Sandug Penjo

◼ Ang’o monego waket e paro kapo ni wadwaro ni riwruok mar oganda Jehova ema odong’ gi mwanduwa moko kata duto ka watho?

Sama ng’ato otho, ok onyal chiko kaka onego joma odong’ oti gi mwandu ma oweyo. (Ekl. 9:5, 6) Omiyo ji mang’eny ndiko wil chon malero kaka ginyalo hero ni opog mwandugi ka gisetho. (2 Ruo. 20:1) Barua ma sirkal oyiegoni nyiso bende ng’ama jal ma ondikeno diher ni okaw kata orit mwanduge kapo ni otho. E pinje mang’eny, ka ok ondik wil, sirkal ema ng’ado kaka ipogo mwandu mag jal mosetho. Kuom mano, ka nitie kaka wadwaro ni oti gi mwanduwa kapo ni watho, kuom ranyisi, ka wadwaro ni riwruok mar oganda Jehova ema okaw mwanduwa moko kata duto, nyalo bedo gima ber ka wandiko wil malero dwachwa, kendo onego wati gi rieko e yiero jal mabiro chung’ ne pogo kata rito mwanduwa.

Jal moyierno nigi ting’ mapek. Kaluwore gi ng’eny mar mwandu mowego, nyalo dwarore ni jalo oti gi thuolo mang’eny e choko mwandugo kendo pogogi. Bende, nitie chike ma sirkal oketo matayo chenro kaka mago. Nitie jomoko e kanyakla maok nyal chung’ ne mwandu e yo mowinjore. Omiyo jal ma wayiero onego obed ng’at ma nyalo tijno, jaratiro, kendo jal moikore luwo kaka wadwaro.—Ne sula mawacho ni “Hekima na Manufaa za Kupanga Urithi wa Mali,” e Amkeni! ma Desemba 8, 1998.

Kapo ni Ng’ato Okwayi Mondo Ichung’ ne Mwandune Kotho: Kapo ni ng’ato okwayi mondo ichung’ ne mwandune kotho, gima onego ikwong timo en lamo kendo nono kabe inyalo kawo ting’no. (Luka 14:28-32) Bang’ ka jalo osetho, biro dwarore ni inyis ji duto mondik nyinggi e wil gik monego opognegi. Bang’ ka isetimo mano, in ema ibiro bedo gi ting’ mar pogogi kaluwore gi chik sirkal kod kaka jal mothono nondiko e wil. Bed ni mwandu mowego ng’eny kata tin, jal mochung’ ne mwandugo onego ong’e ni oonge ratiro mar pogogi kata tiyo kodgi mopogore gi kaka ondiki. Mwandu moro amora mondik e nying mopwodhi ma Joneno mag Jehova tiyogo gin chiwo ne riwruok mar oganda Jehova.—Luka 16:10; 21:1-4.