Chenro mar Skul mar Tij Nyasaye ma 2015 Olos Mondo Okonywa Medo Lony e Puonjo

¹ Daudi ne ondiko kama kowuoyo kuom Jehova: ‘Mi weche me dhoga gi paro mabudhogo e chunya obed mimorgo, A Jehova, Lwandana kod Jawarna.’ (Zab. 19:14) Wan bende dwaher ni weche me chunywa obed ma moro Jehova, nikech wahero thuolo ma wan-go mar wuoyo kuom adiera sama wan e kanyakla kod e tij lendo. Jehova tiyo gi Skul mar Tij Nyasaye mondo otiegwa ne lendo. E piny mangima sani, skundni itimo juma ka juma e kanyakla makalo 111,000. Skul mar Tij Nyasaye osekonyo owete gi nyimine e piny mangima mondo gibed molony e puonjo ji wach maber e yo mang’won, mariek, kendo gi chir.​—Tich 19:8; Kol. 4:6.

² Chenro mar skul ma higa 2015 oting’o weche mawuok e “Puonj Manie Wach Nyasaye” kod “Thuond Weche Manie Muma Minyalo Wuoyoe.” E wi mago, nitie lokruok motim ne thuolo ma ibiro mi migepe mag Somo mar Muma kod Twak Na. 1. Lokruogegi duto kod kaka onego otim migepe mamoko mag skul oler e paragraf maluwogi.

³ Puonj Mayudore e Somo mar Muma: Owete ma omi migawoni onego oti gi dakika ariyo mokwongo e nono wach kata puonj achiel mayudore e somo mar Muma ma jumano. Nyaka giikre maber mondo gichiw puonj mochwiny kuom thuolo ma omigino. Bang’ mano, gibiro miyo jowinjo thuolo mar dakika auchiel mag wacho puonj ma giseyudo e somo mar Muma ma jumano, ka ng’ato ka ng’ato timo mano kuom nus dakika kata matin ne mano. Wacho weche ma puonjo ji kuom nus dakika en gima dwaro ikruok kod chanruok maber, kata kamano, omiyowa tiegruok maber korka rito sa. Timo mano bende miyo ji bwora thuolo mag wacho puonj ma giyudo e somo mar Muma.

⁴ Twak Na. 1: Thuolo mochiw ne somo Muma koro odwok piny nyaka dakika adek kata matin ne mano, kendo weche misomogo biro bedo mana machuok. Joma omi twagni onego otiegre nyadinwoya, ka gitimo kamano gi dwol ma malo. Onego gine ni giluongo weche kare kendo somo e yo ma lolore mondo tiend weche ma gisomogo owinjre maler. Jotich Jehova duto onego otim kinda mondo gimed lony e somo, nikech somo en gima dwarore ahinya e od Jehova ka. To mano kaka wamor nikech nyithindwa mang’eny ong’eyo somo maber! Wapwoyo jonyuol ma timo kinda e konyo nyithindgi mondo obed josomo molony.

⁵ Twak Na. 2: Ma en twak ma kawo dakika abich, to imiye nyimine. Ng’ama omi twagni onego ojiw mana wi twak momiye. Ka weche mag twagni ogol e buk mar Puonj Manie Wach Nyasaye kata Thuond Weche Manie Muma Minyalo Wuoyoe, onego onyis kaka wechego inyalo tigo e yo maber kendo ma konyo e tij lendo e alworau. To ka twagni wuoyo kuom ng’ato e Muma, to ok oket buk ma wechego yudoree, japuonjre onego otim nonrone owuon e bugewa mondo oler puonj ma wayudo kuom ng’atno. Jarit-skul biro miyo jagol-twagno ng’at machielo mondo gikonyrego.

⁶ Twak Na. 3: Ma en twak ma kawo dakika abich ma inyalo mi owete kata nyimine. Ka twagni omi nyimine, onego gigole kaka igolo Twak Na. 2. To ka omiye owete, to iwuoyo kuom ng’ato e Muma, onego gigole ka gichung’ e nyim jowinjo. Owadwa kata nyaminwa ma omi migawoni onego otem matek mondo oyier ndiko mabiro jiwo wijno e yo maber, kendo onyis gik ma wapuonjore kuom ng’at miwuoyo kuomeno.

⁷ Twak Na. 3 ma Owete Golo e Yo Makende: Ka weche twagni ogol e bug Puonj Manie Wach Nyasaye, onego ogole kaka ranyisi mar lamo mar joot kata tij lendo. Jarit-skul biro miyo jagol-twagno jal ma gikonyorego, kendo obiro yierone ni ogol twagno kaka lamo mar joot koso kaka tij lendo. Jal ma gikonyoregono onego obed nyathine kata chiege kata owadwa machielo e kanyakla. Jagol-twak nyalo yiero tiyo gi ndiko mamoko e lero puonj mag Muma motudore gi wijno. Kinde ka kinde, jodong-kanyakla bende inyalo mi twagni. Ka omi jodongo twagni, ginyalo yiero joma konyogi gin giwegi kod kaka digiher gole. Wan gadier ni owete gi nyimine biro mor ahinya neno kaka jodongo puonjo molony ka gigolo twak gi joutegi kata gi owete mamoko e kanyakla.

⁸ Chiwo Paro ne Jopuonjre: Jarit-skul biro tiyo gi dakika ariyo e chiwo paro ma gero ji duto kuom gik ma japuonjre otimoe maber kotiyo gi weche manie bug Skul mar Tij Nyasaye. Sama jarit-skul luongo japuonjre e ndiri, ok obi wacho somo mar lony ma japuonjreno tiegoree. Kata kamano, bang’ twak, jarit-skul biro pwoyo japuonjreno, kae to owacho somo ma japuonjreno ne tiegoree, kendo nyise kuonde ma otimoe maber, kata onyalo nyiso japuonjreno kuonde ma onyalo medo timoe dongruok.

⁹ Fom moting’o puonj mag lony yudore e bug Skul mar Tij Nyasaye, ite mag 79 nyaka 81. Bang’ ka japuonjre osetieko migape, jarit-skul nyalo ndikone paro moko mowinjore e bugeno, kendo obiro penje ka en kar kende, ka be ne otimo tiegruok mayudore e giko puonj mar lony ma ne ing’iyeeno. Jarit-skul onego opwo jopuonjre duto kuom kuonde ma gitimoe maber kendo miyogi paro ma nyalo konyogi timo dongruok moloyo, kotimo kamano bang’ chokruok kata e kinde machielo mowinjore. Timo kamano en yo maber ahinya mar konyo japuonjre ka japuonjre mondo otim dongruok maber e puonjo wach Nyasaye.​—1 Tim. 4:15.

¹⁰ Ka jagol-twak moro amora okalo sa ma oket ne migape, jarit-skul kata owadwa machielo ma konye onego odwong’ gimoro ma winjore maler mondo japuonjre ong’e ni sane orumo. Sama odwong’ gino, japuonjreno onego otiek sentens ma ne oriko owacho sama owinjo gino, kae to owuog e ndiri.​—Ne bug Skul mar Tij Nyasaye ite mar 282, par. 4.

¹¹ Ijiwo ji duto manyalo mondo odonj e Skul mar Tij Nyasaye. (Ne bug Skul mar Tij Nyasaye ite mar 282, par. 6.) Tiegruok ma wanwang’o e skundni osekonyowa kaka jotich Jehova mondo wapuonj kendo waland ne ji duto wach Pinyruoth gi chir, e yor mong’ith, kendo mang’won. En adier ni Jehova mor gi jogo duto ma pako nyinge ka gitiyo gi tiegruok ma giseyudo kokalo kuom chenro moketo mar puonjo joge!​—Zab. 148:12, 13; Isa. 50:4.