“Beduru gi Hera ne Riwruok Duto mar Owete”

Wechegi mokudh gi much Nyasaye nondiki chiegni higini 2,000 mosekalo. (1 Pet. 2:17, NW) Kata kamano, magi e kinde ma dwarore ni watiye gi wechego moloyo kinde moro amora mosekalo. Ere kaka wanyalo hero gima okwako piny duto kaka riwruokwa mar owete? Ang’o ma wanyalo timo mondo herawa kik dog chien e piny ma ji onge gi herani? (Math. 24:12) Non wechego kuom manyo dwoko mag penjo maluwogi sama ineno vidio mar Our Whole Association of Brothers.

(1) En karang’o ma ne wachako bedo jokanyo mar riwruok mar owete ma Jokristo? (2) Gin gik mage adek ma watimo ma owetewa duto e piny mangima bende timo? (3) Ere kaka owetewa nyiso ni gin gi kinda mar lendo (a) e gwenge ma chopoe tek e piny Alaska, (b) e wedhe madongo mag Ulaya, kod (c) e gwenge motimo bunge e piny mar Peru? (4) Ang’o momiyo tijwa mar lendo opogore gi tije mamoko? (5) Chiw ane ranyisi manyiso kaka Joneno mag Jehova osekonyo owetegi (a) bang’ yiengni mar piny, (b) bang’ yamo mager ketho gweng’ moro, kod (c) e kinde ma lweny omuoch e kind ogendini? (6) Gin yore mage ma wanyalo nyisogo kido mar hera mifwenyogo riwruokwa mar owete ma Jokristo? (Joh. 13:35) (7) Tiyo kanyachiel e gero Ute Romo magwa kelo ber mage? (8) Ere kaka owetewa ma Ulaya ma Ugwe (Eastern Europe) kod Russia nosiko komakore gi Jehova e kinde ma ne ogogi marfuk? (9) Joneno mang’eny timo kinda e yore mage mondo gidhi e chokruoge madongo, to ang’o machwalogi timo mano? (10) Ere kaka vidioni osetego yiero misetimo mar (a) riwruok gi owete e lamo Jehova e chokruogewa mag Jokristo, (b) konyo jomamoko e kinde mag chandruok, kod (c) lendo gi kinda ndalo duto e yo moro amora manyalore? (11) Gin kinde mage ma wanyalo tiyoe gi vidioni e tijwa mar lendo, to wanyalo timo mano e yo mane?

Gima duong’ momiyo wan ei riwruok mar owete mar Jokristo en nikech wahero Jehova. Omiyo, wahero puonjore kuome kendo puonjo jomamoko mondo ong’eye. Kendo wahero jogo ma Jehova ohero. Seche ma wakonyogi e kinde mag chandruok, ok wagen ni Nyasaye biro goyonwa erokamano. Kar mano, wan ema wagoyo ne Nyasaye erokamano nikech wang’eyo ni en ema omiyo wan ei riwruokwa mar owete ma Jokristo. Nikech giko mar piny ma ji onge gi herani osekayo, donge nyalo bedo maber ka wadhi nyime nyiso ni wahero riwruokwa mar owete manie piny ngima?