Kaka Chenro mar Puonjruok-Buk mar Kanyakla Konyowa
1. Chokruogewa abich mag juma ka juma konyowa e yo mane?
1 Moro ka moro kuom chokruogewa abich ma watimo juma ka juma opogore gi machielo e yo ma itime koda gimomiyo itime. Kata kamano, giduto gikonyowa e miyo “ng’ato ka ng’ato opar owadgi mondo wami hera gi timbe mabeyo omedre.” (Hibr. 10:24, 25) Gin gik mage makende kendo makonyo mag chenro mar Puonjruok-Buk mar Kanyakla?
2. Gin ber mage mayudore kuom romo mar puonjruok-buk ma en chenro mabedo gi ji manok?
2 Kony mar Timo Dongruok e Wach Nyasaye: Kwan mar jogo mabedoe e puonjruok-buk tin ne kwan mar jogo mabedoe e chokruoge mamoko mag kanyakla. Mano miyo bedo mayot moloyo bedo gi osiepe manyalo jiwowa e wach Nyasaye. (Nge. 18:24) Be isetemo mondo ing’e ng’ato ka ng’ato manie grup maru mar puonjruok-buk, kanyalore ka igwelogi ng’ato achiel achiel mondo gilend kodi? Chenro mar puonjruok-buk bende konyo jarit-puonjruok-buk e ng’eyo chal mar ng’ato ka ng’ato e grubno kendo jiwogi.—Nge. 27:23.
3. Ere kaka chenro mar puonjruok-buk jiwo ji mondo ochiw paro kendo jiwo jopuonjre Muma mondo obi e chokruok?
3 Be isegwelo jogo ma ipuonjori godo Muma mondo odhi kodi e puonjruok-buk? Jogo marwako wach maber to luor biro e chokruogewa madongo, nyalo bedo gi chir mar biro e chokruok matin, to moloyo ka itime e od ng’ato. Tudruok mani machiegni e kind jogo manie grubno miyo bedo mayot ne nyithindo kaachiel gi joma nyien chiwo paro. Kendo nikech grubno tin, wan-gi thuolo mang’eny mar chiwo paro kendo pako Jehova.—Zab. 111:1.
4. Chenro mar puonjruok-buk nyalo konyo e yore mage?
4 Chokruoge mag puonjruok-buk itimo kuonde mayot ne jolendo chopoe. Kata obedo ni ok en gima yot mondo ji duto oter e grup mani machiegni kodgi moloyo, dhi e grup moketwae nyalo bedo machiegni moloyo kama itimoe chokruogewa mamoko mag kanyakla. Kama itimoe puonjruok mar buk bende nyalo bedo kama owinjore timoe chokruok mar dhi lendo.
5. Wanyalo yudo kony nade e tij lendo kuom jarit puonjruok-buk marwa?
5 Kony e Tij Lendo: Jarit puonjruok-buk dwaro konyo ng’ato ka ng’ato mondo olend pile, e yo makelo nyak, kendo kelo mor. Kuom mano, otemo tiyo tij lendo gi ng’ato ka ng’ato e grubno, kochiwo kony kuom yore mopogore opogore mag lendo. Ka iyudo ni nitie yo moro mar lendo matekni, kaka dok limo jogo ma isewuoyogo, nyis jarit puonjruok-buk maru. Kanyalore onyalo chano mondo ilend gi jalendo molony manie grup maru. Neno kaka jarit puonjruok-buk maru puonjo e yo maber sama otayo puonjruok-buk biro konyi lony sama ipuonjo jopuonjre Muma.—1 Kor. 4:17.
6. Ang’o momiyo onego watim kinda mondo wayud kony chuth kuom chenro mar puonjruok-buk?
6 Mano kaka Puonjruok-Buk mar Kanyakla en chenro makelo gweth! Chenro majaberni ma Jehova oketo konyowa chung’ tir e wach Nyasaye kindegi mag chandruok ma wadakie.—Zab. 26:12.