Jehova Guedhoga Joma Golo Chiwo gi Chuny Mohero

JACHUECHWA osemiyowa mich moro maber ahinya, ma en thuolo mar timo yiero magwa wawegi. E wi mano, oguedhoga joma tiyo gi thuolono e siro lamo madier, kod joma timo duto ma ginyalo mondo giket nyinge obed maler kendo riwo lwedo dwache. Jehova ok dwar joma luwo aluwa chikene mana nikech ochun-gi. Kar mano, ogeno ahinya joma tiyone nikech gihere kendo gigene.

Kuom ranyisi, kane Jo-Israel nie thim mar Sinai, Jehova nonyisogi ni giger kar lamo. Nonyisogi kama: “Kawuru gi michiwo ni Jehova e kindu; ng’ato man gi chuny mar hera, okel gi michiwo ni Jehova.” (Wuok 35:5) Ng’ato ka ng’ato e oganda Israel ne nyalo chiwo gima onyalo golo, kendo chiwo ma nogol maonge achunego ne inyalo tigo e yo mowinjore mondo ochopgo dwach Nyasaye bed ni chiwono ne en ang’o kata norom nade. Jo-Israel notimo nang’o?

‘Ng’ato ka ng’ato ma chunye nojiwore’ kendo “ng’ato ka ng’ato ma chunye noyie” nogolo chiwo maonge achune kendo gi ‘chuny mohero.’ Chwo gi mon nokelo gik moko ma ne idhi tigo e tij Jehova. Ne gikelo rachwope, stadi, tere, dhahabu, fedha, mula, law ma rambulu, marathuol, makwar, law katani mayom, yie diek, piende im mobuki gi rangi makwar, piende goche, yiend shitta, kite mabeyo, kod mo. Gikone, “gik ma ne gingo noromo loso tich duto, moloyo.”—Wuok 35:21-24, 27-29; 36:7.

Gima nomoro Jehova ne en chuny ma jogo nogologo chiwogo mondo osirgo lamo madier to ok gik mathoth ma ne okel. Bende, ne gichiwore mondo giti gi thuologi gi tekogi e tijno. Muma wacho ni “mon duto ma nobedo gi chuny mariek nowiyo tonde gi luetegi.” Ee, “mon duto ma chunygi nojiwo” kendo ma ne nigi ‘rieko nowiyo yie diek.’ E wi mano, Jehova nomiyo Bezalel “rieko, kuom winjo, kendo kuom ng’eyo, kendo kuom kit tich duto.” Nyasaye nomiyo Bezalel gi Oholiab rieko kod lony ma ne dwarore mondo gitim tich duto ma nochikogi.—Wuok 35:25, 26, 30-35.

Kane Jehova okwayo Jo-Israel duto mondo ogol chiwo, nong’eyo ni ng’ato ka ng’ato ma nigi ‘chuny mohero’ ne biro riwo lwedo lamo madier. Mano nomiyo oguedho joma nochiwore gi chunygi duto kuom tayogi kendo miyo gibedo gi mor mokalo apima. Omiyo, Jehova nonyiso ni sama oguedho jotichne nikech gichiwore maonge achune, obiro neno ni nitie gige tich duto ma dwarore, kendo joma olony bende yudore. (Zab. 34:9) Sama iyie tiyo ne Jehova nikech ihere, bed gadier ni obiro guedhi.

KAKA JOMOKO YIERO GOLO CHIWO NE TIJ PINY MANGIMA

Mana kaka e kinde jaote Paulo, ji mathoth ‘kanoga’ tenge, kata keto e bajet pesa moko mondo gichiw e sanduge mondik ni “Tij Piny Mangima,” ma yudore e kanyaklagi. (1 Kor. 16:2) Dwe ka dwe, kanyaklago oro pesago ne ofis mar Joneno mag Jehova ma tayo tij lendo e pinygi. Chiwo mag pesa bende inyalo oro achiel kachiel kitiyo gi nying riwruok mopwodhi ma Joneno mag Jehova tiyogo e pinyu. Mondo ing’e nying riwruok mopwodhi ma gitiyogo e pinyu, tudri gi ofis mar Joneno ma tayo tij lendo e pinyu. Adresno inyalo yud e Websait mar www.jw.org/luo. Yore ma ng’ato nyalo gologo chiwo gin ma luwogi:

CHIWO MIORO ACHIEL KACHIEL

Jomoko gologa chiwo kuom nyiso bengi ma ginie gi akaunt mondo obwas pesagi kae to oor ne ofis achiel kachiel, kata ginyalo tiyo gi kad mitiyogo e chudo (debit card kod credit card). E ofise mamoko inyalo tim mano kitiyo gi Websait mar jw.org kata Websait mamoko moyiedhi.
Chiwo mag pesa kata mwandu mamoko ma nengogi tek. Ndik barua bende manyiso ni pesa kata gik miorogo gin chiwo.

CHIWO MIBIRO DWOK KENDO

Ng’ato nyalo chiwo pesa mondo otigo e tij piny mangima, to ibiro dwokne bang’e kodwarogi.
Ndik barua manyiso ni chiwono en mibiro dwokni bang’e.

CHIWO MOCHAN

Mopogore gi golo pesa kaka mich kod mwandu mamoko ma nengogi tek, nitie yore mamoko minyalo gologo chiwo mondo okony tij Pinyruoth mitimo e piny mangima. Yorego ondik piny kae. Ka diher tiyo gi achiel kuom yoregi, yie ikwong itudri gi ofis matayo tije lendo e pinyu mondo ing’e yore moket piny kae monego itigo. To nikech chike matayo wach golo osuru opogore opogore, ber ka iwuoyo gi joma olony e weche mag osuru kapok iyiero yo maberni mondo igolgo chiwo.

Insuarans: Inyalo tiyo gi achiel kuom nyinge riwruoge mopwodhi ma Joneno mag Jehova tiyogo, kaka riwruok mabiro yudo chudo moa kuom chenro mar Insuarans mar ngima kata penson mari kiseritaya.

Akaunt mag Bengi: Akaunt mag bengi, kalatese manyiso pesa mokan, kata akaunt ma ng’ato oyawo mokanoe pesa mobiro tiyogo ka oseritaya, kata michulo ka ng’ato otho, inyalo ndikie nying riwruok mopwodhi ma Joneno mag Jehova tiyogo, kaluwore gi chenro mar bengi manie pinyu.

Stok kod Bond: Stok kod bond inyalo chiw kaka mich ne nying riwruok ma Joneno mag Jehova tiyogo, mondo riwruok mar Joneno ema oyud chudo kapo ni wuon-go otho.

Ute gi Puothe: Ute koda puothe minyalo ng’iew, inyalo chiw ne nying riwruok ma Joneno mag Jehova tiyogo, to kapo ni en ot kata puodho ma wuon-go pod odakie, onyalo dhi nyime dakie nyaka chieng’ otho.

Chudo mar Higa: Ma en chenro ma ng’ato chiwo pesa kata mwandune ne achiel kuom riwruoge ma Joneno mag Jehova tiyogo. Kae to, ng’at mogolo chiwono, kata jal moyiero, ema ibiro mi chudo moro higa ka higa e ngimane duto. Osuru ma ng’at mogolo chiwono onego ochul ibiro duok piny chakre higa ma chenrono nochakoree.

Ndiko Wil: Mwandu kata pesa inyalo mi achiel kuom riwruoge ma Joneno mag Jehova tiyogo kokalo kuom wil mondiki kaluwore gi chik sirkal, kata ndiko nying riwruogno ni ema biro yudo chudo kuom chenrono. Chenrono nyalo miyo odwok chien osuru ming’ado jal mogolo chiwono.

Kaka wach motigo ni “chiwo mochan” nyiso, chiwo kaka mago dwaro ni jalo ma gologi otim chenro motelo. Mondo okony jogo ma gombo chiwo kony ne tij piny mangima ma Joneno mag Jehova timo kokalo kuom chiwo mochan, osego brosua e dho-Ingresa kod dho-Spain miluongo ni Charitable Planning to Benefit Kingdom Service Worldwide. Ne ogo brosuano mondo oler yore mopogore opogore ma mich migolo kaka chiwo, inyalo chiw gie sani kata bang’e ka ng’ato osetho. Weche moket e brosuano, sa moro ok nyal luwore gi chenro magi kaluwore gi weche mag osuru kata chike manie pinyu. Bang’ somo brosuano kendo tudore gi joma olony gi chik sirkal korka weche osuru, ji mang’eny osebedo gi nyalo mar konyo tijwa mitimo e piny mangima, kendo osegonygi kuom chulo osuru mang’eny nikech timo kamano. Ka brosuano yudore e piny midakie, inyalo kwayo jagoro mar kanyaklau omiyi kopi.

Mondo iyud weche momedore, inyalo tudori gi ofis mar Joneno mag Jehova ma tayo tij lendo e pinyu.