Romo mag Chano Dhi Lendo
1. Ang’o momiyo wadwaro ni mondo wati tij lendo e yo mochan maber?
1 Yesu ne oketo ranyisi kuom tiyo tij Pinyruoth e yo mochan kendo matiyo maber. E kindegi bende, jogo matiyo tij lando Pinyruoth e piny mangima timo matek mondo gine ni tijno otim e yo mochan maber kamano. Kaluwore kod chenroni, kanyakla duto e piny mangima tiyo gi romo mag chano dhi lendo kaka achiel kuom yore mag iko jolendo mag Pinyruoth ne tij lendo.—Math. 24:45-47; 25:21; Luka 10:1-7.
2. Ang’o monego otim e romo mag dhi lendo?
2 Chenro Makonyo: Romo mag chano dhi lendo oket mondo ojiw jolendo machiegni dhi lendo, kichiwonegi paro ma ginyalo tiyogo e tij lendo, kendo nyisogi gik monego gitim. Unyalo nono ndiko mar odiechieng’ e yo machuok ka ndikono wuoyo achiel kachiel kuom tij lendo. Kinde moko, unyalo tiyo gi weche miparonwa manie Tijwa mar Pinyruoth, e bug Kutoa Sababu, kata seche moko tiyo gi bug Shule ya Huduma, mondo okony jogo duto madhi e lendo timo ikruok ne tich mar odiechieng’no. Inyalo tim ranyisi machuok kuom kaka inyalo chiw buk milendogo e dweno. Kapok otiek gi lamo, jolendo duto onego ong’e ng’ama gibiro lendogo gi kama ji dhi lendoe. Bang’ romono ma ok onego okal dakika 15, ji duto onego odhi e alwora mar lendo achiel kachiel.
3. Ng’ano monego ochan romo mag dhi lendo?
3 Romogi Onego Ochan e Yo Mane? Jarit tij lendo ema nigi ting’ mar chano romo mag dhi lendo. Jorit-grup kata jogo ma konyogi nigi migawo mar dhi kanyachiel gi grubegi e tij lendo e odiechienge mag giko juma. Jodongo moko kata jokony tich e kanyakla nyalo dhi lendo kanyachiel gi grubegi e odiechienge mag kor juma. Jodongo matayo grube tiyo ka gitudore machiegni gi jarit tij lendo mondo omi gibed gi kar lendo moromo ma grubegi nyalo lendoe e ot ka ot e giko juma. E kor juma, jarit tij lendo biro neno ni nitie jal matayo grup e tij lendo.
4-6. (a) Kaluwore gi chal mar alwora mar lendo mar kanyakla, romo mag chano dhi lendo konyo nade? (b) Gin gik mage monego onon sama iloso chenro mar kuonde timo romo mag dhi lendo?
4 Romogi Onego Otim Kanye, Kendo e Seche Mage? Kar keto ni kanyakla duto romo kamoro achiel, ber mondo romogo otim kuonde mowinjore, kinde mang’eny inyalo timgi e ute man kuonde mopogore opogore e alwora mar lendo, mondo omi ji olend e alwora duto mar kanyakla e yo maber. Romogi bende inyalo ket e Od Romo. Kanyakla mang’eny tiyo gi Od Romo e timo romo mag dhi lendo bang’ chokruogegi mag twak mar ji duto, kod puonjruok Ohinga mar Jarito chieng’ Jumapil. Onego otim kinda mondo omi ji kik wuoth ahinya nikech kar lendo ni mabor. Kuom mano, onego onon chenro moseket mar kuonde romo kinde ka kinde mondo one ka podi kuonde romogo miyo tij lendo timore e yo maber e alworago.
5 Seche mowinjore timoe romogi, kendo ng’eyo ni onego otimgi nyadidi e juma luwore gi chal mar alwora mar lendo. Penjo maluwogi nyalo konyo e nono seche kod kuonde mowinjore maber timoe romono.
6 En alwora mane madwarore ni olendie ahinya? Gin seche mage mowinjore lendo e ot ka ot? Be onego oket seche mag odhiambo mondo obed mag lendo ot ka ot, koso mag dok limo joma oselendnegi? Chenro duto moselos mag lendo onego oket e bod mar weche kanyakla. En gombo mar jolendo duto mag Pinyruoth mondo gitiek lendo kuonde ma osemigi ma onge kama giweyo e okang’ ma ginyalo wacho kaka jaote Paulo ni: “Aonge gi kar lendo mapok amulo.”—Rumi 15:23, NW.
7. En ting’ mane ma jal ma omi migawo mar tayo grup nigo?
7 Tayo Romo mag Dhi Lendo: Jal ma omi migawo mar tayo romoni, nyiso luor ne chenro moket mar tij Nyasaye kuom timo ikruok maber. Romogi onego ochakre e wang’ sa, onego gichiw puonj kendo gibed machuok, makawo kind dakika 10 gi 15. Jal matayo romono onego ong’e kama ji dhi lendoe kapok romono ochakore. Kata obedo ni ok ochuno ni nyaka rit jo molewo, weyo wach chien manyiso kama ji odhi lendoe nyalo konyogi. Jolendo duto onego odhi achiel kachiel kama ji dhi lendoe bang’ ka romono oserumo. Onge kiawa ni romo mar dhi lendo motim e yo maber kendo machiwo paro mabeyo, biro konyo jolendo ng’eyo weche monego giluw mondo omi giti tijgi mar lendo e odiechieng’no.—Nge. 11:14.
8. Gin yore mage ma jogo mabiro e romo mag dhi lendo nyalo nyisogo ni giluwo chenro moketi gi jogo matayo romono?
8 Dhi e Romo mag Dhi Lendo: Luwo chenro moket dwarore. (Hib. 13:17) Ka dwaro nitie, jal matayo grup biro konyo jalendo moro amora mondo oyud ng’at molendogo. Ber ka jolendo molony nitie mondo omi gikony jolendo manyien kata jolendo mapodi ok olony. Jogo moikore lendo gi jolendo mopogore opogore kinde ka kinde, nyalo chopo gik mabeyo ahinya. (Nge. 27:17; Rumi 15:1, 2) Jolendo duto onego otim kinda mar chopo chon e romono. Luor mwanyiso kuom chenro moketni mar tij Nyasaye, kendo bedo joma dewo jolendo wetewa, biro miyo watimo lokruok madwarore e yorno.—2 Kor. 6:3, 4; Fili. 2:4.
9. Gin yore mage ma jopainia nyalo riwogo lwedo chenro mag romo mag dhi lendo?
9 Kony ma Jopainia Chiwo: Kony ma jopainia chiwo e romo mag dhi lendo duong’ ahinya kendo jiwo jolendo duto. En adier ni jopainia nigi ting’ mang’eny. E wi timo puonjruok Muma gi ji kendo dok limo joma giselendoni, ting’ mamoko mapile manyalo bedo ni gin-go oriwo rito jo utegi kod tiyo tije mag andika. Kuom mano, jopainia ok onego one ni dwarore ni nyaka gidhi e romo duto mag dhi lendo ma ochan gi kanyakla, to moloyo ka romogo itimo pile ka pile. Kata kamano, nyalo bedo ni en gima nyalore kuom jopainia dhi e romogo odiechienge moko e juma. E okang’ moro, romo mag dhi lendo gin kuonde ma iyudoe tiegruok, kendo lony ma jopainia nigo kuom wach Nyasaye nyalo konyo jomoko ahinya. Tiyo tij lendo nyading’eny osemiyo jopainia obedo gi lony e yo ma gilendogo. Ginyalo konyo jomoko bende obed molony. Kinda ma gin-go e tij lendo kod chiwo paro e romo mag dhi lendo, osemiyo gibedo ranyisi maber ne jomoko. Biro margi kendo chiwo paro e romogo en gima ipuoyo ahinya.
10. Ang’o momiyo owinjore jolendo duto mag Pinyruoth oriw lwedo gi chunygi duto chenro moketi kuom wach romo mag dhi lendo?
10 Mana kaka Yesu kod jopuonjrene ne timo, lendo mar ot ka ot en yo maduong’ ahinya mar chopo tijwa mar lando Pinyruoth. Romo mag chano dhi lendo oket mondo jolendo ojiwre ng’ato gi nyawadgi kendo mondo okony e chopo tij lendo. Jolendo duto mag wach maber onego otim kar nyalogi duto mondo gibed joma riwo lwedo chenro moketi kaka mago mag tij Nyasaye. (Tich 5:42; 20:20) Mad waduto watim lokruok moro amora madwarore mondo wariw lwedo chenro mag romo mag chano dhi lendo. Kuom timo mano, wabiro geno yudo gweth mogundho mag Jehova kendo wabiro moro chuny Ruodhwa, Yesu Kristo, ka wadhi nyime lando wach maber mar Pinyruodh Nyasaye.—Math. 25:34-40; 28:19, 20.