Yore Abich mag Yudo Jopuonjre mag Muma
1. Ka walendo e alwora ma yudo jopuonjre Muma ok yotie, ang’o monego watim, to nikech ang’o?
1 Be iseyudo ka seche moko ok yotni yudo japuonjre Muma? Dhi mana nyime gi manyo. Jehova gwedho joma ok ol gi timo dwache. (Gal. 6:9) Yore abich maluwogi nyalo konyi yudo jopuonjre mag Muma.
2. Ere kaka wanyalo tiyo gi yo ma achiel kachiel e chako puonjruok Muma gi ji?
2 Penj Ji Achiel Kachiel: Ji mang’eny ong’eyo ni wachiwoga gasede mag Ohinga mar Jarito kod Amkeni!, to samoro ok ging’eyo ni wajochiwore mondo wapuonj ji Muma. Donge inyalo penjo weg udi achiel kachiel sama ilendo ot ka ot ka ginyalo hero puonjore Muma? Bende, inyalo penjo joma idok limo ka digiher puonjruok. Kapo ni gitamore, pod inyalo dhi nyime weyonegi bugewa kendo konyogi nyago siso mar puonjruok. Kuom higini mogwaro, owadwa moro nosebedo ka limo dichwo gi dhako moro mokendore koteronegi gasede. Chieng’ moro noteronegi gasede manyien, to ka nowuok, noparore mi openjogi ni, “Be duher puonjoru Muma?” Nowuoro ahinya ka ne giyie. Sani osebatisgi.
3. Ler ane gimomiyo ok onego wang’ad e pachwa ni joma nyien duto mabiroga e chokruogewa punjore Muma.
3 Penj Joma Biroga e Chokruogewa: Ok owinjore wang’ad e pachwa ni joma nyien duto mabiroga e chokruogewa gin jopuonjre mag Muma. Owadwa moro wacho kama: “Ng’eny jopuonjre ma an-go nayudo mana nikech wuoyo gi joma biroga e chokruogewa.” Nyaminwa moro nowuoyo gi miyo moro ma luor luor ma nyige ariyo mosebatisi ne nie kanyakla. Miyono nosebedo ka biro e chokruoge kuom higini madirom 15, to nojachopo e Od Romo sama chokruok chakore kendo wuok mapiyo bang’ chokruok. Noyie gi puonjruok mi bang’e obedo Janeno. Nyaminwano nondiko kama: “Agoyo mos ahinya kuom weyo higini 15 duto okal kapok napenjo miyono ka doher puonjore Muma!”
4. Ere kaka wanyalo yudo jopuonjre Muma kokalo kuom jopuonjre mamoko kata jolendo wetewa?
4 Penj Jopuonjre Kod Jolendo Mamoko: Nitie nyaminwa moro moheroga dhi gi jolendo mamoko sama jolendogo dhi tayo puonjruok mag Muma. Owuoyo gi jal matayo puonjruogno mondo oyiene openj japuonjre sama gitieko kabe ong’eyo ng’at moro ma diher puonjore. Sama ichiwo bug Muma Puonjo ne jal misebedo kilimo, inyalo penje kama: “Be ing’eyo ng’at machielo ma diher yudo bugni? ” Kinde moko nyalo bedo matek ne jolendo kata jopainia tayo puonjruok gi joma giromogo e alwora moro. Kuom mano, nyis jolendo mamoko ni diher yudo japuonjre Muma.
5. Ang’o momiyo nyalo bedo maber ka wapenjo joute owetewa gi nyiminewa maok gin Joneno kabe digiher puonjore?
5 Jaot Maok Janeno: Be nitie jolendo moko e kanyaklau ma chwogi kata mondgi ok gin Joneno? Moko kuom joma ok gin Jonenogo ok yie mondo joutegi ma Jokristo owuo kodgi kuom Muma, to kata kamano ginyalo yie puonjore gi ng’at maok jaodgi. Kapok iwuoyo gi ng’at ma kamano, nyalo bedo maber ka ikwongo wuoyo gi chwore kata chiege mondo ing’e yo maber mar tudruok kode.
6. Ere kaka lamo nyalo konyi sama imanyo japuonjre Muma?
6 Lamo: Ok onego wakaw lamo kaka gima tin. (Jak. 5:16) Jehova nyisowa gadier ni owinjo kwayowa ka kwayogo otudore gi dwache. (1 Joh. 5:14) Owadwa moro ma nodich ahinya nolamo mondo oyudie japuonjre Muma. Chiege ne wuoro kabe chwore ne nyalo yudo thuolo mar tayo puonjruok, to moloyo kapo ni japuonjreno dwaro thuolo malach. Omiyo nonyiso Jehova dwaro mar chworeno e lamo. Jumbe ariyo bang’e, Jehova nodwoko lamogino ka nyaminwa moro ma painia e kanyakla noyudo dichwo moro ma ne dwaro puonjore kendo notudo owadwano gi dichwono. Chiege nondiko kama: “Daher nyiso jalendo moro amora maparo ni ok onyal tayo puonjruok mar Muma kama: Wach gima idwaro moriere sama ilamo, kendo kik iol gi lamo. Waseyudo mor manimba moloyo kaka naparo.” In bende ka itimo sinani, ibiro yudo japuonjre Muma kendo ibiro bedo gi mor mang’eny kuom konyo ng’ato mondo odonj e ‘yo ma dhi e ngima.’—Math. 7:13, 14.