Kaka Inyalo Yudo Ber e Grubu mar Lendo
1. Gin ber mage ma ne wayudo e Puonjruok Buk mar Kanyakla ma pod wanyalo yudo e grubewa mag lendo?
1 Be nitie gik ma pod igombo ma ne wajotimo e kinde ma ne wan-gi Puonjruok Buk mar Kanyakla? Grube mag puonjruok noting’o joma nok kendo nitimo puonjruok kuonde man thuolo. Mano ne miyowa thuolo mar bedo gi osiepe ma jiwowa e yie. (Nge. 18:24) Jarit grub puonjruok buk ne nyalo ng’eyo chal mar ng’ato ka ng’ato kendo nonyalo jiwo ng’ato ka ng’ato. (Nge. 27:23; 1 Pet. 5:2, 3) Pod wanyalo yudo ber kaka mago e grubewa mag lendo.
2. Wanyalo kawo okenge mage mondo wajiw osiep manie kindwa gi joma nie grubwa mar lendo, mamiyo wabedo gi yie motegno?
2 Kaw Okang’ Mokwongo: Kwan mag joma nie grube mag lendo dwa mana romore gi ma ne nie grube mag puonjruok buk. Sama walendo ‘kanyachiel’ gi jowetewa, wanyalo loso osiep machiegni kodgi. (Fili. 1:27) Iselendo gi ji adi e grubu? Be inyalo medo ‘yawo chunyi’ e wachni? (2 Kor. 6:13) Bende, kinde ka kinde wanyalo gwelo jagrubwa moro e Lamo mar Joot kata e gago. E kanyakla moko, grube mag lendo wilore e rwako owete mogwel mondo ogol twak e kanyaklagi. E juma monego gichiwree, giriwore kanyachiel e gago kendo gijiwore, kata bed ni samoro jagol-twak ok nyal yudo thuolo mar bedo kodgi e gagono.
3. Wan gi thuolo mage mag yudo jip mowuok kuom jodongo e grubewa mag tij lendo?
3 Kata obedo ni tinde kanyakla romo diriyo kende e juma ne chokruoge, jodongo pod yudo thuolo moromo mar timo limbe mag kwath. Grup ka grup nigi jarit moketi mondo ojiw kendo otieg ng’ato ka ng’ato ne tij lendo. Kapo ni jarit grubu pok ochano mar lendo kodi, donge inyalo kwaye mondo ulend kode? E wi mano, jarit tij lendo nwang’o thuolo mar tiyo gi grup ka grup e giko juma moro dwe ka dwe. E kanyakla ma nigi grube manok, jarit tij lendo nyalo chano mar limo moro ka moro kuom grubego diriyo e higa. Be itimoga chenro mondo iyudri e tij lendo kinde ma olimo grubu?
4. (a) Ere kaka onego ochan romo mag dhi lendo? (b) Ang’o momiyo onego wanon kabe wanyalo chiwo utewa mondo otimie romo mag dhi lendo?
4 Ber mang’eny bedoe ka grup ka grup romo kendgi ne tij lendo e giko juma. Bedo gi kuonde mopogore opogore mag timo romo mag dhi lendo e seche machal miyo jolendo ok bed gi pek sama gidhi e romogo koda e alwora milendoe. Inyalo pog jolendo mapiyo mondo gidonj e alwora ma ok gideko. Bende, bedo mayot ne jarit grup mondo orit joma nie bwoye. Kata kamano, nitie kinde manyalo dwarore ni oriw grube moko. Kapo ni kanyaklau romo kanyachiel e Ngeso mokwongo e dwe kata bang’ Puonjruok mar Ohinga mar Jarito, nyalo bedo maber ka omi grup ka grup dakika machuok mondo jorit mag grubego ochan joma nie grubegi kapok otiek romono gi lamo.—Ne sanduk mawacho ni “Be Inyalo Yie Ji Orom e Odi?”
5. Kata obedo ni Puonjruok Buk mar Kanyakla sani koro onge, ang’o ma pod wan-go gadier?
5 Kata obedo ni Puonjruok Buk mar Kanyakla sani koro onge, Jehova pod miyowa gik moko duto ma dwarore e timo dwache. (Hib. 13:20, 21) Onge gimoro amora ma wanyalo chando sama wan e bwo rit mar Jehova. (Zab. 23:1) Wayudo gweth mogundho kokalo kuom grube mag tij lendo. Ka wakawo okenge madwarore kendo ‘wachwoyo mathoth,’ wabiro ‘kayo mathoth.’—2 Kor. 9:6.
[Sanduk e ite mar 6]
Be Inyalo Yie Ji Orom e Odi?
Nitie kanyakla moko ma riwo grubegi mag lendo e giko juma nikech ute minyalo timie romo nok. Romo mag dhi lendo gin chenro mag kanyakla, omiyo bedo gi romogo e utewa en dhial makende. Be inyalo yie mondo otim romono e odi kata e dalani? Kik iluor kiparo ni odi kata dalani ok long’o. Jodong-kanyakla biro nono kama odi kata dalani nitie kaachiel gi weche mamoko, mana kaka ne gitimo e kinde ma ne pod wan gi puonjruok buk. Ka diher chiwo odi kata dalani mondo otimie romo, nyis jarit grubu.