Sandug Penjo

◼ Kapok opwodh jalendo mondo obatise, onego bed ni osebiro e chokruoge kendo lendo kuom kinde maromo nade?

Batiso e yiero maduong’ie moloyo ma ng’ato nyalo timo e ngimane. Omiyo, kapok opwodh ng’ato mondo obatise, onego bed ni ong’eyo gima Nyasaye dwaro ni otim. E wi mano, ngimane onego onyis maler ni oseng’ado mar dak kaluwore gi gima Nyasaye dwaro.

Muma jiwo Jokristo ni kik giwe maok gichokore kanyachiel. Omiyo, jalendo ma pok obatisi onego bed ni dhi e chokruoge mag kanyakla. (Hib. 10:24, 25) Onego bed ni ochiwoga paro sama en e chokruogego. E wi mago, nyalo bedo maber ka osedonjo e Skul mar Tij Nyasaye, kata obedo ni mae ok en chik.

Bende, nikech omi Jokristo migawo mar lando wach maber kendo puonjo ji, onego bed ni jal ma dwaro ni obatiseno lendoga. (Math. 24:14; 28:19, 20) Onego bed ni osebedo kolendo kuom dweche maromo nade mondo eka opwodhe ne batiso? Nyalo bedo maber ka thuolo moromo okalo mondo onyis ni en gi chuny mar lendo gi kinda dwe ka dwe. (Zab. 78:37) Kata kamano, ok ochuno ni nyaka dweche mang’eny ahinya okal kapok obatise. To, jalendono onego bed ni golo ripot mar seche maromo nade dwe ka dwe? Ok wanyal keto chik ma achiel kachiel kuom wachni. Jodong-kanyakla onego onon nyalo mar jalendo ka jalendo kendo kik gibed joma mbeko kata rido chik mokalo tong’.—Luka 21:1-4.

Jodong-kanyakla (kata jokony-tich manie kanyakla ma jodongo nokie) ma bet gi jalendo ma dwaro ni obatise onego oket e paro ni ji opogore, kendo onego giti gi rieko e nono kabe jalendono owinjore obatisi. Jodongo kata jokony-tichgo onego onon kabe kuom adier jalendono dwaro bedo achiel kuom Joneno mag Jehova, kabe oriwo riwruok mar oganda Jehova lwedo, kod kabe ohero tij lendo. Jodong-kanyakla onego oket e paro ni jalendono pok obedo Jakristo motegno, kendo ni oonge gi lony ma jalendo mosebatisi nyalo bedogo. Kapo ni jodong-kanyakla oneno ni jalendo moro pok oromore gi batiso, onego giti gi Ndiko e yo mang’won e lerone gimomiyo gineno ni pod ok oromo, kendo gikonye mondo otim dongruok madwarore.