedo jalendo, ginyalo wuoyo kodi gi ng’at mipuonjorigo Mumano bang’ chokruok. Mbaka ma gigoyo kodu onego obed man thuolo. Koro, mondo mi japuonjre obed jalendo ma pok obatis, nyaka ochop weche ma luwogi:

1. (1) Obed ng’at moyie ni Muma en Wach Nyasaye mokudho gi muche.​—2 Tim. 3:16.

2. (2) Obed ng’at mong’eyo kendo oyie gi puonj manie Ndiko ma ng’ato chako ng’eyogo Nyasaye, ma ka ng’ato openje penjo to onyalo dwoko ka luwore gi Muma to ok ka luwore gi pache owuon kata ka luwore gi puonj mag dinde mag miriambo.​—Mat. 7:21-23; 2 Tim. 2:15.

3. (3) Obed ng’at ma luwo kaka Muma chiko jo Jehova ni mondo gibed jo ma dhiga e chokruoge mag kanyakla ka po ni tekregi kod chalgi oyienegi.​—Zab. 122:1; Hib. 10:24, 25.

4. (4) Obed ng’at mong’eyo weche ma Muma puonjo e wi terruok, chode, doho, kod chwo ma terore gi chwo wetegi, kendo kit ngimane obed ma koro luwore gi puonjgo. Ka po ni odak gi ng’ato moluongo ni chiege kata chwore, nyaka giriw kendgi e yo makare.​—Mat. 19:9; 1 Kor. 6:9, 10; 1 Tim. 3:2, 12; Hib. 13:4.

5. (5) Obed ng’at ma ok en jamer mana kaka Muma kwero kendo obed ng’at ma ok ti gi yedhe ma mero kata ma wilo pach ji, mak mana ka po ni ondiknego e osiptal.​—2 Kor. 7:1; Efe. 5:18; 1 Pet. 4:3, 4.

6. (6) Obed ng’at mong’eyo gimomiyo ok onego wabed gi osiepe maricho.​—1 Kor. 15:33.

7. (7) Obed ng’at mosewere chuth gi riwruoge duto motudore gi dinde mag miriambo ma dibed ni nyocha entiere. Obed ng’at moseweyo dhi e kanisego kendo koro ok oriw tijegi lwedo.​—2 Kor. 6:14-18; Fwe. 18:4.

8. (8) Obed ng’at ma ok donjre gi weche siasa duto mag pinyni.​—Joh. 6:15; 15:19; Jak. 1:27.

9. (9) Obed ng’at ma kit ngimane nyiso ni oluwo weche manie Isaiah 2:4 kodok kor ka ywaruok mag ogendni mag piny.

10. (10) Obed ng’at ma kuom adier nigi siso mar bedo Janeno mar Jehova.​—Zab. 110:3.

⁹ Ka po ni jodongo osegoyo mbaka gi japuonjre to pod gin gi kiawa e wi weche moko kuom mosenyisgo, onego gimed penje wachno kendo ginyalo tiyo kata gi Ndiko moket kaegi e tayo mbaka. Dwarore ahinya ni japuonjre ong’e malong’o ni jo ma dwaro riwore gi Joneno mag Jehova e tij yalo wach maber nyaka dag e kit ngima ma luwore gi puonj kod chike ma Ndiko dwaro. Weche ma a e dho japuonjreno biro konyo jodongo ng’eyo ka be oseng’eyo weche ma dwarore ni ong’e kendo ka be ochopo weche ma dwarorego e okang’ moromo ma nyalo miyo oyiene ochak yalo ka en jalendo moseyiedhi.

¹⁰ Jodongo onego omi japuonjreno dwoko mapiyo mondo ong’e ka be oyiene. Kinde mang’eny, ginyalo nyise e giko mbakagino. Ka po ni oyiene, jodongo nyalo nyise kaka gimor ni koro okete kaka jalendo. (Rumi 15:7) Jodongo onego ojiwe ni ber kochako dhi e tij yalo mapiyo kaka nyalore kendo ni ogol ripot mare mar tij yalo e giko dweno. Jodongo nyalo lerone ni sa moyie ne japuonjre mar Muma bedo jalendo ma pok obatis, ripot mare mokwongo mar tij yalo mogolo e ma biro miyo olosne Rekod mar Jalendo mondikie nyinge, kae to ikane e fail mar kanyakla. Jodongo kawo wechego kuom jalendo mondo okony riwruogwa e chopo migawo mag Joneno mag Jehova e tijgi mar siro weche mag pinyruoth. Mano miyo jalendo bedo gi yot mar tiyo ne Nyasaye kendo yudo kony ma dwarore e loso winjruokne kode. E wi mano, jodongo biro nyiso jalendo manyienno ni wechene mondik e Rekod mar Jalendo ibiro kan kendo tigo ka luwore gi weche mondik e Global Data Protection Policy of Jehovah’s Witnesses manie jw.org.

¹¹ Sa ma watimo kinda mar lony gi jalendo manyienno kendo nyiso ni wamor gi dongruok mosetimo, mano nyalo jiwe sidang’. Mano nyalo miyo ochiw ripode mar tij yalo ma ok obare kendo miyo okaw okenge madongo mar tiyo ne Jehova e okang’ momedore.​—Fil. 2:4; Hib. 13:2.

¹² Ka jodongo oseyie ne japuonjre mar Muma chako yalo, koro owinjore omiye kopi mare mar bug Riwruok ma Timo Dwach Jehova. Ka osegolo ripode mokwongo, ibiro land ne kanyakla ni koro en jalendo manyien ma pok obatis.

KONYO JOWA MATINDO

¹³ Nyithindo matindo bende nyalo bedo joland wach maber. Yesu norwako nyithindo matindo kendo noguedhogi. (Mat. 19:13-15; 21:15, 16) Kata obedo ni jonyuol e ma nigi ting’ kuom nyithindgi, jo mamoko e kanyakla bende nyalo konyo jowa matindo mondo gibed gi siso mar timo tij yalo wach Pinyruoth. Ka in janyuol, ber ng’eyo ni ranyisi maber miketo e tij yalo nyalo jiwo nyithindi ahinya mondo gin bende gibed jokinda e tij Nyasaye. Ere kaka dikony nyathi ma timbene beyo kendo ma chunye dwaro lando wach maber ne jo mamoko?

¹⁴ Nyalo bedo maber ka janyuol odhi ir achiel kuom jodongo manie Komiti ma Tayo Tije Kanyakla mondo gine ka be nyathino oromo bedo jalendo. Jachan bura mar jodongo biro chano mondo jodongo ariyo (achiel kuomgi onego obed ja komiti ma tayo tije kanyakla) orom gi nyathino kaachiel gi jonyuolne kata ng’at modakgo ma en janeno. Ka nyathino ong’eyo adiera mag Muma e okang’ moromo kendo kit ngimane osenyiso ni odwaro bedo jalendo, mago nyalo nyiso ni osetimo dongruok. Bang’ nono wechegi gi mamoko ma mulo jo madongo, jodongo ariyogo nyalo ng’ado ka be nyathino owinjore bedo jalendo ma pok obatis. (Luka 6:45; Rumi 10:10) Sa ma giromo gi nyathi matin, onge tiende wuoyo e wi weche moko ma mulo mana jo madongo kende, ma kuom adier ok otudore gi nyithindo.

¹⁵ Sa ma jodongo oromo gi nyathi ma kamano, onego gipwoye ahinya nikech dongruok mosetimo kendo gijiwe mondo ogo okang’ mar chopo e batiso. Nikech nyaka bed ni jonyuol osetemo matek mondo gipidh adiera e chuny nyathigino, gin bende onego opwogi ahinya. Mondo jodongo ojiw jonyuol omed konyo nyathigino, onego ginyisgi sula ma wiye wacho ni, “Ote ne Jonyuol ma Jokristo,” ma yudore e ite mag 179-181.

CHIWRUOK KOD BATISO

¹⁶ Ka isepuonjori e wi Jehova kendo inyiso ni ihere kuom luwo puonj kod chikene mi ochopo nyaka ka ma koro idhiga e tij yalo, ber mondo iteg winjruokni gi Jehova. E yo mane? Inyalo timo kamano kuom chiwone ngimani kendo nyiso mano kokalo kuom batiso mar pi.​—Mat. 28:19, 20.

¹⁷ Chiwo ngimani ne Jehova nyiso ni koro osewali ne tij Nyasaye. Kama eri e kaka ng’ato chiwore ne Nyasaye: owuoyo gi Nyasaye e lamo kosingorene ni obiro tiyo gi ngimane e tije kendo ni obiro wuotho e yorene. Tiende ni osingore ni obiro lamo Nyasaye kende kendo tiyone nyaka chieng’. (Rap. 5:9) Lamo mar singruokno en ma ng’ato timo kende owuon. Mano en gima ng’at machielo ok nyal timoni.

¹⁸ Kata kamano, nitie gimoro machielo ma dwarore ni itim mopogore mana gi wacho ne Jehova ni koro in mwandune. Onego inyisri ne jo mamoko ni isechiwo ngimani ne Nyasaye. Gima biro nyiso jomoko ni isechiwori en sa ma itisi e pi mana kaka ne obatis Yesu. (1 Pet. 2:21; 3:21) Ka po ni iseng’ado mar tiyo ne Jehova kendo idwaro ni obatisi, en ang’o monego itim? Onego inyis jachan bura mar jodongo wachno. Obiro chano mondo jodongo moko orom kodi mondo gine ka be ichopo weche ma Ndiko dwaro kuom jo ma dwaro ni obatisgi. Kidwaro ng’eyo weche momedore, som sula ma wacho ni, “Ne Jalendo ma Pok Obatis,” ma yudore e ite mag 182-184 e i bugni, kod “Penjo Mipenjo Jo ma Dwaro Mondo Obatisgi,” ma yudore e ite mag 185-207.

RIPODE MA NYISO DONGRUOK MOSETIMORE E TIJ YALO

¹⁹ Kuom higni mang’eny, weche kod ripode ma nyiso dongruok mosetimore e lamo maler osejiwo oganda Jehova ahinya. A kinde ma Yesu Kristo nokwongo nyisoe jopuonjrene ni ibi yal wach maber e piny ngima, Jokristo madier osebedo gi siso mar neno kaka tijno ne idhi tim.​—Mat. 28:19, 20; Mar. 13:10; Tich 1:8.

²⁰ Jo ma nokwongo bedo jolup Yesu noheroga winjo weche ma nyiso dongruok ma ne timore e tij yalo. (Mar. 6:30) Bug Tich Joote nyisowa ni ne ool roho maler kuom jopuonjre 120 kama chieng’ Pentekost e higa 33 bang’ Kristo. Mapiyo nono, kwan mar jopuonjre nomedore nyaka 3,000 kendo bang’e nyaka 5,000. Ne ochiw ripot ma nyiso ni “pile ka pile Jehova ne medonegi jo ma ne donjo e yor warruok” kendo ni “oganda mang’ongo mar jodolo bende norwako yie.” (Tich 1:15; 2:5-11, 41, 47; 4:4; 6:7) Nyaka bed ni weche mabeyogo nojiwo jopuonjrego miwuoro! To mano kaka ripode mabeyogo nojiwogi mondo gidhi nyime gi tich ma Nyasaye nomiyogi kata obedo ni jotend-din mar Jo-Yahudi ne miyo isandogi!

²¹ Chiegni e higa 60-61 bang’ Kristo, Paulo nowacho e barua ma nondiko ne Jo-Kolosai ni wach maber ne “yudo nyak kendo ne medore e piny duto” kendo ni wachno ne “oseyal ne chuech duto manie bwo polo.” (Kol. 1:5, 6, 23) Jokristo ma ndalo joote nomakore gi Wach Nyasaye kendo roho maler ne miyogi teko mar chopo tij yalo e okang’ malach ka ne pok oketh oganda mar Jo-Yahudi e higa 70 bang’ Kristo. Mano kaka Jokristo ma ne ochung’ motegnogo ne mor winjo ripode ma ne nyiso kaka tij yalono ne chopo!

²² E yo ma chalo kamano, riwruok mar oganda Jehova ma ndalogi bende kanoga ripode ma nyiso tich ma dhi nyime sani kichopogo weche manie Mathayo 24: 14, ma wacho niya: “Wach maber mar Pinyruoth ibiro yal e piny mangima mondo obed ranyisi ne ogendni duto, eka giko nobi.” Nikech wan jotich Nyasaye mosechiworene, wan gi tich monego otim mapiyo. Nyaka ng’ato ka ng’ato kuomwa obed gi siso mar neno ni tijno otim e okang’ ma dwarore chuth ka giko pok ochopo. Jehova biro neno ni otiek tijno, kendo obiro yie kodwa ka wan bende watimo karwa e tijno.​—Eze. 3:18-21.

CHIWO RIPOT MAR TIJ YALO

²³ Ripot ma wachiwo onego oting’ weche mage? Riwruok mar oganda Jehova losoga kalatas mar Ripot mar Tij Yalo ma nyiso weche monego opong’ie. Kata kamano, weche ma luwogi bende nyalo konyo.

²⁴ E bath ka mondik ni “Buge (Mogo kod mag Kompyuta/Simo),” ndikie kwan duto mag buge ma ne ichiwo ne jo ma pok obedo Joneno, bed ni ne ioronegi bugego e kompyuta kata e simo. Bende, ndik kwan mag vidio ma ne itang’o ne ji e bath ka mondik ni “Vidio Monyis.”

²⁵ Kwan mar “Dok Limbe” inyalo yud kuom kwano kar romb limbe duto miselimogo ng’at ma ok en Janeno mosechiwore mi obatise, mondo imed konye hero adiera. Wanyalo kwano jo ma wadok limo achiel ka achiel, jo ma wandikonegi barua, wagonegi simo, waoronegi ote e simo kata e-mail, kata ka wateronegi atera bugewa. Sa asaya midok puonjri gi ng’ato Muma, onego ikwan limbeno kaka achiel kuom jo ma wadok limo. Janyuol ma tayo Lamo mar Joot to nyathine ma pok obatis nitiere, nyalo kwano limbe achiel juma ka juma

²⁶ Kata obedo ni juma ka juma wapuonjoga ng’ato Muma, e giko dwe onego wakwane mana kaka japuonjre achiel. Jolendo onego ondik kwan duto mag jopuonjre mag Muma mopogore opogore ma gitayo e dweno. Pile jo monego wandik e ripot kaka jo ma wapuonjoga Muma gin jo ma ok gin Joneno mosechiwore mi obatis. Ka po ni jalendo moro puonjo owadwa kata nyaminwa ma nosedok chien moweyo tij yalo, onyalo riwo mano bende e kwan mar jo ma opuonjoga Muma, to mana ka achiel kuom jo komiti ma tayo tije kanyakla e ma ochikowa mondo wapuonj jo ma kamago. Bende, ka wapuonjre gi ng’at ma e ka nyocha obatis to pok otieko puonjore bug Inyalo Dak gi Mor Nyaka Chieng’!, mano bende wanyalo kwano.

²⁷ Dwarore ahinya ni wachiw ripod “Seche” e yo makare. Wakwano seche ma watiyogo e yalo sa ma wayalo ne jo ma ok gin Joneno mosechiwore mi obatisgi: Watimo kamano bed ni wayalo ot ka ot, wadok limo jo ma ne omor gi wach ma ne oyalnegi, wapuonjo jo ma wapuonjoregago Muma, wayalo gi kanyakla kata ka wan e dijewa. Ka jolendo ariyo tiyo kanyachiel, giduto ginyalo kwano seche. Kata kamano, ng’ato achiel e ma biro ndiko e ripot kwan mar jo ma gidok limo kata japuonjre moro amora mar Muma ma gipuonjo. Ka jonyuol ariyo oriwore e puonjo nyithindgi sa Lamo mar Joot, giduto ginyalo kwano sa achiel kende juma ka juma. Owete nyalo kwano seche ma gitiyogo e golo twak mar ji duto. Ng’at ma loko twak mar ji duto e dhok machielo bende nyalo kwano sechego. Nitie gik mamoko ma wahinyo timo ma ok onego wakwan seche mwatimogigo kaka seche motigo e tij yalo. Gigo gin kaka ikruok ne tij yalo, thuolo ma wabedogo e romo mar dhi yalo, dijewa matindo tindo, kod gik ma kamago.

²⁸ Jalendo ka jalendo nyaka ng’ad owuon ka luwore gi chunye mosetieg gi Muma ni gin kinde mage monego okwan kaka seche motiyogo e tij yalo. Nitiere jolendo moko ma yalo kuonde ma ji mang’eny odakie machiegni-machiegni, to jolendo mamoko to yalo e alwora ma ji oke-okee ma dwaro ni giwuoth mabor. Alwora mag lendo opogore opogore; jolendo bende nigi paro mopogore opogore e yo ma ginenogo tijgi mar yalo. Kuom mano, Bura Matayo ok oketo chik moro ma ginyisogo kaka jo kanyakla me piny mangima onego okwan seche ma gitiyogo e tij yalo. Bende, ok giketo ng’at moro mondo obed jang’ad-bura ne jo mamoko e wi wachno.​—Mat. 6:1; 7:1; 1 Tim. 1:5.

²⁹ Onego wachiw ripot mar thuolo ma watiyogo e tij yalo ka gin seche mangima-mangima to ok ma nus-nus. Kata kamano, ka nitiere jalendo ma ok nyal chopo sa mangima nikech hike oniang’, gimoro olorone, odak ka miritoe jotuo kata ka miritoe jo ma hikgi oniang’, kata midekre moro amora odiye, onyalo golo ripot mag dakika 15 gi wiye. Kata ka ochiwo neno mana kuom dakika 15 kende e dwe, onego ochiw ripodno. Ibiro kwane kaka jalendo ma yaloga dwe ka dwe. Chenroni bende tiyo kuom jalendo ma gimoro odiyo kuom kinde machuok, ma sa moro ok onyal wuok e ot e dwe moro, kata tuo moro marach kata masira moro omake. Chenroni tiyo mana kuom jogo ma onge gi nyalo gadier. Komiti ma tayo tije kanyakla e ma biro ng’ado ka be jalendo moro owinjore gi donjo e chenrono kata ooyo.

REKOD MAR JALENDO

³⁰ Ripodi mar tij yalo michiwo dwe ka dwe ipong’oga e Rekod mar Jalendo. Rekodno en mwandu kanyakla. Kichano dhi e kanyakla machielo, ne ni inyiso jodong-kanyaklau wachno. Jagoro biro oro rekod mari e kanyakla manyien midhiyeno. Mano biro miyo jodongo manie kanyakla midhiyeno yot mar rwaki kendo konyi medo timo dongruok e winjruokni gi Nyasaye. Ka po ni idhi bedo ma onge e kanyaklau kuom dweche matin ne adek, inyalo dhi nyime oro ripodegi mag tij yalo ne kanyaklau.

GIMOMIYO WACHIWOGA RIPODEWA MAG TIJ YALO

³¹ Be seche moko wiyi wilga gi chiwo ripodi mar tij yalo? En adier ni nitie kinde ma waduto dwarore ni oparnwae weche moko. Kata kamano, ka wabedo gi paro mowinjore e wi chiwo ripot kendo ka wang’eyo maber gimomiyo timo kamano dwarore, biro bedonwa mayot paro ni onego wachiwga ripodewa mag tij yalo.

³² Nitie jomoko mosepenjoga kama: “Ka Jehova ong’eyo tich ma atimone, ang’o momiyo pod dwarore ni achiw ripoda ne kanyakla?” En adier ni Jehova ong’eyo tich ma watimone, kendo ong’eyo ka be watiyone gi chunywa duto kata ka ok watim kamano. Kata kamano, ber ng’eyo ni Jehova nokwano odiechienge ma Noa notiyogo e gero yie kod higni ma Jo-Israel ne owuothogo e thim. Nyasaye nonyiso kwan mar jogo ma ne oluore kod jogo ma ne ok oluwo kaka nochiko. Noketo rekod ma nyiso okang’ ka okang’ ma joge ne oloyogo piny Kanaan, kod gik ma jong’ad-bura ma ne oluoro Nyasaye e Israel ne otimo. Ee, nomiyo ondik weche modhuro e wi gik ma jotichne notimo. Kokalo kuom rohone maler, nomiyo ondik weche mag gik ma ne otimorego, to mano konyowa ng’eyo paro ma en-go e wi bedo gi rekod kata ripode mondik kare.

³³ Gik ma ne otimore chon mondik e i Muma nyiso maler kaka oganda Jehova ne ndikoga ripode kod keto rekod ma nyiso adimba kaka ne gitimore. Kinde mang’eny, sigana miwuoyoe e Muma ne ok nyal chopo wach midwaro e yo maber ka ok ochiw kwan moko sie. Inyalo somo moko kuomgi e Ndiko ma luwogi: Chakruok 46:27; Wuok 12:37; Jobura 7:7; 2 Ruodhi 19:35; 2 Weche mag Ndalo 14:9-13; Johana 6:10; 21:11; Tich Joote 2:41; 19:19.

³⁴ Kata obedo ni ripodewa ok nyisga gik moko duto ma watimoga e tijwa ne Jehova, chiwo ripodego konyoga e chopo weche moko e i riwruok mar oganda Jehova. E ndalo joote, ka ne joote oduogo koa e tij yalo, ne giwacho ne Yesu “gik moko duto ma ne gisetimo kendo puonjo.” (Mar. 6:30) Nitie seche ma ripodego nyalo fwenyonwa kuonde ma dwarore ni otimie gimoro. Kwan-go nyalo nyiso ni kata obedo nitie dongruok e yo moro, nitiere kuonde mamoko ma gik moko dhie mos. Kuom ranyisi, ripodego nyalo nyiso ni kwan mar jolendo ok dhi malo. Nyalo bedo ni dwarore ni mondo ojiw ji e yo moro kata ni nitie chandruoge moko ma dwarore ni olos. Owete ma tayo biro nono ripodego kae to gineno kaka ginyalo rieyo gik ma di po ni nyalo thiro dongruok mar jomoko kata kanyakla mangima.

³⁵ Ripode mwagolo bende konyo riwruok mar oganda Jehova mondo ging’e kuonde ma jolendo dwaroree moloyo. Gin kuonde mage ma nyak yudoree moloyo? Kanye ma dongruok dhiye maber? Gin buge mage ma dwarore mondo okony ji puonjore adiera? Ripode konyo riwruok mar oganda Jehova ng’eyo buge ma nyalo bedo ni biro dwarore ni otigo e yalo kuonde moko e piny, kae to gitimo chenro motelo.

³⁶ To ng’enywa yudoga jip kuom ripode ma nyiso kaka tij yalo timore. Donge wabedoga moil bang’ winjo kaka owete chopo tij yalo wach maber e piny mangima? Ripode ma nyiso kaka kwan mar jolendo medore konyowa neno dongruok ma riwruok mar oganda Jehova timo. Weche miganonwa ma nyiso gik mosetimore e ngima jolendo mamoko moroga chunywa kendo miyo wabedo jokinda mondo mi wachop tijwa mar yalo e okang’ malong’o chuth. (Tich 15:3) Sa ma watimo kinda mar chiwo ripodewa mag tij yalo, mano nyiso ni wariwo lwedo chenro moket kendo nyiso ni wadewo owetewa ka moro amora ma gintiere. Timo gi ma nenore ni tinno nyiso ni wayie luwo chenro ma riwruok mar oganda Jehova oketo.​—Luka 16:10; Hib. 13:17.

KETO CHENRO MAG TIMO DONGRUOK E TIJ NYASAYE

³⁷ Onge tiende pimo okang’ ma watimogo tij yalo gi mar ng’at machielo. (Gal. 5:26; 6:4) Chalwa opogore opogore. To komachielo, wanyalo yudo ber kuom keto chenro magwa wawegi ma nyalo miyo wamed okang’ ma watiyogo ne Nyasaye. Sa ma wachopo e okang’ moro ma waseketo, wabiro winjo ka chunywa opong’ gi mor.

³⁸ En adier ni Jehova miyo tij choko jo ma obiro reso e “masira maduong’” otimre mapiyo. Wadak e kinde ma weche ma janabi Isaya nokoro chopoe niya: “Ng’at matin nobed gana, kendo ng’at ma ok duong’ nobed oganda ma nigi teko. An Jehova, abiro miyo gino otimre piyo ka kindene ochopo.” (Fwe. 7:9, 14; Isa. 60:22) Mano kaka bedo joyal wach maber e kinde mag gikogi en thuolo ma jaber miwuoro!​—Mat. 24:14.