Lend ne “Ji Duto”
1. Ang’o momiyo inyalo wach ni jolendo man gi nyak chalo gi funde molony?
1 Fundi molony nigi gige tich mathoth kendo ong’eyo kinde mowinjore oti gi gir tich moro kod kaka onego oti kode. E yo machalo kamano, wan gi gik mopogore opogore manyalo konyowa chopo tijwa kaka jolendo. Kuom ranyisi, osego brosua mawuoyo kuom weche mopogore opogore mondo okonywa e lendo ne “ji duto.” (1 Kor. 9:22) Kalatas madiere mayudore e gochoni nyiso moko kuom brosuagi, olero joma nogonegi, kendo onyiso kaka inyalo chiw brosuagi.
2. En kinde mane ma wanyalo lendoe gi brosua?
2 Kinde Mowinjore Tiyoe gi Brosua: Fundi tiyo gi gir tich moro ka timo kamano biro konyo. E yo machalo kamano, wanyalo chiwo brosua e kinde moro amora ma waneno ni brosuano dhi konyo ng’ato, to ok mana e dweche monego olend kodgi kende. Kuom ranyisi, kapo ni en dwe milendoe gi bug Muma Puonjo to walendo e gweng’ ma ji ok gin Jokristo kendo ok girwako weche Muma, nyalo bedo maber ka wachiwo brosua mowinjore kae to bang’e wachiwo bug Muma Puonjo ka ng’ato osechako rwako weche mag Muma.
3. Ang’o momiyo onego wabed molony e tiyo gi gige tich ma wan-go mag lendo?
3 Ndiko puoyo jogo molony e tijegi. (Nge. 22:29) Kuom adier, onge tich maduong’ ahinya e kindegi maloyo “tich maler mar wach maber.” (Rumi 15:16, NW) Mondo wabed ‘jotich ma wigi ok kuodi,’ wabiro temo matek mondo wabed molony e tiyo gi gige tich ma wan-go.—2 Tim. 2:15.