Jehova Tiegowa ne Tijni
1. Seche ma Jehova miyo dhano migawo moro, ang’o bende motimo?
1 Seche ma Jehova miyo dhano migawo moro, omiyogi bende kony madwarore e chopo migawono. Kuom ranyisi, kane Jehova onyiso Noa ni oger yie, ma en gima Noa ne pok otimo e ngimane, nonyise kaka ne odhi gero yieno. (Chak. 6:14-16) Kane Jehova omiyo Musa, jakwath ma ne muol ahinya, migawo mar dhi e nyim jodongo mag Israel kod Farao, nojiwe kama: “Nabed gi dhogi, kendo anapuonji gi ma iniwachi.” (Wuok 4:12) E migawo marwa mar lando wach maber, Jehova osenyisowa yore mwanyalo chopogo tijno. Otiegowa ne tijni kokalo kuom Skul mar Tij Nyasaye kod Chokruok mar Tijwa. Ere kaka wanyalo yudo ber kuom tiegruok ma wayudogi?
2. Ere kaka wanyalo yudo ber e Skul mar Tij Nyasaye?
2 Skul mar Tij Nyasaye: Non gik ma idhi puonjruok kapok idhi e chokruok. Mani biro miyo imed lony mari e puonjo seche miwinjo ka jopuonjre tiyo gi weche ma ne ipuonjori e golo twege momigi. (Nge. 27:17) Ting’ bugi mar Shule ya Huduma kendo iti kode. Seche ma jarit-skul tiyo gi bugno bang’ ka japuonjre moro osegolo twak, kiew weche madongo ma diher tiyogo kendo iti gi kuonde mani nono e ndiko weche manyalo konyi. Kata kamano, yo minyalo yudogo ber ahinya e skundni en ka ibedo achiel kuom jopuonjre e skundno. Be isedonjo e skundno? Seche ma iyudo migawo mar golo twak, ikri maber kendo iti gi weche mipuonjori e somo moro. Seche ma in e tij lendo, ti gi gik ma ne ipuonjori.
3. Ang’o mabiro konyowa yudo ber e Chokruok mar Tijwa?
3 Chokruok mar Tijwa: Gima biro konyowa ahinya paro weche minyisowa e chokruogni en somo motelo gik ma wadhi puonjore kaachiel gi iko paro ma wadhi chiwo. Kapo ni wachiwo paro machuok, jomoko bende biro yudo thuolo mar chiwo paro. Chik iti malong’o seche ma itimo ranyisi, kendo iti gi paro manyalo miyo imed lendo e yo molony. Kan maber gocho mag Tijwa mar Pinyruoth mibiro tiyogo e kinde mabiro.
4. Ang’o momiyo onego wati gi yore ma Nyasaye tiegowago?
4 Mana kaka migepe ma ne omi Noa kod Musa, migawo marwa mar lando wach maber e piny ngima ok yot. (Math. 24:14) Wanyalo chope e yo maber ka wageno kuom Jehova, Japuonjwa Maduong’, kendo tiyo gi yore motiegowago.—Isa. 30:20.