Weche Matayo Chokruok mar Ngimawa kod Tijwa Kaka Jokristo

Weche Mantie

• Weche Michakogo

• Mwandu ma Yudore e Wach Nyasaye

  • Twak 3

  • Puonj Manie Wach Nyasaye 4

  • Somo Muma 5

• Tiegri ne Tij Lendo 6-14

  • Chako Mbaka 7

  • Dok Limbe 8

  • Loko Ji Obed Jopuonjre 9

  • Lero Yieni 10

  • Twak 11

  • Wach Miwuoyoe 12

  • Yore mag Lendo 13

  • Kaka Onego Oti gi Vidio kod Buge 14

• Ngimawa Kaka Jokristo 15-16

  • Puonjruok Muma e Kanyakla 16

• Weche Mitiekogo 17

• Pwoch kod Paro Michiwo ne Japuonjre 18

• Rito Sa 19

• Limbe mar Jarit-Alwora 20

• Juma Mitimoe Chokruogewa Madongo 21

• Juma Mitimoe Rapar 22

• Jarit Chokruok mar Ngimawa kod Tijwa Kaka Jokristo 23

• Jakom mar Chokruok mar Ngimawa kod Tijwa Kaka Jokristo 24

• Jatieg Jogol-Twak 25

• Klese Mamoko 26

• Vidio 27

1. Weche mantie kaegi e ma biro tayo ji duto ma nigi migepe e chokruok mar Ngimawa kod Tijwa Kaka Jokristo. Joma nigi migepe onego oluw weche matayo kaka onego otim migawo ka migawo mana kaka onyis e bug Chenro mar Ngimawa kod Tijwa, kod weche mondik kaegi sama giiko migepegi. Onego ojiw jolendo duto mondo gidonj e chenro mar timo migepe mag jopuonjre. Jomamoko ma pok obedo jolendo to gibiroga e chokruogewa bende inyalo yienegi timo migepe mag jopuonjre, ka po ni giyie gi puonj mag Muma, kendo kit ngimagi nyiso ni gitiyo gi puonjgo. Ka nitie ng’at ma diher timo migepe to pok obedo jalendo, Jarit Chokruok mar Ngimawa kod Tijwa Kaka Jokristo onego onon kode weche ma dwarore kuom joma timo migepe, kae to onyise ka be ochopo wechego. Jaritno onego otim kamano ka gin gi japuonjne mar Muma (kata janyuol ma en Janeno). Gik ma dwarore kuom ng’at ma kamano chalre gi ma dwarore kuom ng’at ma dwaro bedo jalendo ma pok obatisi.—od sula mar 8 par. 8.

WECHE MICHAKOGO

2. Dakika achiel. Juma ka juma, bang’ wer gi lamo michakogo, jakom mar chokruok mar Ngimawa kod Tijwa Kaka Jokristo biro miyo ji siso ne weche ma idhi puonj e chokruok. Jakom onego ojiw weche ma biro konyo kanyakla moloyo.

MWANDU MA YUDORE E WACH NYASAYE

3. Twak: Dakika apar. Wi twak kod weche ariyo kata adek ma twagni losoe yudore e Chenro mar Ngimawa kod Tijwa. Jaduong’-kanyakla e monego ogol twagni kata jakony-tich mowinjore. Sama wachako buk manyien e somo mar Muma ma juma ka juma, onego okwong otug ne jowinjo vidio mar weche michakogo bugno. Jagol-twak nyalo tiyo gi vidio e jiwo wi twak. Kata kamano, onego one ni owuoyo e wi puonj moketne e yo machuok e bwo migawono. Bende, ka thuolo nitie, onego oti gi pichni motudore gi wich ma owuoyoe. Onyalo tiyo gi buge mamoko tek mana ni gijiwo wach maduong’ mowuoye.

4. Puonj Manie Wach Nyasaye: Dakika apar. Migawoni en mar penjo gi dwoko mitayo gi jaduong’-kanyakla kata jakony-tich mowinjore. Onego ochak penjo penjogo achiel kachiel, tiende ni ok onego oik weche mochakogo kata motiekogo. Onego openj penjo ariyogo duto. Bende, onyalo yiero ka be ibiro som ndiko moket e penjo kata ooyo. Joma chiwo paro onego oti gi nus dakika kata matin ne mano.

5. Somo Muma: Dakika ang’wen. Ma en migawo ma imiyo joma chwo. Owadwa momi migawono biro somo achiel kachiel ma ok otiyo gi weche mochakogo kata motiekogo. Gik ma jakom biro nono ahinya mondo okony owete ma timo migawoni gin: Neno ni gisomo weche kaka ondikgi, gisomogi e yo ma winjore maler, e yo ma lolore maber, gijiwo tiend weche kare, giloko dwondgi kaka dwarore, giling’ matin kaka owinjore, kendo giwuoyo e yo ma pile. Nikech migawo mar somo Muma nyalo bedo machuok kata ma rabora, jarit Chokruok mar Ngimawa kod Tijwa Kaka Jokristo nyalo pogo migawono ne japuonjre ka luwore gi nyalone.

TIEGRI NE TIJ LENDO

6. Dakika apar gabich. Kidienyni olos mondo omi ji duto thuolo mar tiegore ne tij lendo mondo gimed lony e wuoyo gi ji sama gilando wach maber kendo puonjo ji. Jodongo bende inyalo mi migepe mag jopuonjre ka mano dwarore. Japuonjre ka japuonjre onego otiegre e somo ma yudore e brosua mar Somo kod Puonjo kata brosua mar Her Ji moket e bath migape e Chenro mar Ngimawa kod Tijwa. Nitie kinde ma wabiro bedo gi migawo mar wuoyo e kare mar Tiegri ne Tij Lendo. Migawo ma kamano ibiro tim gi jaduong’-kanyakla kata jakony-tich mowinjore.—Ne paragraf 15 ma lero kaka onego otim migawo mar wuoyo.

7. Chako Mbaka: Migawoni inyalo mi jopuonjre ma chwo kata mon. Ka wuon migawo en ng’at ma dichwo, to jakonyne bende onego obed dichwo. Kamano bende e kaka onego otim ne joma mon. Inyalo mi dichwo gi dhako migawoni mana ka gin joot achiel. Wuon migawo kod jakonyne nyalo chung’ kata bet sama gitimo migawoni.—Mondo iyud weche momedore e wi migawoni, ne paragraf 12 kod 13.

8. Dok Limbe: Migawoni inyalo mi jopuonjre ma chwo kata mon. Ka wuon migawo en ng’at ma dichwo, to jakonyne bende onego obed dichwo. Kamano bende e kaka onego otim ne joma mon. (km-SW 5/97 ite mar 2) Wuon migawo kod jakonyne nyalo chung’ kata bet sama gitimo migawoni. Weche motiyogo onego onyis maler ni odok limo ng’at ma ne osechakogo mbaka.—Mondo iyud weche momedore e wi migawoni, ne paragraf 12 kod 13.

9. Loko Ji Obed Jopuonjre: Migawoni inyalo mi jopuonjre ma chwo kata mon. Ka wuon migawo en ng’at ma dichwo, to jakonyne bende onego obed dichwo. Kamano bende e kaka onego otim ne joma mon. (km-SW 5/97 ite mar 2) Wuon migawo kod jakonyne nyalo chung’ kata bet sama gitimo migawoni. Migawoni onego ochakre ka gima puonjruok ne osegachakore. Onge tiende loso weche michakogo kata mitiekogo, mak mana ka omi wuon migawono somo ma kamano mondo otiegree. Bende, ok ochuno ni nyaka som paragraf duto achiel kachiel. Moko inyalo som, to moko inyalo timruok ka gima osesom.

10. Lero Yieni: Ka en twak, to onego ogole gi japuonjre ma dichwo. Ka en ranyisi, to inyalo time gi japuonjre ma dichwo kata ma dhako. Ka wuon migawo en ng’at ma dichwo, to jakonyne bende onego obed dichwo. Kamano bende e kaka onego otim ne joma mon. Inyalo mi dichwo gi dhako migawoni mana ka gin joot achiel. Japuonjre onego ochiw dwoko ma winjore maler kotiyo gi weche ma yudore e gir timo nonro moket kanyo. Sama japuonjre timo migawoni, onyalo yiero wacho kuonde mogoloe wechene kata ooyo.

11. Twak: Migawoni onego otim gi japuonjre ma dichwo kendo onego ogole kaka twak e kanyakla. Ka twagno ogol e point moro ma yudore e apendiks A e brosua mar Her Ji, japuonjre onego oler kaka wanyalo tiyo gi ndiko moket kanyo e tij lendo. Kuom ranyisi, onyalo lero kinde ma wanyalo tiyoe gi ndikono, tiende, kod kaka wanyalo lere. Ka twagno ogol e point ma yudore e sula moro e brosua mar Her Ji, japuonjre onego onyis kaka wanyalo tiyo gi wachno e tij lendo. Onyalo wuoyo e wi ranyisi ma yudore e point mokwongo mar sula, kata onyalo wuoyo e wi ndiko momedore moket e sulano, ka mano dwarore.

12. Wach Miwuoyoe: Weche manie paragrafni kod ma luwo nyiso kaka onego otim migawo mar “Chako Mbaka” kod “Dok Limbe.” Gima duong’ ma japuonjre onego otim en nyiso ng’at ma olendone wach moro ma yudore e Muma e yo mayot kendo oket mise mar dok limbe. Japuonjre onego oyier wach mowinjore kendo ma mako pach ji. Onyalo yiero chiwo buk moro kata nyiso vidio ma yudore e Gik Mwatiyogo e Puonjo Ji Muma. Kar mako gi wiye weche mobiro wacho sama otimo migape, japuonjre onego otiegre kaka onyalo dewo jomamoko kod kaka onyalo wuoyo e yo mapile.

13. Yore mag Lendo: Japuonjre onego oti gi yore mag lendo e yo mowinjore gi alwora modakie. Kuom ranyisi:

1. (1) Ot ka Ot: Yorni oriwo lendo ot ka ot, bed ni itime aching’, kitiyo gi simo, kata ndiko barua. Bende, oriwo dok limo ng’at ma ne wawuoyogo ka ne walendo ot ka ot.

2. (2) Lendo Sama In e Dijeni: Yorni konyowa tiegore kaka wanyalo lendo e yo mayot bang’ chako mbaka e yo mapile. Inyalo somo ne ng’ato ndiko moro kata nyise ndikono sama in e wuoth, tich, skul, alwora midakie, kata kamoro amora sama in e dijeni mapile.

3. (3) Lendo e Lela: Yorni oriwo lendo gi troli, kuonde ohala, e nderni, kuonde yueyo, kuonde michungoe mtokni, kata kamoro amora ma ji yudoree.

14. Kaka Onego Oti gi Vidio kod Buge: Japuonjre nyalo yiero tugo vidio kata chiwo buk ka luwore gi chal mantie. Ka migawo ma omi japuonjre nigi vidio kata ka japuonjre oyiero tiyo gi vidio, onego owach vidio modwaro tiyogo kae to owuo kuome, to kik otuge.

NGIMAWA KAKA JOKRISTO

15. Bang’ wer, migawoni biro kawo dakika 15 ma seche moko ibiroga pog diriyo. Migawoni biro konyowa tiyo gi Wach Nyasaye e ngimawa. Ka po ni ok onyis achiel kachiel ni en ng’a monego otim migawo moro, jaduong’-kanyakla kata jakony-tich mowinjore nyalo time. Kata kamano, jaduong’-kanyakla e monego otim migawo mar weche mag kanyaklau. Ka en migawo mar wuoyo, jatayo nyalo penjo penjo momedore e wi penjo moketi sama otayo. Weche mochakogo onego obed machuok mondo oyud thuolo moromo mar wuoyo e wi weche madongo kendo miyo jowinjo thuolo mar chiwo paro. Ka nitie ng’at ma onego openj penjo moko, ka nyalore to onego odhi odwok penjogo ka en e ndiri, kar dwokogi kobet e kom.

16. Puonjruok Muma e Kanyakla: Dakika 30. Onego otaye gi jaduong’-kanyakla mowinjore. (Ka po ni jodong-kanyakla nok, jokony-tich molony nyalo tayo migawoni.) Bura mar jodongo e ma onego oyier joma owinjore tayo Puonjruok Muma e Kanyakla. Joma oyier mondo ota migawoni onego otime e yo maber, kendo gine ni ok gikalo sa. Bende, onego gijiw ndiko madongo kendo gikony ji duto mondo one kaka weche mipuonjo nyalo konyogi. Joma oyiergo nyalo yudo ber mathoth ka ginono weche ma yudore e bugewa kata barupe ma lero kaka onego ota migepe mag penjo gi dwoko. (w23.04 ite mar 24, sanduku) Onge tiende ywayo puonjruok ka po ni weche madongo monego ojiw e jumano osewuoye moromo. Ka nyalore, onego owil jotayo kod josomo juma ka juma. Ka jakom mar chokruok okwayo mondo ng’ama tayo Puonjruok Muma e Kanyakla oti gi dakika matin ne moketi, ng’at ma tayono e ma biro neno kaka obiro timo mano. Kuom ranyisi, onyalo yiero mondo kik som paragraf moko.

WECHE MITIEKOGO

17. Dakika adek. Jakom mar Chokruok mar Ngimawa kod Tijwa Kaka Jokristo biro nwoyo e yo machuok moko kuom puonj madongo ma ji opuonjore chieng’no. Kae to onego owuo machuok e wi chokruok ma juma manyien. Ka po ni thuolo nitie moromo, onyalo wacho nying jopuonjre ma biro bedo gi migepe e juma maluwo. Ka po ni ok onyis achiel kachiel ni en lendo mane monego olandi, jakom onego osom barua kata lando ne kanyakla lendo moro amora ma nitie e kar weche mitiekogo. Kata kamano, nitie gik ma ok onego land e ndiri, kaka chenro mar dhi e tij lendo kod timo ler. Kar mano, onego ketgi e bod. Ka dipo ni thuolono ok nyal romo jakom lando wach moro kata somo barua, jakom onego owuo gi owete ma nigi migepe e kidieny mar Ngimawa Kaka Jokristo mondo ging’ad dakika moko. (Som paragraf mar 16 kod 19.) Ibiro tiek chokruok gi wer kod lamo.

PWOCH KOD PARO MICHIWO NE JAPUONJRE

18. Bang’ ka japuonjre osetieko migape, jakom mar chokruok mar Ngimawa kod Tijwa Kaka Jokristo nigi dakika achiel kama, mar pwoyo japuonjre kendo nyise kuonde monego otimie dongruok kotiyo gi point ma nomi japuonjre mondo otimie tiegruok. Sama jakom luongo japuonjre mondo otim migawo mare, ok obi wacho somo ma japuonjreno tiegoree. Kata kamano, ka japuonjre osetieko migape, jakom biro pwoye kae to onyalo wacho somo ma japuonjreno tiegoree konyiso gimomiyo japuonjreno otimo maber kata konyiso dongruok ma pod japuonjreno nyalo timo e somono kod kaka onyalo time. Jakom nyalo wuoyo e wi gik mamoko e migawono ka po ni mano biro konyo japuonjre kata jowinjo. Bende, jakom nyalo chiwo paro momedore kotiyo gi brosua mar Her Ji, brosua mar Somo kod Puonjo, kata bug Skul mar Tij Nyasaye, ka gin kar kendgi bang’ chokruok kata e kinde machielo. Sama otimo mano, onyalo wuoyo kode e wi somo ma notiegoree kata somo moro amora machielo.—Mondo iyud weche momedore e wi tij jarit Chokruok mar Ngimawa kod Tijwa kod tij jatieg jogol-twak, som paragraf mar 19, 24, kod 25.

RITO SA

19. Onge migawo moro amora monego okal sa, to mano oriwo nyaka weche ma jakom mar Chokruok mar Ngimawa kod Tijwa kaka Jokristo chakogo kendo tiekogo. Kata obedo ni Chenro mar Ngimawa kod Tijwa nyiso dakika monego otimgo migepe, ok ochuno ni weg migepe oti gi dakika duto momigi ka po ginyalo timo migapgi e yo maber gi dakika matin ne moket ne migawono. Ka joma nigi migepe okalo sa, jakom mar Chokruok mar Ngimawa kod Tijwa Kaka Jokristo kata jatieg jogol-twak biro wuoyo kodgi e wi wachno ka gin kar kendgi. (Som paragraf mar 24 gi 25.) Chokruogni duto moriwo wende kaachiel gi lamo michakogo kod mitiekogo biro kawo sa achiel gi dakika 45.

LIMBE MAR JARIT-ALWORA

20. E kinde limbe mar jarit-alwora, onego luw program manie Chenro mar Ngimawa kod Tijwa. Kata kamano, kar timo Puonjruok Muma e Kanyakla mochan e jumano, jarit-alwora biro tiyo gi dakika 30 e golo twak. Ka pok jakom mar chokruok ogwelo jarit-alwora mondo ogol twak, obiro nwoyo e yo machuok puonj madongo ma ji oa puonjore chieng’no, kendo obiro wacho gik ma ji biro puonjore e juma ma luwo. Bende, mago e seche ma obiro landoe lendo moro amora ma nitie, kendo somo barua moro amora monego osom, kae to ogwelo jarit-alwora. Ka jarit-alwora osetieko golo twage, obiro tieko chokruok gi wer moyiero owuon. Onyalo yiero owadwa moro mondo otiek gi lamo. Ka kanyakla nigi klese mamoko e dhok achiel achielno, ok onego tim migepe mag jopuonjre e klesego e jumb limbe mar jarit-alwora. Ka kanyakla nigi grup ma tiyo gi dhok machielo, grubno nyalo timo atima chokruogegi e rum machielo. Kata kamano, onego gitiek e wang’ sa mondo giriwre gi kanyakla sama jarit-alwora chako twage.

JUMA MITIMOE CHOKRUOGEWA MADONGO

21. E juma mitimoe chokruok mar alwora kata chokruok maduong’ mar ndalo adek, ok bi tim chokruok moro amora mar kanyakla. Onego opar ne kanyakla ni ginyalo nono weche monego wapuonjre e jumano kigin kata e lamo mar joot.

JUMA MITIMOE RAPAR

22. Ka po ni Rapar obedo e kor juma, ok bi tim Chokruok mar Ngimawa kod Tijwa ma jumano.

JARIT CHOKRUOK MAR NGIMAWA KOD TIJWA KAKA JOKRISTO

23. Bura mar jodongo e ma yiero jaduong’-kanyakla mowinjore obed jarit Chokruok mar Ngimawa kod Tijwa Kaka Jokristo. Jarit chokruok e ma nigi ting’ mar neno ni otim chokruogno kaka dwarore kendo neno ni otim migepe ka luwore gi weche ma nyiso kaka onego otim chokruogni. Jaritno onego otudre maber gi jatieg jogol-twak mondo weche odhi maber. Sama kanyakla oseyudo Chenro mar Ngimawa kod Tijwa, jarit Chokruok mar Ngimawa kod Tijwa Kaka Jokristo biro chano migepe duto mag chokruoge ma kor juma mag dweche ariyogo duto. Mano oriwo migepe mag jopuonjre, migepe ma ok gin mag jopuonjre, kod mag jokom e chokruok ma kor juma e kind owete ma bura mar jodongo osepuodho ne migepego. (Som paragraf 3-16 kod 24.) Sama ochano migepe mag jopuonjre, onego oket e paro hike, ngimane, kod ka be onyalo wuoyo e migawono ka en thuolo. Onego otim kamano seche ma ochano migepe mamoko mag chokruok. Onego ochiw migepego jumbe adek motelo ne odiechieng’ ma ibiro timgie. Onego ochiw migepego kitiyo gi fom mar Migawo e Chokruok mar Ngimawa kod Tijwa Kaka Jokristo (S-89). Jarit Chokruok mar Ngimawa kod Tijwa Kaka Jokristo onego one ni oket kopi ma nyiso chenro mar joma nigi migepe duto e bod mar weche kanyakla. Bura mar jodongo nyalo yiero jaduong’ kata jakony-tich moro mondo okonye. Kata kamano, jodong-kanyakla kende e ma nyalo konye e chano migepe ma ok gin mag jopuonjre.

JAKOM MAR CHOKRUOK MAR NGIMAWA KOD TIJWA KAKA JOKRISTO

24. Juma ka juma, jaduong’ achiel biro bedo jakom mar Chokruok mar Ngimawa kod Tijwa Kaka Jokristo. (Jokony-tich molony bende nyalo tayo migawoni ka po ni jodong-kanyakla nok.) Jakom e ma biro iko weche mochakogo kod motiekogo. En bende e ma obiro gwelo joma nigi migepe e chokruogno duto, to ka jodongo manie kanyaklano nok, en be onyalo timo moko kuom migepego, to ahinya-ahinya migepe ma dwaro mana ni onyis vidio kende to ok wuoye malach. Jakom ok onego owuo mang’eny bang’ migawo ka migawo. Buch jodongo e ma biro yiero jodongo mowinjore gi migawoni. Jodongo mowinjore bedo jokom biroga wilore e migawono. Ka luwore gi chal mar kanyakla, jarit Chokruok mar Ngimawa kod Tijwa Kaka Jokristo inyalo tigo nyading’eny kaka jakom moloyo jodongo mamoko ma bende oseyier. Ka jaduong’-kanyakla owinjore tayo Puonjruok Muma e Kanyakla, mano nyiso ni onyalo bedo jakom. Iparonwa ni jakom onego oti gi weche mang’won kendo ma nyiso hera sama ochiwo paro ne jopuonjre ma oa timo migepe. En ting’ mar jakom bende neno ni chokruok orumo e wang’ sa. (Som paragraf mar 17 kod 19.) Ka ndiri lach moromo kendo jakom diher ni oketne maikrofon machielo e ndiri seche ma ogwelo owete ne migepegi, inyalo timne kamano mondo kik girit mondo owuog e ndiri. Bende, jakom kohero to inyalo ketne mesa motiyogo e ndiri sama japuonjre timo migawo mar somo mar Muma kod sama jopuonjre mamoko timo migepegi mag Tiegri ne Tij Lendo. Mano nyalo miyo gikung sa.

JATIEG JOGOL-TWAK

25. Ka nyalore, ber tiyo gi jaduong’-kanyakla ma en jagol-twak molony e migawoni. Tij jatieg jogol-twak en chiwo paro ma dwarore ne jodongo kod jokony-tich ka luwore gi yo ma gigologo migepegi. Mano oriwo migepe mitimo e Chokruok mar Ngimawa kod Tijwa Kaka Jokristo, twege mag ji duto, tayo Puonjruok mar Ohinga mar Jarito, kod Puonjruok Muma e Kanyakla kaachiel gi somo paragraf. (Som paragraf mar 19.) Ka kanyakla nigi jodongo moromo ma nyalo golo twege kendo puonjo e yo mong’ith, ginyalo wilo jatieg jogol-twak higa ka higa. Ok ochuno ni jatieg jogol-twak ochiw paro ne owete kinde duto ma gitimo migawo moro.

KLESE MAMOKO

26. Ka luwore gi kwan mar jopuonjre manie kanyakla, inyalo pog ji e klese ariyo kata mokalo kanyo. Klas ka klas onego obed gi jatieg jopuonjre, ma ka nyalore to obed jaduong’-kanyakla. Kama jodongo nokie, jakony-tich molony nyalo timo migawono. Bura mar jodongo e ma onego oyier owete mowinjore gi migawono, kendo ging’ad ka be owetego biro wilore juma ka juma. Jatieg jopuonjre onego oluw weche manie paragraf mar 18. Ka po ni kanyakla nigi klas mokalo achiel, onego okwa jopuonjre mondo odhi e klese mamokogo bang’ migawo mar Nono Puonj Manie Wach Nyasaye, manie bwo kidieny mar Mwandu ma Yudore e Wach Nyasaye. Onego giriwre gi kanyakla bang’ ka japuonjre mogik osetieko migape.

VIDIO

27. Nitie vidio moko ma ibiro yier mondo otigo e chokruogni. Ibiro ketgi e JW Library kendo ng’ato nyalo yudogi kotiyo gi simu, tablet, kod gik ma kamago.

© 2023 Watch Tower Bible and Tract Society of Pennsylvania

S-38-LO 11/23