Yud Kony Chuth Kuom Romo mag Chano Dhi Lendo
1. Romo mag chano dhi lendo nyalo konyowa e yo mane?
1 Romo mag chano dhi lendo ma otim maber jiwowa kendo chiwonwa weche ma wanyalo tiyogo kapok wadhi lendo. Gikonyowa lendo e lela gi jolendo mamoko mondo omi wajiwre ng’ato gi ng’ato kendo wayud tiegruok. (Nge. 27:17; Ekle. 4:9, 10) Ang’o ma wanyalo timo mondo wayud kony chuth kuom romo mag dhi lendo?
2. Jal matayo romono nyalo wuoyo kuom gik mage?
2 Jal Matayo Romono: Pile weche mibiro wuoyoe e romogo ok chiw. Kuom mano, ikruok maber dwarore ka in gi migawo mar tayo romono. Nono ndiko mar odiechieng’no ok onego obed ni e gima ichano timo kinde duto e romono, kata kamano, inyalo tiyo kode ka en ndiko ma wuoyo kuom tij lendo. Par gik manyalo konyo jolendo e tiyo tij lendo chieng’no. Kuom ranyisi, inyalo wuoyo kuom gima udhi wacho, kata timo ranyisi mar gino. Inyalo yiero mondo iwuo e wi wach mowuok e bug Kutoa Sababu, Shule ya Huduma, kata wach moro ma nyocha opuonj machiegni e Chokruok mar Tijwa. E kinde mamoko, inyalo wuoyo kuom gima inyalo tim ka ng’ato oromo gi akwede moro e alworau. Kata inyalo wuoyo kuom yore mag miyo joma ilendoni obed gi gombo mar winjo mondo omi watimgi jopuonjre Muma, to moloyo kapo ni jolendo mang’eny chano dok timo limbe. Kata bed ni iwuoyo kuom wach mane, tim kamano gi ilo kendo kinyiso geno maber.
3. Romono onego okaw kinde maromo nade, kendo ang’o monego obed ni osetiek timo kapok romono orumo?
3 Chak romono e wang’ sa kata ka ing’eyo ni jomoko biro deko. Par kaka inyalo pogo ji e yo makare, kendo nyis jogo madwaro kar lendo kama onego gidhiye. Romono onego okaw dakika 10 kata 15 ka ng’eny, kata matin ne mago ka itime bang’ chokruok moro mar kanyakla. Ka podi ok itieko tayo chokruogno, ng’ato ka ng’ato onego ong’e ng’at ma odhi lendo godo kod kama gidhi lendoe. Romono onego otiek gi lamo.
4. Ang’o manyalo miyo ng’ato ka ng’ato oyud kony chuth kuom romo mag chano dhi lendo?
4 Ng’ato ka Ng’ato Nyalo Konyo: Mana kaka watimo e chokruoge mamoko, wachiwo luor ne Jehova kendo nyiso hera ne jowetewa ka wachopo e romono e sa madwarore. In bende inyalo luwo kata chiwo paro e romono. Inyalo weyo jal matayo romono mondo omiyi jalendo ma udhi lendogo, kata in iwuon inyalo timo chenro ma mari ka romono podi. Ka iyiero mondo itim chenro ma mari iwuon, tem mondo ‘iyawri’ ka itiyo gi jolendo mopogore opogore kar lendo mana gi osiepeni kende kinde duto. (2 Kor. 6:11-13) Ka romono oserumo, kik ilok chenro ma oseketi, kendo dhiuru kar lendo achiel kachiel.
5. Ang’o momiyo wabedo gi romo mag chano dhi lendo?
5 Gimomiyo itimo romo mag chano dhi lendo koda chokruoge mag kanyakla en achiel. Ichanogi mondo omi ‘wapar owetewa mondo wami hera gi timbe mabeyo obedie.’ (Hibr. 10:24, 25) Ka watemo ahinya yudo kony mawuok kuom romogi, wabiro bedo moikore e timo tijwa mar lendo ma en tich kata ‘tim maber’ ndi!