Weche Mogik Miwacho gi Jogo ma Dwaro ni Obatisgi

Kinde mang’eny, batiso itimoga e chokruoge mag alwora kod chokruoge madongo mag Joneno mag Jehova. E giko mar twak mar batiso, jagol-twagno biro kwayo jo ma idhi batis mondo gichung’ malo kae to gidwok penjo ariyo ma luwogi gi dwol mamalo kendo ma winjore maler:

1. Be iseweyo richoni mi isingori ne Jehova ni ibiro tiyone nyaka chieng’ kendo iyie kuom Yesu Kristo kaka yo ma Jehova kelogo warruok?

2. Be ing’eyo ni batiso mari miyo ibedo Janeno mar Jehova ma tiyo kanyachiel gi riwruok mar ogandane?

Dwoko ma nyiso ni en kamano nyiso ni jogo ma dwaro ni obatisgi “hulo e lela” ni gin kod yie kuom rawar kendo ni gisechiwore ne Jehova chuth. (Rumi 10:9, 10) Jo ma dwaro ni obatisgi onego opar ahinya motelo kuom penjo ariyogo kendo giriw gi lamo mondo mi gidwokgi ka luwore gi yie margi giwegi.

Be isesingori ne Jehova e lamo, ka inyise ni en kende e ma ibiro lame kendo ni ibiro keto timo dwache obed mokwongo e ngimani?

Be koro in gadier chuth ni onego obatisi e chokruok ma bironi?

En kit rwakruok mane mowinjore gi batiso? (1 Tim. 2:9, 10; Joh. 15:19; Fil. 1:10)

Onego warwakre e yo ‘ma ok kal tong’ ma nyiso ni wan jo ma pachgi long’o’ kendo ni ‘waluoro Nyasaye.’ Lewni mag goyo abal ma nyiso dug ng’ato kendo ma ok nyis luor ok owinjore gi Jakristo kendo ok onego orwakgi sa batiso. Jogo ma ibatis onego orwak lewni mowinjore ka giketo e paro luor ma onego omi kindeno.

Ng’ato onego onyis kido kata tim mane seche ma itise? (Luka 3:21, 22)

Batiso mar Yesu keto ranyisi ma onego oluw e batiso mar Jokristo ndalogi. ne ong’eyo ni batiso en okang’ ma ok onego okaw ka tugo, kendo mano ne onenore e paro mare kod timne ka ne itise. Kuom mano, ka mitimoe batiso ok onego obed kar ngera, goyo abal, kata timo timbe moko ma nyalo miyo luor ma onego obedie kindeno kik bedie. Bende, Jakristo ma oa batis ok onego otimre ka ng’at moa locho e piem moro. Kata obedo ni batiso en kinde mar mor, onego wanyis morno e yor luor.

Ere kaka dhi e chokruoge ma ok ibari kod riwo lwedo chenro mag kanyakla biro konyi chopo singoni ne Jehova?

Kata bang’ ka osebatisi, ang’o momiyo en gima dwarore ahinya mondo ibed gi chenro maber mar puonjruok Muma kod mar lando Wach Nyasaye ma ok ibari?

NE JODONG-KANYAKLA

Ka jalendo ma pok obatis onyiso jodong-kanyakla ni odwaro mondo obatise, onego ojiwe mondo osom motelo “Penjo Mipenjo Jogo ma Dwaro Mondo Obatisgi,” ma yudore e ite mag 185-207 e bugni. Onego osiemne ka ma wacho ni “Ne Jalendo ma Pok Obatis,” ma chakore e ite mar 182, ma lerone kaka onyalo ikore ne wuoyo e wi penjogo gi jodong-kanyakla. Mana kaka onyis kanyo, jalendo ma dwaro ni obatiseno nyalo tiyo gi wechene ma ondiko ka moro tenge kendo onyalo elo bugni seche ma giwuoyo e wi penjogo. Kata kamano, ok ochuno ni ng’at machielo nyaka som kode penjogo mokwongo ka pok oromo gi jodong-kanyakla.

Ng’at ma dwaro ni obatise onego onyis jachan bura mar jodongo. Bang’ ka jal ma dwaro ni obatise oseyudo thuolo mar somo “Penjo Mipenjo Jogo ma Dwaro Mondo Obatisgi,” jachan bura mar jodongo biro penjo ng’atno ka be osechiwore chuth ne Jehova e lamo mondo otim dwache. Ka ng’atno osesingore ne Jehova, jachan bura mar jodongo biro timo chenro mondo jodongo moko ariyo owuo kode e wi “Penjo Mipenjo Jogo ma Dwaro Mondo Obatisgi.” Achiel kuom jodongogo biro wuoyo kode e kare mokwongo to machielo biro wuoyo kode e kare mar ariyo. Ok ochuno ni nyaka land wach chokruok mar alwora kata chokruok maduong’ ma biro e ka tim chenro mar nono penjogo.

Penjogo opog e kidienje ariyo ma moro ka moro kuomgi inyalo non kuom sa achiel kama. Kata kamano, ok oket chik ni ok nyal ti gi seche mokalo achiel ka mano dwarore. Onego chak kendo tieko nono penjogo gi lamo. Ok onego oter ng’wech ng’at ma dwaro ni obatise kata jaduong’-kanyakla ma nono kode penjogo. Jodongo momi migawono onego omi migawono thuolo mokwongo e chenrogi.

Kinde duto, ber nono penjogo mana gi ng’ato achiel ma dwaro ni obatise, to ok ji mang’eny karachiel. Kuom miyo ng’at ma dwaro ni obatise thuolo mar wuoyo e wi penjogo duto, jodong-kanyakla nyalo neno maler okang’ ma owinjogo tiend gik mosepuonjore, kendo mano biro konyogi fwenyo ka adier owinjore ni obatise kata podi. E wi mano, ng’at ma dwaro ni obatiseno nyalo bedo thuolo wuoyo ka en ng’at achiel. Dichwo gi dhako ma okendore inyalo penj penjogo ka gin kanyachiel.

Ka po ni jalendo mokwayo mondo obatise en nyaminwa, onego onon kode penjo mag batiso e lela ka ma ji nyalo nenogie, kata kamano, onego gibed ka ma ji ok winj gik ma giwacho. Ka ng’at momi migawono dwaro ni ng’at machielo okonye, ng’at ma konyeno onego obed jaduong’-kanyakla kata jakony-tich ka luwore gi kidieny ma idhi non mana kaka oler e paragraf ma luwo mae.

E kanyakla ma jodong-kanyakla nokie ahinya, inyalo kwa jokony-tich mowinjore mondo ginon penjo e wi puonj madongo mag Muma kanyachiel gi jogo ma dwaro mondo obatisgi. Penjogo yudore e “Kare Mokwongo: Puonj ma Jakristo Oyiego.” Jodongo e ma onego omi migawo mar timo “Kare mar 2: Ngima Jakristo.” Ka po ni kanyakla onge gi owete moromo monego otim migawoni, ginyalo tudore gi jarit-alwora mondo gine ka jodong-kanyakla man machiegni nyalo konyogi.

Ka ngat ma idhi batisi en nyathi, jonyuolne kata janyuolne onego obed kode sa ma inono kode penjogo. Ka po ni jonyuolne kata janyuolne ok nyal bedoe, jodong-kanyakla ariyo (kata jaduong’-kanyakla gi jakony tich, ka luwore gi kidieny ma inono kode) nyalo bet kode.

Jodong-kanyakla biro neno ni ng’at ma dwaro ni obatise ong’eyo e okang’ moromo puonj mag Muma ma ng’ato chako ng’eyogo Nyasaye. E wi mano, onego ginon mondo ging’e ka jalendo ma dwaro ni obatiseno ohero adiera gi chunye duto kendo nyiso luor mowinjore ne riwruok mar oganda Jehova. Ka ng’atno ok winj tiend puonj mag Muma ma ng’ato chako ng’eyogo Nyasaye, jodongo biro timo chenro mar miye kony ma dwarore mondo obi obed moikore ne batiso bang’e. Nitie jo moko ma nyalo dwarore ni omi thuolo moromo mondo ginyis ni gihero tij yalo, kata bolruok ne chenro ma oket e riwruok mar oganda Jehova. Jaduong’ ka jaduong’ nyaka par maber kaka obiro tiyo gi sa ma dirom achiel mar nono penjogo mondo ong’e maber chuth ka ng’at ma dwaro ni obatiseno owinjore obatise. Kata obedo ni nono penjo moko nyalo kawo thuolo moloyo mamoko, penjo duto nyaka non.

Bang’ kosenon kare mar ariyo mag penjo mipenjo ng’at ma dwaro ni obatise, jodongo ma ne omi migepe mag nono penjo kodego biro romo mondo gine ka be owinjore obatise kata podi. Jodongo biro nono weche kaka, pon mar ng’ato, nyalo mare, kod weche mamoko e wi ng’ato ka ng’ato ma dwaro ni obatise. Dwaro marwa en yudo jogo ma oseloko chunygi ne Jehova kendo mosewinjo tiend adiera mag Muma. Kony ma umiyo jogo ma dwaro ni obatisgi e yor hera, biro miyo gibed moikore ne tich maduong’ mar yalo wach maber.

Bang’e, achiel kata ariyo kuom jodongo ma ne omi migawono onego orom gi ng’at ma dwaro ni obatiseno mondo ginyise ka be oseyiene mondo obatise kata podi. Ka owinjore obatise, jodongogo onego owuo kode e wi “Weche Mogik Miwacho gi Jogo ma Dwaro ni Obatisgi,” ma yudore e ite mag 206-207. Ka po ni ng’at ma dwaro ni obatise pok otieko puonjore bug Inyalo Dak gi Mor Nyaka Chieng’!, jodongo onego ojiwe mondo otieke bang’ kosebatise. Nyis ng’at madwaro ni obatise ni tarik mar batiso mare ibiro ndik e Rekod mar Jalendo mondikie nyinge. Parne ni Jodongo kawo wechego kuom jalendo mondo okony riwruogwa e chopo migawo mag Joneno mag Jehova e tijgi mar siro weche mag Pinyruoth mondo jalendo obed gi yot mar tiyo ne Nyasaye, kendo yudo kony ma dwarore e loso winjruokne gi Nyasaye. E wi mano, jodongo biro paro ne jolendo manyien-go ni wechego ibiro kan kendo tigo ka luwore gi weche mondik e Global Data Protection Policy of Jehovah’s Witnesses, manie jw.org. Migawono onego okaw mana dakika apar kata matin ne mano.

Higa achiel bang’ kosebatis jalendo, jodongo ariyo onego orom kode mondo gijiwe ka ging’adone paro ma nyalo konye. Achiel kuom jodongogo onego obed jarit-grup ma jalendono wuokie. Ka jalendono pod en nyathi, jonyuolne ma gin Joneno bende onego obedie. Romono onego obed ma iye mor kendo ma jiwo jalendono. Jodongo biro wuoyo kode e wi dongruok momedo timo e winjruokne gi Nyasaye kendo miye paro ma nyalo konye dhi nyime bedo gi chenro maber mar timo puonjruok ma mare owuon, somo Muma pile, bedo gi lamo mar joot juma ka juma, dhi e chokruogewa ma ok obare, kod dhi e tijwa mar yalo juma ka juma. (Efe. 5:15, 16) Ka po ni pok otieko puonjore bug Inyalo Dak gi Mor Nyaka Chieng’!, jodongo onego ochan mondo ng’ato okonye tieko bugno. Jodongo onego opwoye ahinya. Kinde mang’eny, puonj kata paro moro achiel kata ariyo nyalo romo aroma.