Kaka Wanyalo Konyo Jomoko Oyud Gik Mochuno

FRANÇOIS, ma en jaduong’-kanyakla e piny moro wacho niya: “Tulo nomuoch e yiero mar siasa ma ne nigi ywaruok mang’eny mochuno Joneno mag Jehova mondo oring owe miechgi. Chiemo kod yedhe nobedo manok kendo nengo mag gik matin ma nodong’ noidho mokalo. Bengi duto nolor kendo kuonde mamoko mikanoe pesa nodong’ nono, to moko bende ne ok ti.”

Mapiyo nono, owete manie Bethel nochako oro pesa kod gik mamoko mondo okony Joneno ma noringo odhi e Ute mag Romo manie pinyno. Grube mag josiasa ma ne nigi ywaruok nogeng’o nderni. Kata kamano, nikech ne ging’eyo ni Joneno ok riw lwedo weche mag siasa, geche mag Bethel ne iweyo mondo okal.

François wacho kama: “Kane wan e yo wadhi e Od Romo moro, jomoko nogoyo mtokwa gi bunde, to risasi nokalo mana e kindwa. Kane waneno polis moro karingo kabiro irwa gi bunde e lwete, ne wawicho wi mtoka piyo ma wadok Bethel. Wagoyo ne Jehova erokamano ni ne watony. Kinyne, owete 130 ma ne nie Od Romono nowuok kanyo kendo onge ng’ama ne ohinyore. Moko kuomgi nobiro Bethel kama ne wakonyogie gi dwaro mag ringruok koda mag chuny nyaka chop kama tulono norumo.”

François wacho niya: “Owete mawuok kuonde mopogore opogore e pinywa nondiko barupe mang’eny ka gigoyogo erokamano. Neno kaka owete gi nyimine mawuok e pinje mamako nokonyogi nomiyo gimedo bedo gi yie motegno kuom Jehova.”

Sama owetewa gi nyiminewa yudo masiche matimore apoya koda gi ma dhano ema kelo, ok onego wanyisgi mana ni “rwakuru lewini, kendo uyieng’.” (Jak. 2:15, 16) Kar mano, onego wamany kaka wanyalo konyogi loyo dwachgi mag ringruok. Kamano bende, kane ochiw siem e kinde Jokristo mokwongo ni kech ne dhi kwako piny, “jopuonjre noyie kowo ni owete modak Judea gik ma dikonygi, kaka ng’ato ka ng’ato onyalo.”—Tich 11:28-30.

Wan kaka jotich Jehova waikore konyo jogo mochando gige ringruok. Kata kamano, dwarore bende ni okonygi gibed gi winjruok maber gi Nyasaye. (Math. 5:3) Mondo ginwang’ konyno, Yesu nochiko jolupne mondo otim ji obed jopuonjrene. (Math. 28:19, 20) Watiyo gi thuolowa, tekowa, kod mwanduwa mondo watim tijno. Ka wan kaka riwruok, wajotiyo gi pesa mogol kaka chiwo e konyo ji e yor ringruok, kata kamano, tich maduong’ ma pesago timo en chopo dwaro mag Pinyruoth kendo lando wach maber. Timo kamano nyiso ni wahero Nyasaye kod dhano wetewa.—Math. 22:37-39.

Jogo mariwo lwedo tich ma Joneno mag Jehova timo e piny mangima nyalo bedo gadier ni chiwo mag pesa ma gigolo itiyogo e yo maber kaka dwarore. Be diher chiwo kony ne owete kod nyimine ma nigi chandruok? Be igombo riwo lwedo tij timo ji jopuonjre? Ka en kamano, to kara “kik ituon ji gik mabeyo mowinjore giyudi, kobet e tekoni mondo itim kamano.”—Nge. 3:27.

KAKA JOMOKO YIERO GOLO CHIWO NE TIJ PINY MANGIMA

Mana kaka e kinde jaote Paulo, ji mathoth ‘kano’ tenge, kata keto e bajet pesa moko mondo gichiw e sanduge mondik ni “Tij Piny Mangima,” mayudore e kanyaklagi. (1 Kor. 16:2) Dwe ka dwe, kanyaklago oro pesago ne ofis mar Joneno mag Jehova matayo tij lendo e pinygi. Chiwo mag pesa bende inyalo oro achiel kachiel kitiyo gi nying riwruok mopwodhi ma Joneno mag Jehova tiyogo e pinyu. Mondo ing’e nying riwruok mopwodhi ma Joneno mag Jehova tiyogo e pinyu, yie itudri gi ofis mar Joneno mag Jehova matayo tij lendo e pinyu. Adres mar ofisno inyalo yud e Intanet e www.jw.org/luo. Yore ma ng’ato nyalo gologo chiwo gin maluwogi:

CHIWO MIORO ACHIEL KACHIEL
- Chiwo mag pesa kata mwandu mamoko ma nengogi tek.
- Ndik barua bende manyiso ni pesa kata gik miorogo gin chiwo.
CHIWO MIBIRO DWOK KENDO
- Ng’ato nyalo chiwo pesa mondo otigo e tij piny mangima, to ibiro dwokne bang’e kodwarogi.
- Ndik barua manyiso ni chiwono en mibiro dwokoni bang’e.
CHIWO MOCHAN

Mopogore gi golo pesa kaka mich kod mwandu mamoko ma nengogi tek, nitie yore mamoko minyalo gologo chiwo mondo okony tij Pinyruoth mitimo e piny mangima. Yorego ondik piny kae. Ka diher tiyo gi achiel kuom yoregi, yie ikwong itudri gi ofis matayo tije lendo e pinyu mondo ing’e yore moket piny kae monego itigo. To nikech chike matayo wach golo osuru opogore opogore, en gima owinjore mondo inon kuom joma olony e weche mag osuru kapok iyiero yo maberni mondo igolgo chiwo.

Insuarans: Inyalo tiyo gi achiel kuom nyinge riwruoge mopwodhi ma Joneno mag Jehova tiyogo, kaka riwruok mabiro yudo chudo moa kuom chenro mar Insuarans mar ngima kata penson mari bang’ kiseritaya.

Akaunt mag Bengi: Akaunt mag bengi, kalatese manyiso pesa mokan, kata akaunt ma ng’ato oyawo mokanoe pesa mobiro tiyogo bang’ ka oseritaya, kata michulo ka ng’ato otho, inyalo ndikie nying riwruok mopwodhi ma Joneno mag Jehova tiyogo, kaluwore gi chenro mar bengi manie pinyu.

Stok kod Bond: Stok kod bond inyalo chiw kaka mich ne nying riwruok ma Joneno mag Jehova tiyogo, mondo riwruok mar Joneno mag Jehova ema oyud chudo kapo ni wuon-go otho.

Ute gi Puothe: Ute koda puothe minyalo ng’iew, inyalo chiw ne nying riwruok ma Joneno mag Jehova tiyogo, to kapo ni en ot kata puodho ma wuon-go pod odakie, onyalo dhi nyime dakie nyaka chieng’ otho.

Chudo mar Higa: Ma en chenro ma ng’ato chiwo pesa kata mwandune ne achiel kuom riwruoge ma Joneno mag Jehova tiyogo. Kae to, ng’at mogolo chiwono, kata jal moyiero, ema ibiro mi chudo moro higa ka higa e ngimane duto. Kae to osuru ma ng’at mogolo chiwono onego ochul ibiro duok piny chakre higa ma chenrono nochakoree.

Ndiko Wil: Mwandu kata pesa inyalo mi achiel kuom riwruoge ma Joneno mag Jehova tiyogo kokalo kuom wil mondiki kaluwore gi chik sirkal, kata ndiko nying riwruokno ni ema biro yudo chudo kuom chenrono. Chenrono nyalo miyo odwok chien osuru ming’ado jal mogolo chiwono.

Kaka wach motigo ni “chiwo mochan” nyiso, chiwo kaka mago dwaro ni jalo ma gologi otim chenro motelo. Mondo okony jogo magombo chiwo kony ne tij piny mangima ma Joneno mag Jehova timo kokalo kuom chiwo mochan, osego brosua e dho-Ingresa kod dho-Spain miluongo ni Charitable Planning to Benefit Kingdom Service Worldwide. Ne ogo brosuano mondo okony e lero yore mopogore opogore ma mich migolo kaka chiwo, inyalo chiw gie sani kata bang’e ka ng’ato osetho. Weche moket e brosuano, sa moro ok nyal luwore gi chenro magi kaluwore gi weche mag osuru kata chike manie pinyu. Bang’ somo brosuano kendo tudore gi joma olony gi chik sirkal korka weche osuru, ji mang’eny osebedo gi nyalo mar konyo tijwa mitimo e piny mangima, kendo osegonygi kuom chulo osuru mang’eny nikech timo kamano. Ka brosuano yudore e piny midakie, inyalo kwayo jagoro mar kanyaklau omiyi kopi.

Mondo iyud weche momedore inyalo tudori gi ofis miluongo ni Charitable Planning Office. Bende inyalo ndiko barua kata goyo simo ne ofis mar Joneno mag Jehova matayo tij lendo e pinyu.