APENDIKS

Ne Jonyuol ma Jokristo:

Onge kiawa ni kaka janyuol, diher konyo nyithindi mondo gin bende giher Jehova kendo gichiwrene nikech igenogi ahinya. En ang’o minyalo timo mondo ikonygi gichop e batiso? Ibiro ng’eyo nade ni gisechopo e okang’ ma koro giwinjore gi batiso?

Yesu nochiko jolupne niya: “Ulok ji obed jopuonjrena, kubatisogi.” (Mat. 28:19) Ka luwore gi wachno, gima duong’ ma miyo itiso ng’ato en ni mondo obed japuonjre Yesu. Japuonjre en ng’at molony gi puonj mag Kristo kendo moyie gi puonjgo. Bende, oluwo puonjgo adimba. To ma en gima nyalore kata ne jowa ma pod tindo.

Ket ranyisi maber ne nyithindi kendo ipuonjgi weche Jehova. (Rap. 6:6-9) Mano oriwo puonjogi ka watiyo gi bug Inyalo Dak gi Mor Nyaka Chieng’! Bugno biro konyogi mondo ging’e malong’o adiera ma ji chako ng’eyogo Nyasaye kendo gichak ng’eyo kaka ginyalo tiyo gi puonj mag Muma e ngimagi. Kony nyithindi mondo ging’e kaka ginyalo lero ne jomoko puonj mag Muma ka gitiyo gi wechegi giwegi. (1 Pet. 3:15) Puonj kod jip ma giyudo kuomi kod puonjruok ma margi giwegi, lamo mar joot, chokruoge mag kanyakla, kod osiepe mabeyo, biro konyogi timo dongruok mi gichop e batiso kendo gimed timo dongruok. Konygi ng’eyo chenro ma ginyalo keto mondo obi okonygi tiyo ne Nyasaye e okang’ momedore.

Ngeche 20:11 wacho niya: “Kata mana nyathi ing’eyo gi timbene, ka be timbene ni kare kendo ler.” Gin timbe kaka mage ma nyalo nyiso ni nyathi osebedo japuonjre Yesu Kristo kendo ni koro owinjore obatise, bed ni en wuowi kata en nyako?

Nyathi ma timo dongruok kendo ma digomb ni obatise onego oluw kaka jonyuolne kata janyuolne chike. (Tich 5:29; Kol. 3:20) Muma wuoyo kuom Yesu ka ne en jahigni 12 niya: ‘Nodhi nyime luwo kaka ne jonyuolne chike.’ (Luka 2:51) En adier ni ok inyal geno ni nyathini ok bi both e yo moro. Kata kamano, nyathi ma diher ni obatise biro temo ahinya luwo ranyisi mar Yesu kendo onego ong’ere kaka nyathi ma bolorega ne jonyuolne.

Bende, obiro nyiso gombo ma en-go mar medo lony gi adiera manie Muma. (Luka 2:46) Be nyathini ohero dhi e chokruogewa kendo chiwo paro kuno? (Zab. 122:1) Be en gi siso mar somo Muma pile kotimo puonjruok ma mare owuon?​—Mat. 4:4.

Nyathi ma timo dongruok kendo ma diher ni obatise temo ahinya keto weche Pinyruoth obed mokwongo e ngimane. (Mat. 6:33) Okawo mapek ting’ ma en-go mar dhi e tij yalo. Oriwo lwedo yore duto ma watiyogo e yalo kendo wiye ok kuod nyiso jopuonjne kod jo skul wetene ni en achiel kuom Joneno mag Jehova. Okawo mapek migepe momiye e Chokruok mar Ngimawa kod Tijwa Kaka Jokristo.

Bende, obiro temo ahinya mondo osik ka en gi timbe maler kendo tang’ gi osiepe maricho. (Nge. 13:20; 1 Kor. 15:33) Mano biro nenore kuom kit thumbe mowinjo, sinembe moneno, program mag TV morango, tuke mag vidio motugo, kod kuonde websait modhiye e Intanet.

Nyithindo mang’eny oseluwo kaka jonyuolgi ma jokinda konyogi kendo gisemakore motegno gi adiera mi gichopo e batiso ka pod gin rowere. Mad Jehova omed guedhou sa mukonyo nyithindu mondo gichop e okang’ maduong’ ahinyani mar medo gero winjruokgi gi Jehova.

Ne Jalendo ma Pok Obatis:

En thuolo ma jaber tiyo kanyachiel gi kanyakla kaka jalendo ma pok obatis. Dongruok ma isetimo e Wach Nyasaye en gima ipwoyo ahinya. Puonjruok Wach Nyasaye osemiyo ing’eye, kendo isenyiso yie kuom singoge.​—Joh. 17:3; Hib. 11:6.

Ka ne pok ichako puonjori gi Joneno mag Jehova, nyalo bedo ni ne in e din machielo kata ne ionge e din moro amora. Kata nyalo bedo ni ne itimo timbe moko ma ok winjre gi puonj mag Muma. Kata kamano, sani koro isenyiso yieni kuom loko chunyi ia e richo kinyisogo ni iywago ang’e kuom kethoni machon, kendo isenyiso yie mari kuom loko kit ngimani kinyisogo ni iseweri gi timbe maricho kendo iseng’ado mar timo gik makare e wang’ Nyasaye.​—Tich 3:19.

E yo machielo, nyalo bedo ni “chakre ka ne in nyathi matin ahinya, isebedo king’eyo ndiko maler.” Mano osekonyi mondo kik idonj e yore ma ok owinjore gi Jakristo kata donjo e richo moro maduong’. (2 Tim. 3:15) Iseng’eyo kaka inyalo kwedo timbe maricho mag mbeseni kod tembe moko ma ywayo ji mondo gitim gik ma ok beyo e wang’ Jehova. Isenyiso yie kuom chung’ motegno e lamo makare kendo puonjo jomoko weche mabeyo misepuonjori e Muma. Osetiegi ne tij Nyasaye ma Jokristo timo. Koro iseyiero kendi iwuon tiyo ne Jehova kaka jalendo ma pok obatis.

Bed ni ne ing’eyo Jehova bang’e kata ne otiegi ng’eyo yorene chakre ka ne in nyathi matin ahinya, koro nyalo bedo ni idwaro kawo okenge ariyo momedore e loso winjruokni gi Nyasaye. Okengego gin: chiwo ngimani ne Nyasaye kod batiso. Ere kaka inyalo nyiso ni ichiwo ngimani ne Nyasaye? Inyalo timo kamano kuom wuoyo gi Nyasaye e lamo kisingorine ni ibiro tiyo gi ngimani e tije kendo ni en kende e ma ibiro lame kitiyone nyaka chieng’. (Mat. 16:24) Ibiro nyiso ni isechiwo ngimani ne Nyasaye kokalo kuom batiso e i pi. (Mat. 28:19, 20) Kokalo kuom chiwruok kod batiso, koro ibedo jatich mowal mar Jehova Nyasaye. Donge mano en thuolo ma jaber miwuoro?

To mana kaka isepuonjori e Muma, ibiro romo gi tembe mopogore opogore. Ng’e ni mapiyo ka ne osebatis Yesu, “roho nomiyo Yesu odhi nyaka e thim ka ma Jachien ne otemee.” (Mat. 4:1) Bang’ batiso mari kaka japuonjre Kristo, ng’e ni ibiro romo gi tembe moko. (Joh. 15:20) Tembego nyalo bironi e yore mopogore opogore. Inyalo romo gi akwede ma wuok kuom joodu. (Mat. 10:36) Jo skul weteni, jotich weteni, kata osiepeni machon nyalo jari. Kinde duto, par weche ma Yesu nowacho e Mariko 10:29, 30 niya: “Adier awachonu ni, onge ng’at moweyo ode, kata owetene, kata nyiminene, kata min-gi, kata wuon-gi, kata nyithinde, kata puothene, nikech an kendo nikech wach maber, ma ok bi yudo nyadi 100 momedore gie ndalogi​—ute gi owete gi nyimine gi mine gi nyithindo kod puothe kaachiel gi sand​—kendo e ndalo ma biro, ngima mochwere.” Kuom mano, dhi nyime tiyo matek mondo isik machiegni gi Jehova kendo mondo idag ka luwore gi chike kod puonjne makare.

Kochopo kinde ma idwaro ni mondo obatisi, nyis jachan buch jodongo. Jodongo biro wuoyo kodi ka gitiyo kod penjo ma oket bang’ sula misomoni mondo gine ka be owinjore obatisi. Bende, inyalo chako nono penjogo chon e chenro mari mapile mar puonjruok.

Sa ma iikori mar nono penjogo gi jodongo, kaw thuolo mondo isom kendo ipar matut kuom Ndiko duto moket. Kihero, inyalo ndiko wecheni mamoko e i bugni kata mana ka machielo. Inyalo tiyo gi weche misendikogo kendo ok ochuno ni ium bugni sa ma ugoyo mbaka gi jodongo. Ka po ni ok iwinj tiend penjo moro e yo maber, bed thuolo mondo ipenj ng’at mupuonjorugo Muma kata ipenj jodongo.

Seche ma unono penjogo gi jodongo, kik ipar ni nyaka ichiw dwoko e yo malach kitiyo gi weche mathoth. Kinde mang’eny, dwoko ma achiel kachiel kendo kitiyo gi wecheni iwuon ber ahinya. Bende, thoth penjogo biro dwaro ni ichiw dwoko kitiyo gi Ndiko achiel kata ariyo ma nyiso ni dwokonino luwore gi paro kod puonj manie Muma.

Ka po ni jodongo oyudo ni pok ilony gi puonj mag Muma e okang’ mowinjore, gibiro timo chenro mondo omed konyi winjo tiend Ndiko mondo ibed gi nyalo mar tiyo gi wecheni iwuon e lerogi, e ka ibi ibed moikore ne batiso e kinde ma biro.

[Ne jodong-kanyakla: Weche monego otau sa ma unono gi ng’ato penjo mag batiso yudore e ite mag 208-212.]