“Tich Duong’”

EN KINDE mar timo romo moro maduong’ ahinya Jerusalem. Ruoth Daudi oluongo jodongo kod jotelo mamoko manie lochne e romono. Gimor winjo lendo moro makende ahinya. Jehova ochiko wuod Daudi miluongo ni Solomon mondo oger ot ma radhayi ahinya kama jotichne ne nyalo lamee. Jehova nonyiso Daudi kokalo kuom rohone kaka nonego oger odno kae to Daudi onyiso Solomon. Daudi nowacho niya: “Tich duong’: nikech odni mar duong’ ok obedo ni dhano, to mana mar Jehova Nyasaye.”—1 We. 28:1, 2, 6, 11, 12; 29:1.

Daudi penjo jogo kama: “Ere ng’ama oyie golo chiwo ni [Jehova] gi chuny achiel kawuono?” (1 We. 29:5, The Bible in Luo, 1976) Ka dine bed ni in kanyo, ditimo nang’o? Be dine chunyi ochwali mondo isir tich maduong’no? Jo-Israel nochiwore gi chunygi duto. Ne gimor “nimar ne gichiwo gi chuny, nikech ne gichiwo ni Jehova gi chuny modimbore.”—1 We. 29:9.

Bang’ higni moko modhuro, Jehova noloso gimoro maber ma ne ok nyal pim kata matin gi hekalu ma Solomon nogero. Noloso hekalu maduong’ mar roho, ma en chenro moketo mondo dhano olamego kokalo kuom misango mar Yesu. (Hib. 9:11, 12) Ere kaka Jehova konyo ji mondo obed gi winjruok maber kode e kindegi? Otimo kamano kokalo kuom tijwa mar lendo. (Mat. 28:19, 20) Kokalo kuom tij lendo, higa ka higa Joneno tayo puonjruoge mag Muma milionde, itiso ji alufe gi alufe, kendo ichako kanyakla miche gi miche.

Nikech dongruok ma timoreni, dwarore ni ogo buge mang’eny ma lero Muma, oger ute mag romo kendo oritgi maber, kendo omed kuonde mitimoe chokruoge madongo. Donge en adier ni tijwa mar lando wach maber en tich maduong’ kendo maber ahinya?—Mat. 24:14.

Hera ma waherogo Nyasaye kod dhano wetewa kendo nikech wang’eyo ni onego otim tij lendo mapiyo, osemiyo ‘wagolo chiwo ne Jehova gi chuny achiel.’ Mano kaka wamor ‘miyo Jehova duong’ ka wachiwone giwa’ kendo wamor neno kaka chiwogo itiyogo maber e chopo tich maduong’ni!—Nge. 3:9.

Kaka Jomoko Yiero Golo Chiwo ne Tij Piny Mangima

Ji mathoth ‘kanoga’ tenge, kata keto e bajet pesa moko mondo gichiw e sanduge mondik ni “Tij Piny Mangima” mayudore e kanyaklagi. (1 Kor. 16:2) Dwe ka dwe, kanyaklago oro pesago ne ofis mar Joneno mag Jehova matayo tij lendo e pinygi. Chiwo mag pesa bende inyalo or achiel kachiel kitiyo gi nying riwruok mopwodhi ma Joneno mag Jehova tiyogo e pinyu. Mondo ing’e nying riwruok mopwodhi ma gitiyogo, tudri gi ofis mar Joneno manie pinyu. Adres inyalo yud e websait mar www.jw.org/luo. Yore ma ng’ato nyalo gologo chiwo gin ma luwogi:

CHIWO MIORO ACHIEL KACHIEL

Jomoko gologa chiwo kuom nyiso bengi ma ginie gi akaunt mondo obwas pesagi kae to oor ne ofis achiel kachiel, kata ginyalo tiyo gi kad mitiyogo e chudo (debit card kod credit card). E ofise mamoko inyalo tim mano kitiyo gi websait mar jw.org kata websait mamoko moyiedhi.
Chiwo mag pesa kata mwandu mamoko ma nengogi tek. Ndik barua bende ma nyiso ni pesa kata gik miorogo gin chiwo.

CHIWO MIBIRO DWOK KENDO

Ng’ato nyalo chiwo pesa mondo otigo e tij piny mangima, to ibiro dwokne bang’e kodwarogi.
Ndik barua ma nyiso ni chiwono en mibiro dwokni bang’e.

CHIWO MOCHAN

Mopogore gi golo pesa kaka mich kod mwandu mamoko ma nengogi tek, nitie yore mamoko minyalo gologo chiwo mondo okony tij Pinyruoth mitimo e piny mangima. Yorego ondik piny kae. Ka diher tiyo gi achiel kuom yoregi, yie ikwong itudri gi ofis ma tayo tije lendo e pinyu mondo ing’e yore moket piny kae monego itigo. To nikech chike ma tayo wach golo osuru opogore opogore, ber ka iwuoyo gi joma olony e weche mag osuru kapok iyiero yo maberni mondo igolgo chiwo.

Insuarans: Inyalo tiyo gi achiel kuom nyinge riwruoge mopwodhi ma Joneno mag Jehova tiyogo, kaka riwruok mabiro yudo chudo moa kuom chenro mar Insuarans mar ngima kata penson mari kiseritaya.

Akaunt mag Bengi: Akaunt mag bengi, kalatese ma nyiso pesa mokan, kata akaunt ma ng’ato oyawo mokanoe pesa mobiro tiyogo ka oseritaya, kata michulo ka ng’ato otho, inyalo ndikie nying riwruok mopwodhi ma Joneno mag Jehova tiyogo, ka luwore gi chenro mar bengi manie pinyu.

Stok kod Bond: Stok kod bond inyalo chiw kaka mich ne nying riwruok ma Joneno mag Jehova tiyogo, mondo riwruok mar Joneno e ma oyud chudo kapo ni wuon-go otho.

Ute gi Puothe: Ute kod puothe minyalo ng’iew, inyalo chiw ne nying riwruok ma Joneno mag Jehova tiyogo, to kapo ni en ot kata puodho ma wuon-go pod odakie, onyalo dhi nyime dakie nyaka chieng’ otho.

Chudo mar Higa: Ma en chenro ma ng’ato chiwo pesa kata mwandune ne achiel kuom riwruoge ma Joneno mag Jehova tiyogo. Kae to, ng’at mogolo chiwono, kata jal moyiero, ema ibiro mi chudo moro higa ka higa e ngimane duto. Osuru ma ng’at mogolo chiwono onego ochul ibiro duok piny chakre higa ma chenrono nochakoree.

Ndiko Wil: Mwandu kata pesa inyalo mi achiel kuom riwruoge ma Joneno mag Jehova tiyogo kokalo kuom wil mondiki kaluwore gi chik sirkal, kata ndiko nying riwruogno ni e ma biro yudo chudo kuom chenrono. Chenrono nyalo miyo odwok chien osuru ming’ado jal mogolo chiwono.

Mana kaka wach motigo ni “chiwo mochan” nyiso, chiwo kaka mago dwaro ni jalo ma gologi otim chenro motelo. Mondo okony jogo ma gombo chiwo kony ne tij piny mangima ma Joneno mag Jehova timo kokalo kuom chiwo mochan, osego brosua e dho-Ingresa kod dho-Spain miluongo ni Charitable Planning to Benefit Kingdom Service Worldwide. Ne ogo brosuano mondo oler yore mopogore opogore ma mich migolo kaka chiwo, inyalo chiw gie sani kata bang’e ka ng’ato osetho. Weche moket e brosuano, samoro ok nyal luwore gi chenro magi ka luwore gi weche mag osuru kata chike manie pinyu. Ji mang’eny osebedo gi nyalo mar konyo tijwa mitimo e piny mangima, kendo osegonygi kuom chulo osuru mang’eny nikech timo kamano. Ka brosuano yudore e piny midakie, inyalo kwayo jagoro mar kanyaklau omiyi kopi.

Mondo iyud weche momedore, di kama wacho ni “Gol Chiwo mar Siro Tijwa e Piny Ngima” ma yudore piny mogik ka iyawo jw.org/luo, kata inyalo tudori gi ofis mar Joneno mag Jehova manie pinyu.