Romo mag Dhi Lendo ma Konyowa Chopo Tijwa

1. Romo mag dhi lendo konyowa e yore mage?

¹ Nitie kinde moro ma Yesu ne ochokore gi jopuonjrene 70 kapok ne gidhi timo kampen mar lando wach maber. (Luka 10:1-11) Ne ojiwogi kowachonegi ni ne ok gidhi tiyo tijno kendgi, kendo ni Jehova ma e “Ruodh keyo,” ne dhi tayogi. Bende, ne onyisogi weche ma ne dhi tayogi e tijno, kae to nopogogi “ji ariyo-ariyo.” E ndalogi, romo ma wabedogago kapok wadhi e tij lendo bende konyowa e yore ma kamago. Ijiwowa e romo ma kamago, iikowa ne tij lendo, kendo ichanowa kata ipogowa kapok wadhi lendo.

2. Onego otim romo mag dhi lendo kuom thuolo ma romo nade?

² Wasebedo ka watimo romo mar dhi lendo kuom dakika 10 kata 15, to mano noriwo pogo ji, miyogi alwora mar lendo, kod lamo. Kata kamano, nitie lokruok ma osetim. Kochakore April, romo mag dhi lendo biro kawo dakika abich nyaka abiriyo. Kapo ni itimo romo mar dhi lendo bang’ chokruok mar kanyakla, to romono onego okaw dakika machuok ne mano, nikech biro yudo ka osejiw ji gi puonj mabeyo mag Ndiko. Timo romo mag dhi lendo kuom dakika machuok biro miyo jolendo thuolo momedore mar tiyo tij lendo. E wi mano, nikech nitie jopainia kata jolendo moko ma chakoga lendo kapok gidhi e romo mar dhi lendo, timo romono kuom dakika machuok ok bi chochogi ahinya.

3. Ere kaka inyalo chan romo mag dhi lendo mondo gibed ma konyo jolendo duto?

³ Romo mag dhi lendo onego ochan e yo ma konyo jolendo duto. E kanyakla mang’eny, bedoga maber moloyo ka ji oromo e grubegi mag lendo, kar romo kamoro achiel giduto. Mano miyo bedo mayot ne jolendo chopo kama itimoe romo mar dhi lendo kod alwora ma gilendoe. Sama ji oromo e grubegi mag lendo, pogo jolendo bedo mayot, kendo bedo mayot ne jarit grup miyo ng’ato ka ng’ato manie grube jip kod kony ma dwarore. Bura mar jodongo onego onon chal mar kanyaklagi mondo giket chenro ma nyalo bedo maber gi jolendo. Kapok otiek romo mar dhi lendo gi lamo machuok, ng’ato ka ng’ato onego ong’e alwora ma odhi lendoe kod ng’ama odhi lendogo.

4. Ang’o momiyo onego wakaw romo mag dhi lendo mapek mana kaka chokruoge mamoko?

⁴ En Romo ma Onego Okaw Mapek Mana Kaka Chokruoge Mamoko mag Kanyakla: Nikech romo mag dhi lendo itimoga mondo okony joma dhi lendo, ok ji duto e kanyakla ma biro bedo e romono. Kata kamano, mano ok nyis ni koro ok onego okawgi mapek kaka chokruoge mamoko mag kanyakla. Mana kaka chokruoge mamoko, romo mag dhi lendo gin chenro ma Jehova oikonwa mondo okonywa jiwore ng’ato gi ng’ato e hera kod timbe mabeyo. (Hib. 10:24, 25) Omiyo, jal matayo romono onego oikre maber mondo ota romono e yo ma biro miyo Jehova duong’, kendo e yo ma biro konyo jogo ma ochopo. Jolendo ma dwa dhi e tij lendo onego otem matek mondo kik gibare ne romo mar dhi lendo ka mano nyalore.

Romo mag dhi lendo onego okaw mapek mana kaka chokruoge mamoko mag kanyakla

5. (a) Jarit tij lendo nigi ting’ mane e chano romo mag dhi lendo? (b) Ere kaka nyaminwa moro nyalo tayo romo mar dhi lendo?

⁵ Ikruok ma Jal ma Tayo Romono Onego Otim: Mondo ng’ato oikre maber ne migawo moro e chokruok, onego omiye migawono chon. Kamano bende e kaka onego otimre gi romo mar dhi lendo. Ka jolendo romo e grubegi mag lendo, jarit grup kata jakonyne e ma biro tayo romo mar dhi lendo. Kata kamano, sama kanyakla duto romo kanyachiel, jarit tij lendo biro miyo owadwa moro migawo mar tayo romono. Jorit tij lendo moko losoga chenro mar joma biro tayo romo mar dhi lendo, kae to omiyo joma nigi migawo kopi margi, to moro oguro e bod mar weche. Jarit tij lendo onego oti gi rieko sama opogo migepegi, kong’eyo ni mondo romono obed ma konyo jolendo, mano biro luwore gi lony kod nyalo ma joma tayo romono nigo e puonjo jolendo kod chanogi. Kapo ni onge jaduong’-kanyakla, jakony-tich, kata owadwa moro ma osebatis kendo mowinjore ma nyalo tayo romo mar dhi lendo, jarit tij lendo biro miyo nyaminwa moro ma osebatis kendo mowinjore, migawo mar tayo romono.—Ne wich ma wacho ni “Gik ma Nyaminwa Onego Otim Kochuno ni Nyaka Ota Romo mar Dhi Lendo.”

6. Ang’o momiyo jal ma tayo romo mar dhi lendo onego oikre maber?

⁶ Sama wayudoga migawo e Skul mar Tij Nyasaye kata e Chokruok mar Tijwa, wakawogiga mapek kendo watimo ikruok maber. Ji matin ahinya e ma ritoga nyaka sama gidhi e chokruok eka gichako paro gima gibiro wacho. Migawo mar tayo romo mar dhi lendo bende onego okaw mapek. Nikech koro romo mar dhi lendo ibiro tim kuom dakika machuok, jal ma tayo romono onego oikre maber mondo romono obed ma konyo jolendo kendo ma rumo e wang’ sa. Ikruok maber bende oriwo yudo alwora ma ibiro lendoe chon.

7. Moko kuom weche ma jal ma tayo romo mar dhi lendo nyalo wuoyoe gin mage?

⁷ Gik Monego Owuoye e Romono: Nikech chal mar alwora ka alwora opogore, jatich mogen ok chiw weche ma onego owuoye e romo ka romo mar dhi lendo. Sanduk ma wiye wacho ni “Weche Munyalo Nono e Romo mar Dhi Lendo,” oting’o moko kuom weche munyalo wuoyoe. Kinde mang’eny, ibiro ta romo mar dhi lendo e yor wuoyo. Dichiel ka dichiel e romono, unyalo timo ranyisi ma oik maber kata unyalo tiyo gi vidio motudore gi tij lendo ma yudore e Websait mar jw.org. Sama jal ma dhi tayo romo mar dhi lendo timo ikruok, onego opar weche ma biro jiwo jolendo kendo ma biro ikogi ne tij lendo chieng’no.

Sama jal ma dhi tayo romo mar dhi lendo timo ikruok, onego opar weche ma biro jiwo jolendo kendo ma biro ikogi ne tij lendo chieng’no

8. Gin weche mage ma inyalo wuoyoe e romo mar dhi lendo chieng’ Ngeso kod Jumapil?

⁸ Kuom ranyisi, chieng’ Ngeso, thoth jolendo chiwoga gasede mag Ohinga mar Jarito kod Amkeni! Ng’eny joma dhiga lendo chieng’ Ngeso ok lendga e kor juma, omiyo nyalo bedonegi matek paro ranyisi moko ma ne oyudo giseiko ka ne gitimo Lamo mar Joot. Kuom mano, nyalo bedo maber ka jal ma tayo romono onwoyo achiel kuom weche mwanyalo chako wuoyogo gi ji ma yudore e tok Tijwa mar Pinyruoth. Paro mamoko ma onyalo chiwo gin, kaka wanyalo chiwo gasede kwatiyo gi wach moro kata gimoro manyien motimore e alworawa, kata e wi nyasi moro mitimo gi jopiny. Bende, onyalo wuoyo kuom kaka wanyalo keto mise mar dok limo ng’at ma oyie kawo gasede. Kapo ni nitie jomoko ma oselendo gi gasede ma ichiwo e dweno, jal ma tayo romo mar dhi lendo nyalo kwayogi mondo gichiw paro moko machuok ma nyalo konyo, kata weche mosene. Chieng’ Jumapil, jal matayo romono nyalo yiero mar wuoyo kuom paro moko motudore gi buge milendogo e dweno. Buge mipuonjogo ji Muma kaka brosua mar Wach Maber kod Winj Nyasaye kod bug Muma Puonjo inyalo chiw chieng’ moro amora. Omiyo, jal ma tayo romo mar dhi lendo nyalo wuoyo machuok kuom kaka inyalo chiw bugego e tij lendo.

9. En ang’o ma inyalo wuoyoe e romo mar dhi lendo sama kanyakla timo kampen makende e giko juma?

⁹ Kapo ni kanyakla timo kampen moro makende e giko juma, jal ma tayo romo mar dhi lendo nyalo wuoyo kuom kaka wanyalo chiwo gasede ma dweno kanyachiel gi kalatese kata trakt ma itimogo kampen, kata onyalo wuoyo kuom gima jalendo nyalo timo ka oyudo ng’at morwako wach. Gima chielo ma inyalo tim e romono en wuoyo kuom weche mosene ma konyowa neno ber mag timo kampen ma kamago.

10, 11. Ang’o momiyo ikruok ma jolendo timo konyo ahinya e miyo romo mar dhi lendo odhi maber?

¹⁰ Ikruok ma Jolendo Onego Otim: Jolendo ma chopo e romo mar dhi lendo bende nigi ting’ mar miyo romono odhi maber. Ka giikore chon ne tij lendo, samoro sama gitimo lamo mar joot, ginyalo yudo gima ginyalo wacho ne jolendo wetegi. Ikruok maber bende oriwo kawo gasede kod buge kapok ibiro e romo mar dhi lendo, mondo ji duto odhi e alwora mar dhi lendo mapiyo bang’ romono.

¹¹ Bende, ber ka ichano mar chopo dakika moko matin kapok romo mar dhi lendo ochakore. Watemoga matek mondo wachop e chokruoge mag kanyakla chon. To mano e gima onego watim bende sama wadhi e romo mar dhi lendo, nikech wanyalo chocho jomamoko ka wachopo e romono modeko. E yo mane? Nitie weche ma jal ma tayo romo mar dhi lendo nonoga kapok opogo ji. Kapo ni jolendo manok e ma obiro e romono, onyalo yiero mar tero jolendogo duto e alwora achiel ma ne ok otiek lendoe. Ka nitie jolendo moko ma ne owuotho gi tiendgi ka biro e romo mar dhi lendo to alwora ma ilendoe ni mabor, jal ma tayo romono nyalo pogo jolendogo gi joma nigi gari. Kapo ni ji dhi lendo e alwora ma opong’ gi timbe njore, onyalo pogo owete moko mondo olend kanyachiel gi nyimine moko kata mondo gilend machiegni kodgi. Jolendo ma ong’ol inyal pog alwora mopie ma onge gode, kata e udi ma ok idhie ngas mang’eny. Inyalo pog jolendo manyien mondo giti gi jolendo molony. Omiyo, ka jolendo obiro modeko e romono, biro chuno ni olok chenro matin kata inyalo loke chuth, eka mondo giyud joma gidhi lendogo. En adier ni nitie gik ma nyalo miyo ng’ato ochop modeko. Kata kamano, ka wang’iyo gi tim mar chopo modeko, wanyalo penjore ka be wakawo romogo mapek, koso en nikech ok wachano wechewa chon maber.

12. Kapo ni ijatimoga chenro ma mari iwuon ne tij lendo, en ang’o ma inyalo keto e paro?

¹² Jolendo ma biro e romo mar dhi lendo nyalo yiero mar timo chenro ma margi giwegi kapok romono ochakore, kata ginyalo rito mondo omigi joma gibiro lendogo. Ka ijatimoga chenro ma mari iwuon, donge inyalo ‘yawo chunyi’ kuom tiyo gi jolendo mopogore opogore, kar lendo mana gi osiepeni seche te? (2 Kor. 6:11-13) Donge kinde moko inyalo chano mar tiyo gi jolendo manyien mondo ikonygi timo dongruok e tij puonjo ji? (1 Kor. 10:24; 1 Tim. 4:13, 15) Chik iti maber ne weche duto miwacho e romo mar dhi lendo, moriwo kama udhi chakoe lendo. Bang’ ka romono oserumo, tem matek mondo kik ilok chenro ma oseketi, kendo dhi e alwora mar lendo mapiyo kaka nyalore.

13. Ka ji duto ma biro e romono otimo kargi maber, gin ber mage ma romo mar dhi lendo biro kelonwa?

¹³ Bang’ ka ji 70 ma Yesu nopogoka nosetieko lendo, ‘ne giduogo ka gimor.’ (Luka 10:17) Onge kiawa ni romo ma Yesu nobedogo kodgi kapok gidhi lendo nokonyogi yudo nyak. E kindegi bende, romo mag dhi lendo nyalo kelo nyak. Ka ji duto ma biro e romono otimo kargi maber, to romo mag dhi lendo biro bedo ma jiwowa, biro ikowa ne tij lendo, kendo biro chanowa e yo maber mondo wachop tich momiwa mar ‘chiwo neno ne ogendni duto.’—Mat. 24:14.

Gik ma Nyaminwa Onego Otim Kochuno ni Nyaka Ota Romo mar Dhi Lendo

Onego oum wiye kendo tayo romono kobet piny. Onyalo wuoyo e wi gik ma owadwa dine owuoyoe ka dine entie. Nyaminwano onego otang’ mondo kik owuo e yo ma nyalo nenore ni ochiko joma obiro e romono mondo otim gimoro. Kar mano, onyalo tayo romono e yor mbaka. Kapo ni okwayo nyaminwa machielo mondo olem, nyaminwano bende onego oum wiye. Ka owadwa ma osebatis obiro e romono bang’ ka osechakore, nyaminwa ma ae tayo biro kwaye mondo odhi nyime gi tayo romono. Jarit tij lendo onego otem nono chal moko ma nyalo betie, kae to ochiw weche ma inyalo luw, mondo ogeng’ chochni ma nyalo bedoe. Kuom ranyisi, owadwa ma osebatis to pod tin nyalo biro sama nyaminwa moro tayo romono, to nyalo bedo ni jodongo neno ni pod ok owinjore tayo romo mar dhi lendo. E kinde kaka mano, jarit tij lendo onego onyis joma biro chopo e romono ni nitie nyaminwa ma biro tayo romono, to owadwa matinno nyalo lemo kapo ni jodongo neno ni owinjore timo kamano. Kata nyalo bedo ni nitie owadwa moro e romono ma ok nyal tayo kata lemo nikech weche moko ma jodongo e ma ong’eyo. Jodongo onego onyis nyaminwa ma tayo romono ni en e ma obiro tayo romono kata obedo ni owadwano nitie e romono. Kendo ni onyalo kwayo nyaminwa machielo mondo olem kata obedo ni owadwano nitie e romono. Jodongo nyalo chiko nyimine kamano, ma ok ginyiso nyiminewago weche maling’-ling’ momiyo owadwano ok nyal timo migepego. Jodongogo bende nyalo nyiso owadwano odiechienge ma nyimine e ma biro tayoe romo mar dhi lendo.

Weche Munyalo Nono e Romo mar Dhi Lendo:

Weche Mwanyalo Chako Wuoyogo gi Ji mayudore e Tijwa mar Pinyruoth.
Vidio motudore gi tij lendo ma yudore e Websait mar jw.org
Unyalo wuoyo kuom kaka wanyalo chako wuoyo gi ji, kaka wanyalo keto mise mar dok timo limbe, kata nyiso ng’ato chenro ma wan-go mar golo chiwo ka ng’ato oyie kawo bugewa.

Ndiko moro motudore gi tij lendo ma nyalo jiwo jolendo kata miyogi puonj moro.
Ndiko moro motudore gi tij lendo ma nyalo jiwo jolendo kata miyogi puonj moro.
Wach moro mosene e alworau kata ma yudore e bugewa.
Weche ma yudore e sula moko mag Tijwa mar Pinyruoth.
Weche ma nyocha owuoye e Chokruok mar Tijwa.
Weche motudore gi tij lendo ma yudore e Ohinga mar Jarito.
Weche motudore gi tij lendo ma yudore e bug Skul mar Tij Nyasaye kod “Njoo Uwe Mfuasi Wangu” kata mamoko.
Gik ma yudore e Websait mar jw.org ma inyalo tigo e tij lendo.
Weche ma yudore e Loko mar Piny Manyien ma inyalo tigo e tij lendo.
Kaka unyalo chako wuoyo gi ng’at muromogo e alworau ma ok oyie kuom Nyasaye, ma oyie ni gik moko nosieko kendgi ma ok ochuegi, Ja-Hindu, Ja-Budha, gi moko ma kamago.

Wach moro ma ji e alworau tiyogo mondo gigeng’u kik ulendnegi, kod kaka unyalo wuoyo kodgi.
Wach moro ma ji e alworau tiyogo mondo gigeng’u kik ulendnegi, kod kaka unyalo wuoyo kodgi.
Kaka unyalo konyo ng’at mulendogo mondo obed molony e lendo mar ot ka ot.
Kaka unyalo wuoyo gi ng’at ma wacho dhok machielo.
Kaka unyalo lendo kutiyo gi yo moro mar lendo ma jomoko biro tiyogo chieng’no, kaka tij manyo joma wacho dhok moro, lendo e yor simo, lendo kuonde ma ji ng’enyie, dok timo limbe, kata tayo puonjruok mag Muma.
Inyalo paro ne jolendo wach bedo motang’ ne gik ma nyalo kelonegi hinyruok, bedo joma nyalo lokore kaluwore gi chal mar wuon ot, bedo joma odimbore, bedo gi paro mowinjore, kata weche ma kamago.